التحية لشرطة جمارك معبر (ارقين)

اولا نحيي شرطة جمارك معبر ارقين ونثمن عاليا دورها فى حماية اخطر معبر حدودي للسودان هو المتاخم لمصر

(الانتباهة) نشرت ان شحنة على براد قادمة من هناك تم تقديم اوراقها بالمعبر على انها تحمل (كبابي) شاي …!!
اااي والله شحنة كاملة كده داخلا بسلمتها قالوا كبابي شاهي
ماااطبعا الكلام مبلوع و ….
ما فيها حاجة طالما ان السودان كله (عدم القزازة الواحدة) و شبابنا يتسكع للساعة تلاتة صباحا حارس ستات الشاي !
فاكيد محتاجين كل اسبوعين تلاته ل (كونتينر) كبابي لتغطية التالف وناس (كششو) انكسرت
مش ده واقع الحال بقول كده؟

لكن تعال شوف الكبابي (طلعن شنو) !
فقال ليك …
اول حاجة المخلص لم يحضر عند فتح (البرادة) يعني عمل رايح . يعني الزول ده عااارف الفيها شنو ! فتم تشكيل لجنة للكشف
وتعال شوف المصيبة الداخلة البلد ….
(٥٤٤) كرتونةكريم (اماليكو) ما بعرفو بتاع شنو غايتو . و عدد (٢١) كرتونه كريم (سيفك) برضو ما عارفو (بجلبطن بيهو شنو) . و (١٠٠) كرتونة ورق برنسيس وطبعا دى بتكون ماشة لناس (البنقو) و(٢٠٠٠) كرتونة سعة الواحدة منها (٢٥) قارورةمحلول غسيل كلي (ما تسألني عن حكاية درجة حرارة حفظه وصلاحيته وكده) و(قال ليك) و (٢٩) طرد حبوب لم يذكر اسمها واعتقد منتظرين المختصين من الصيادلة يصلوهم . و (٢٩) كرتونة (سيور دربات) واخيييرا قال (٢٨٠) كرتونة كبابي شاي للتمويه .

حقيقة احيي هذا التيم العامل ولا اقل ان يحفزوا على هذه المهنية العالية والهمة العالية بقيادة العميد شرطة عبد الفتاح احمد واركان حربه .

قبل ما انسى ….
يا ضباطنا الشرفاء بهذا المعبر فتحوا عيونكم كوييبس الايامات دي .
مبادرة القاهرة كوم وحماية الامن القومي السوداني كوم تاني خااالس .

صحيفة الانتباهة