شعرت برغبة عارمة ان ارقص بالجلابية و الرقصة دي بتمسك بطرفي كمي الجلابية بكفيك الاثنين وتحركها بحركة افقية مع الايقاع (والعجب كان لقت ليها زيادة بالرقبة اااي بالرقبة)
الرقصة دى كانوا بيعملوها (السكارى) فى الحفلات او الشباب الفرايحيين خاالس زى صاحبنا الدكتور عثمان كرار استشاري الاطفال مبدع جدا يجيدها اذا فرح . لكن عموما اظنها تعبر عن مُنتهى الغبطة والفرفشة .
فقبيل (قررربت) …
اعمل الحركة دي وانا اقرا خبر بالانتباهة يقول …
ان (السلطات) فى الخرطوم القت القبض على عدد من المروجين والمتعاطين فى حملة (قال ليك) إستهدفت
(خلي بالك معاي) …
شمبات و بحري و شارع النيل و موقف (جاكسون) وشارع عبيد ختم و شارع الستين !
يعني الشغلانة بقت اكل عيش محترم ! عينك عينك
واسفرت هذه الحملة (المباركة) عن ضبط ….
عدد (٤٨) متهما وتم ضبط (١٧١٦١) كيلوجرام (بنقو) يا جماعة الرقم ده صحيح سبعة عشر الف وحاجة !
(طيب) ….
و (٣٢٩٠) حبة ترامادول وعدد (٢) عربة …!
يعني (خمشة ساااكت) فى نص الخرطوم و على الماشي كده اسفرت عن هذه المصائب .
حقيقة المخطط كبير والاستهداف ممنهج ولكن يمكن ان يٌهزم فقط بسلاح (التوعية) نعم عندما تبنى مجلس السيادة ولو مؤخرا خطر المخدرات و اصبحت قضية رأي عام و لم يعد الحديث عنها همسا فهم الناس ابعاد المخطط الدنئ و وعت الاسر والمدارس وخطباء المساجد وتواترت الندوات وتحدث اهل الطب
فهنا نقول (الحمد لله) قد بدأنا فى افشال المخطط وبخطى حثيثه
و اعتقد المتبقي فقط هو …..
تغليظ العقوبة لتصل لحد الاعدام فإن اجيز ذلك نجا الوطن ونجت اجيالنا
والتحية عاليه لكل اجهزتنا الامنية اينما وجدت
قبل ما انسى …
أهاا يا ناس الحكومة عرفتوا (السوق وين)؟
صحيفة الانتباهة
-
-
-
-
-
-
-
-
