العيكورة: البيان لا يكفي يا وزارة الخارجية ! (كلام يزعل لكن)

سفراء بريطانيا والنرويج والقائم بالاعمال الامريكي يغردون بخصوص اوامر القبض على وجدي صالح وخالد سلك على خلفية دعنا نسميها (اشتباه) بارتكابهم لقضايا جنائية ..(شفتو قوة العين دي كيف) ؟

دولة تعتقل اثنين من مواطنيها بموجب قانونها فما دخل هؤلاء الغرباء ؟

بيان الخارجية الذي اوردته بعض المواقع مازال بيان (يفتقر) لعكس قيم هذا الشعب الذي يأبي الضيم والاحتقار بيان لسان حاله يقول (يا جماعة تاني ما تكرروها) !

البيان وصف المغردون بافتقارهم للياقة والحصافة الدبلوماسية ! (بس كده) ! ورغم ان العبد لله لا يفهم فى الخطوات الواجب اتباعها فى مثل هذه الحالات لكن (على الطلاق) اقلاها كنت بستدعيهم واذلهم ذلة الكلب وبى اصبع السبابة كمان .. سيبك من يفتقر للباقة والكلام الخايب ده . ياسيدي هذا اسمه تدخل فى الشأن الداخلي واسمه عدم الالتزام بمقرارات روما التى تضبط اسس وقواعد التعامل الدبلوماسي داخل الدولة المضيفة . يا سيدي هذا التصرف يعتبر (قلة ادب) تستوجب تسليم مذكرة رسمية شديدة اللهجة ان لم يكن الطرد مش عبر الاعلام (الخارجية تستنكر) ! يا جماعة لمتين نحن حا نبقي فى الملطشة دي .

قبل تكتبوا بيانكم ده يا جماعة ارفعوا السماعة على البرهان واللا الكباشي واللا غيرهم العساكر ما قاعدين يرضوا الحقاره دي ! البشير هل كان دبلوماسيا؟ ما كان بطردهم ليك زي الما حصل شئ

سيادة الفريق اول البرهان (حفظه الله ورعاه) . اااي ونختها بين قوسين كمان كيتا كدي فى القحاته يا سيدي الكلام ده ما بنفع الخواجات ديل لازم يعرف حدوده و (بالغانوون) و وفقا لمواثيق الدبلوماسية الدولية .

زيارات الليل وشراب الشاي وقعاد البنابر وعرفناه كمان جابت ليها تدخل فى شغل النيابة و العدل؟ يا عمك اكرب القاش شوية حبتين وشغلك داخلي ماشي كويس لكن كمان البعثات الدبلوماسية عاوزة ليها (قرصة) .. يا السيد البرهان انت زول شمالية وعارف التمر البركاوي النااااشف داك فدحين ياخي جيب ليك شوالين تلاته ختهن فى القصر بنفعوك لى جنس التدخل السافر ده .

قبل ما انسي :—

من يحرس عرين الاسود لابد ان يكون اسدا ويا الخارجية السودانيين اسود .

صحيفة الانتباهة