*في شفع كده قصة فطامتهم دي مستحيلة.
*نقطة لبن لأخوهو الممكن يجي بعدو مابخليها.
*وبرضعوا علي عينك ياتاجر.
*موش في نوع كدة تلقاهو مشعبط وبرضع ورجلينو مدلدلات لي قريب الواطة.
*ولما زول يقول ليهو ماترضع.
*راجل كبير كدة وترضع!.
*يقوم الشافع يصنقع ويعاين ورا للزول المنعو الرضاعة .
*يعاين ليهو جوة عينو.
*بدون خجلة.
*ويرجع يرضع تاني.
*النوع ده مابخجل .
*وممكن يجي من المدرسة يخت شنطتو ويرضع .
*والرضاعة بالطريقة دي بتسبب أضرار كتييييرة .
*للأم وللثدي.
*بالذات الثدي.
*لأنها رضاعة خارج نطاق وفطامة.
*نوع من الشفع مابعرف الفطامة.
*النوع ده أبتلي بيهو ربنا المريخ.
*ناس كباااار.
*العمر كلو يرضعوا ومابشبعوا.
*يرضعوا بشراهة لما أصابوا المريخ بسرطان الثدي.
*يبقى العلاج لازم فوري.
*كيماوي وإشعاع.
*أي تأخير بودي لي شيل الثدي .
*وزي ديل إذا إنقطع الثدي مابنقطع عندهم أمل الرضاعة .
*بلموا في الثدي التاني.
*ويلحقوهوا أخوهو.
*ويلحقوا المريخ أمات طه.
*أيها الناس.
*المريخ يعيش إشكالات كتيرة .
*كلها سببها الناس البترضع ومابية الفطامة .
*زي ديل مفروض نمسح ليهم الثدي بدواء الملاريا أو شطة قبانيت.
*عشان البخت قدمو داير يرضع.
*يلقي الثدي بيلسع.
*وينفطم إجباري.
*المهم.
*شكل المريخ يوم شندي ما كان جذاب .
*هو المريخ مع ناس الرضاعة ديل فضل ليهو شكل؟؟؟.
*لكن كمان الإشكالات والإختلافات والتهاترات.
*جميعها تخلق جواً غير صحي لتصحيح مسار الفريق .
*جميعنا ينظر في طريقة اللعب.
*وننتقد الأجهزة الفنية.
*وندلوا بدلونا في التشكيل.
*والتغيير.
*والإحلال والإبدال.
*الواحد فينا مجلس لوحدو.
*ومدرب .
*ورئيس غرفة تسجيلات.
*ومدير مالي.
*ووكيل لاعبين.
*وقطب.
*والمريخ حقو .
*عشان هذه التدخلات في الشأن المابخصنا.
*بقى شكل المريخ كده.
*الإداري لما يكون ضعيف وإداري غفلة.
*بحتاج صحافة تسندو.
*وهو لو بفهم إنجازاتو براها بتسندو.
*لكنه يستعجل الظهور و(الشو) ويعشق التلميع.
*زول ماعندو علاقة بالإدارة.
*جابو السيل والصدفة.
*وبحتاج لهتيفة يعلقوا ليهم دلقانين تلاتة على السياج فيهم تمجيد ليهو بالشي الفلاني.
*في حين أنو خططو وشفافيتو ممكن براحة تجعل كل الجمهور معاهو وبي كده مابحتاج لهتيفة.
*لأنو أعمالو بتهتف ليهو براها.
*أيها الناس.
*تعالوا نخلق الجو المناسب للمجلس وللجهاز الفني عشان يعرفو شغلهم .
*وناس المجلس حقو يبطلوا القعاد مع(الموجهين) ويقعدوا مع أنفسهم ليناقشوا كيفية إدارة العمل.
*وحقو الإداري يسأل نفسو.
*ليه الحولينو ديل إتلموا حولو بعد دخولو للمجلس.
*وهل لما يمرق حايلقاهم حولو .
*ولا بشوفوا ليهم محل رضاعة جديد في المجلس الجديد؟؟؟.
*للذكرى.
*نجح الزولفاني المغمور والمحارب قبل أن تطأ رجلو أرض السودان.
*لأنو المجلس وقتها كان عامل أضان الحامل طرشا.
*أيها الناس.
*إن تنصروا الله ينصركم.
*أها .
*نجي لي شمارات والي الخرتوم.
*كان شفت يا والينا .
*ثورتنا دي ثورة حياة ماثورة موت يا أخينا.
*وسلمية سلمية برغم التفلت والأذية.
سلك كهربا
ننساك كيف والكلب قال لابنطقع لابنخرب ولا بنتراجع.
وإلى لقاء.
سلك
صحيفة الانتباهة
