الناس البتقول لي إنتي براك 😒
أنا فعلآ كنت براي ودايشه وتايهه ورايحه وماشه علي كيفي لأني كنت وسط منفى مفتوح لافيهوا أسره لافيهو أب لافيهو مجتمع لافيهو لون لافيهو طعم!! أنا بِلعت الطعم وعمري20سنه ومشيت غلط في كتير من الحاجات وماكنت مستوعبه للحته دي صدقني أنا لو قلت ليك في عُمر 21سنه كنت بشرب شيشه ومرات بالعدم بشرب سجائر آي والله كنت بعمل كده وكنت وسط ناس بيصوروا لي الحاجة دي كأنها إستكمال لي شخصيتي الكانت رايحه مني ووصلت مرحله خليت بيتنا ومشيت قعدت مع خالتي في المايقومه سته شهور وبقيت ماعندي حاجه لي أمي وأبوي وامتنعت عن التواصل معاهم عشان كانو يومي بينصحوني وبيقولوا لي كده غلط ياتبو وأنا كنت شايفه نفسي صاح لحدي مادخلت الجامعه وعرفت حاجه اسمها الجبهه الديمقراطيه (الحزب الشيوعي) ومجموعات النسويه ومجموعات لالقهر النساء ومجموعات مناهضة حقوق المرأه وبقيت أمشي برامجهم واتبرمج معاهم وهِنا بقيت اشيل أفكار اكعب من شُرب السجائر والشيشه عن الأسره والمجتمع والحقوق البتخصني كمرأه وحاجات كتيره أنا كتبتها في منشورات متعدده !!لأني بالجد كنت كعبه بماتحمل الكلمه من معنى تجاه نفسي وتجاه الناس الحوليني وكنت على كيف كيفي!! في واحد جايب لي صوره حقتي قديمه لاني فاكه شعري ولابسه بنطلون وقالي انتي لي بتنصحي الناس وانتي كده فصراحه قعدت أضحك علي الزول الرسل لي دا لأنو دا لو كان شافني زمان كان قال والله أنا غلطت في حق تبيان دي كتير!!
دي حقيقه أنا بحكيها للناس عشان تكون عارفه لي أنا بكتب ولي أنا بكون حريصه ع إني اجيب الكلام ضنب كلب من دون تجميل أو زيادة ونقصان!!لأنو مافي شي بيخليني أخجل من حاجه غلط أنا كنت مقتنعه بيها في يوم من الأيام والآن أنا بوضح للناس عنها وحولها عشان مايكونوا زي كده ومايصلوا مرحلتي دي ولايشوفوا طريق الشيوعيه الكعب وعشان أكون منصفه فلازم أحكي واتكلم!! والحاجه الحارقاني إنو في بنات وأولاد ماشين في نفس طريق الوهم دا وماجايبين خبر لكن في يوم من الأيام حيكتشفوا إنو الأفكار الدخيله دي حتهدم اسرتهم وحتكون سبب نكسه ليهم وماحيستفيدوا شي غير الوجع والندم والاحسن انك تكون براك وتسوي الصاح وتبتعد عن الخُبث اليساري المنتشر دا
الحاله الكنت فيها أنا دي بقت حاله منتشره كتير بس البيوت ساتره ناس وثقافه الكتابه مافي والإستخدام السليم لأدوات الإتصال برضوا مافي!!
أصريت اني اخلي تجربتي دي هي منصه لتعديل الحاجه الكانت غلط قدام عيني وأنا كنت جزء منها وبشارك فيها وكل السبب كان هو إختيار الصديقه الغلط والصديق الغلط!! أنا هسع مابراي والله مابراي عشان تكون عارف الحته دي!!
أنا الآن منفتخه للمجتمع السوداني برساله بتهم الأسره وبتهتم بالعادات الحميده والمعتقد الطيبه والأفكار السليمه!!
وجاهزه لأني ارجع اكون براي زي ماكنت إذا المجتمع المتواصله معاهوا دا قرر إني ما اكتب ولا اتكلم!!
إنت وانتي كأشخاص عندكم مشروع علماني وعايزين تحققوهوا في البلد دي وتهدموا عقول الشباب وتفرتقوهوا طوبه طوبه أكيد حتشوفوني براي ومامعاي زول لأنكم اصلآ مغشي عليكم من البصيره والبصر واكيد حتكونوا بالنسبه لي أعداء بعد ماكنتوا لي أصدقاء!!لكن البلد دي ملياانه ناس فيها خير وخير كبير والله ولو ماكده ماكان أنا استعدلت ولا كان مشروعكم دا إنهار قدام عينكم وخلاكم تتباكوا زي الحريم
السنه الفاتت الحمدلله مشيت الشماليه المحس ولقيت الأهل وعرفت يعني شنوا عم ويعني شنوا خال ويعني شنوا عًمه وجيران وحِبان وأسره ومجتمع ولمة أصحاب حقيقين وبعديها مشيت زياره لبيت الله الحرام وإكتشفت إني مابسوى شي وعباره عن إنسانه شايله ذنوب تقيله وإني اخدت في حق نفسي شديد!! وكل دا تقولي انتي براك بعد رجعت لأمي وأبوي وأسرتي وبقيت في نصهم تقول لي انتي براك!!بعد الدعم المعنوي الكبير الشايفاهوا من أصحابي واصدقاءي تقول لي إنتي براك اكيد انت ماواعي!
أنا أكبر واحده في اخواتي واخواني وابوي جابني بعد ثلاثه سنه زواج وهسه بقيت البنت والأخت والصديقه لأبوي وأبوي ماكان بيرفض لي طلب وعِرف إني وقعت في شِراك وشرك الصداقه والأفكار الكعبه والحمدلله هسه ماعندي شي يخليني اخاف على نفسي لأني حقيقه مابراي معاي أصدقاء بيقدموا لي النصيحه وأسره متسامحه مع أخطائي الزمان ومتناسيه لسنين الطيش الكنت فيها!!وداعمه لفكرة إني أكتب واقول العايزاهوا في أي قضية بتهم المجتمع من دون خوف مادام هو صاح وظاهر للناس وشايفاهوا بي عينها كل يوم حولينا بس الفرق بيني وبينك إني أنا شجاعه وانت جبان ودافن راسك في الرمل زي ناس كُتار عامله ماشايفه وماسامعه
أوريك حاجه تانيه
أي فهم في رأسك في راسي وممكن أزيد ليك من الماعندك وللآن بجيب خارجيات وممكن عادي أصل معاك لأي مرحله لأنوا مرات كده في ناس لو ما أخدوا في رأسهم من فوق مابيستوعبوا إنهم مكروهين بالنسبه لي!! شيوعي ماتحاول تتظارف معاي كتير نسويه شوفي غيري أحسن!! حاتكلم كل يوم وكل ساعه وكل دقيقه وثانيه لحدي ما أموت!!
في يوم من الأيام حأطل على الناس عبر صفحتي وأقدم دعوه لكوب شاي والرهيفه التنقد!!
الصوره ليست لي ولكنها أعجبتني 🌹
تبيان توفيق ❤️
-
-
-
-
-
-
-
-
