تعرف على اشهر طرق الاحتيال والنصب عبر تطبيق بنكك

2022/02/03

صديق مقرب جدا لي …اتعرض لعملية نصب و احتيال …عن طريق تحويل بنكك…
.
هو اتنصب عليهو في مبلغ 100 الف …و بطريقة بدائية شديد … يا فلان انا عندي كاش داير بدلو بنكك …حول لي و بجيب ليك القروش هسي كاش …صحبي حول ليهو … و الزول ما جاب الكاش ..وقفل تلفونو…
.
لكن الموقف نبهني لموضوع داير اتكلم عنو لي فترة
.
شوف انت ممكن يتنصب عليك في بنكك بأربعة درجات
.
تلاتة منهم اساسا مافي قروش بتنزل في حسابك … و الدرجة الرابعة القروش فعليا بتنزل في حسابك
.
.
الدرجة الاولى انو الزول يقول ليك حول لي و بجيب ليك ..وتحول و ما يجيب ليك او يطلع زول غلط وانت ما بتعرفو
.
طيب في الدرجة دي البيحصل انو المجرم بكون مركز مع زول يكون في حالة استعجال او حماس او خوف على المستلم ..او علم بانو المستلم حاليا مافي طريقة تواصل معاهو … او اي نوع من انواع الضغط النفسي
.
كمثال …
.
يتصل عليك زول يقول ليك ابوك في المستشفى عمل حادث هسي و دايرين ندخلو لكن ناس المستشفى قالوا الا يستلمو القروش اول …بديك رقم حساب حول فيهو و تعال حصل ابوك… المجرم في الحالة دي ممكن ببساطة يكون لقى راجل كبير …سرق تلفونو …فتش رقم بيتصل بيهو كتير و خمن انو ده الابن او البنت … و اتصل من تلفونو هو ما من التلفون المسروق…. فانت اول ما تخاف حتبقى بتتصل على تلفون زولك و اكيد ما حيرد …لانو التلفون في يد المجرم … حيكون شايفك بتتصل و ما يرد ليك… و حتحول المبلغ المطلوب …. و حيكون قام بالتلفون و المبلغ …. و ابوك حيجي راجع العصر يقول ليكم كفرو لي تلفوني اتسرق قبيل في شارع الدكاترة …
.
او يتصل عليك زول يقول ليك انا في المطار و شايل امانات (هدايا) جايبها ليكم من (محمد) من الامارات و هسي ماسكيني في الجمارك قالوا ما بفكوا ليكم الهدايا دي الا جماركها تتدفع … جماركها بتعمل المبلغ الفلاني …
حيتكلم معاك باعتبار انو مستعجل …حيقول ليك عاين لو القروش مافي خليني انا امرق اتخارج من المطار انتوا تعالوا خلصوا حاجاتكم براكم انا وراي شغل كتير …. و طبعا الحركة دي عشان انت ما تلقى زمن تتصل بكل المحمدات الفي الامارات … و تقول شنو يعني لو حولتا 40 امبوك عشان يخلصوا لي شاشتين 65 بوصة و لابتوب ….
.
الدرجة التانية انو يمشي بالفوتوشوب يشتغل اشعار وهمي … و يفتحو ليك في الشاشة ..عشان انت تصورو او هو يرسلو ليك واتساب..
.
في الدرجة دي من النصب المجرم بقوم بعدل اشعار حقيقي بتاع امبوك … (سواء كان اخضر ولا ابيض انا ما عارف الفهم السودانيين انو الاشعار الابيض ما بيتزور لكن الاخضر بيتزور دي منو ) … المهم بمعلومية اسمك و رقم حسابك بقوم بزبط اشعار …
.
عادي بكون اشترا منك حاجة قبل كدة او حول ليك قبل كدة و حفظ الاشعار الحقيقي …الفيهو اسمك الحقيقي و رقم تلفونك الحقيقي …
.
يعدل حتة المبلغ و الوقت بس … و يجيك يشيل منك حاجات عارف مسبقا انو سعرها حيكون كده ….او يطلب منك بنكك بي كاش … و يطلب منك المبلغ الهو مزبطو في الاشعار تحديدا ….
.
مرة في بتاع سوبرماركت كيفني شديد … قلتا ليهو داير لي 6 الف كاش اديك ليها امبوك … لمن حسبها ..عاين لي كده قال لي في 500 قاعدة هنا مجهجهاني هاك شيلا معاك حولها 6ونص بالمرة …. ههههه طبعا معلم
لو انا جايي مفبرك اشعار بي 6 الف حيكون ختاني في فتيل ..
.
الدرجة التالتة انو يكون مصمم تطبيق (محلي) في تلفونو ..في اللوكال هوست…
في الدرجة دي من النصب المجرم بيديك التلفون في يدك يقول ليك هاك حول لروحك …و بكون واثق شديد بخلي ليك التلفون و بيعمل فيها لسة بيشتري في بضاعة او بونسك بموضوع تاني.. و انت تمسك تلفونو بي يدك و تدخلكل البيانات بما فيها المبلغ و تدوس (تحويل) و تجيك شاشة الاشعار (الهو مجهزو مسبقا باسمك و رقم حسابك الجايبو من اشعار حقيقي) … و ممكن تعمل للاشعار سكرين شوت و ترسلو لروحك ..
.
طبعا لمن انت بنفسك التعمل كل الخطوات دي حتكون واثق كل الثقة انها اتحولت …
.
و طبعا الطريقة دي ما بتتطلب غير انو الزول يكون بيعرف يصمم تطبيق …. و دي حاجة ساهلة شديد …و بيعملو بيشبه بنكك تماما من حيث الشكل … و يكون عارف اسمك و رقم حسابك مسبقا ( الممكن يجيبهم من اي اشعار حقيقي سابق )
.
يلا التلاتة درجات من النصب الفوق ديل …. كلهم حلهم انو انت ما تشتغل بموضوع هو يوريك شنو او يرسل ليك شنو … افتح تلفونك …افتح بنكك من عندك انت و اتاكد انو المبلغ نزل ليك …بلاش كلام كتير و اشعار اخضر و اشعار بمبي و رسالة sms و كلام كتير
.
الدرجة الرابعة …. زول يجي يشتري منك حاجة او يشيل منك كاش بي بنكك …
.
و يحول ليك القروش و تنزل في حسابك فعليا
.
بعد يومين تلقى المبلغ اتسحب من حسابك
.
و باختصار البكون حصل انو بكون مشى النيابة طلع عريضة انو حصل تحويل بالغلط …
.
و طبعا دي ثغرة فيها بل تقيل و بتتضرب بيها مبالغ كبيرة شديد …مع انو حلها اسهل من ساهل …
.
يا مؤمن …شفتا الخانة بتاعت (تعليق) او comment التحت دي …. اغلى من الدهب …
.
ما عليك غير تكتب فيها اسم الزول الداير تحول ليهو و بغرض شنو….
.
يعني انت مشيت لزول اسمو عبد العظيم محمد احمد ..اشتريت منو عربية …
حولتا ليهو 4 مليار بي بنكك ..
تقوم في التعليقات تحت تكتب …
محولة لعبد العظيم محمد احمد بغرض شراء عربة رقم اللوحة ……..
.
محولة لاحمد يوسف بغرض شراء هاتف iphone ( و العياذ بالله).
.
محولة لبابكر صاحب بقالة المهندس بغرض شراء مواد تموينية
.
محولة لعلي صاحب الكشك لاستلام مبلغ كاش بدل التحويل بنكك
.
دي بتأمنك تماما من الطريقة الرابعة من طرق النصب
.
باختصار ….
.
ما تشتغل بالاشعار …اشتغل بانك تفتح حسابك تشوف التحويلة نزلت ليك ولا لا … حتى بعداك تسلم الزول الكاش او البضاعة
.
ما تحول لزول انت ما بتعرفو من غير ما تملا خانة التعليقات