*أنفروا خفافاً.
*أنهم المريخاب أعضاء القروبات.
*قاموا بنفرة لدعم إعادة تأهيل الاستاد تمخضت عن مليارات .
*أثبتت تلك المليارات أن المريخ لايحتاج لرئيس شرط وجودو إنو عندو قروش.
*كما كانت النفرة بمثابة رد على الأخ حازم الذي من كثيراً بقصة بدفع براي وكان ماعاجبكم أسي بسلمكم.
*مع الإحتفاظ لحازم بالشكر والتقدير لما قدمه(أيام التلميع)وماقدمه بعد(التطبيع).
*والأهم من مليارات النفرة .
*هو إعادة تأهيل روح الإنتماء داخل الأنصار وتنشيطها.
*قصة جابوا لينا وعملوا لينا ومصالح وفتات يقتات منه الهتيفة لا تشبه الزعيم ولاتفيده .
*نرفع القبعات لكل القروبات التي ساهمت.
*بل لكل المساهمين من أعضاء جميع القروبات.
*وتحية(عسكرية)وخطوات تنظيم للأحبة في قروب (الديناكوردات) الذين كانوا في مقدمة الركب بمليارات شارفت على المليار الرابع ببسيط .
*ولو كنت أنا قد ساهمت معهم لقفلنا المليار الرابع.
*الأخ شهاب قلت ليهو أصبروا لي شوية.
*قال لي سلمنا.
*قلت ليهو برضو بساهم.
*قال لي إلا النفرة الجاية .
*وهي نفرة للقروب للتعاقد مع شركة لنظافة ومتابعة حمامات الاستاد والمرافق .
*علم وحلم وإرتباط وثيق وإنضباط بعسكرية حقه لمريخية تستحق.
*المهم النفرة فاتتني.
*وإحساسي بقى زي إحساس الجعلي .
*قالوا الجعلي في زول أكرمو كرم شديد.
*الزول ده بعد فترة جاتو ضائقة مالية شديدة.
*الجعلي مشى ليهو وهو حافظ جميل الزول.
*قال ليهو يافلان العين بصيرة والأيد قصيرة.
*علي الطلاق التكتح ماعندي .
*لكن سوي ليك عوة وزح لي منها.
*أها أنا موقفي بقى زي الجعلي ده.
*المريخ إلا يسوي ليهو عوة ويزح لي منها.
*لكن نحنا لسة فيها.
*المهم.
*وصل حالنا في البلد دي لدرجة مبكية.
*تصدقوا في ناس غلبتهم مصاريف المدارس جمدوا السنة دي لشفعهم؟.
*تصدقوا في ناس قسموا شفعهم.
*جزء يمشي المدرسة وجزء يقعد في البيت للسنة الجاية؟.
*تصدقوا في ناس إتمنوا الموت قبل مايشوفوا حسرة في عيون أطفال محرومين من أبسط حقوقهم وهو حق التعليم لأسباب مادية؟.
*تصدقوا في البلد دي كان في مجانية تعليم .
*وإلزامية تعليم كمان .
*يعني تقرأ مجاني ورجلك فوق رقبتك.
*بل كان في محو أمية ليلحق من فاتهم قطار التعليم بركب المعرفة.
*والآن شن جاب لي جاب؟.
*هل ينزل جبريل بوحي جديد يخرجنا من هذا المطب؟.
*كيف ينزل والحبيب آخر المرسلين لاينزل وحي لنبي بعده؟.
*إذاً فلنبحث فيما نزل من وحي على الحبيب المصطفى لنخرج من هذا الكابوس المزعج الذي أفزع أحلامنا.
*أيها الناس.
*إن تنصروا الله ينصركم.
*أها .
*نجي لي شمارات والي الخرتوم.
*والينا المكلف علينا.
*أيه المخرج ورينا؟.
سلك كهربا ننساك كيف والكلب قال يلا يا أولاد المدارس كأغنية جميلة إتنست.
وإلى لقاء .
سلك
صحيفة الانتباهة
