الجداد الحكومي وصل مرحلة بطالة.. أظنها مرحلة اللاعودة.. المطالبة بالعدالة بتوترهم.. المطالبة بعلاج المصابين بتكدرهم والسؤال عن المفقودين بيهيجهم .
اي شي هو مؤامرة ضد الحكومة الحلوة.. أي نقد هو شر مطلق.. تفتح خشمك شيوعي ماشيوعي تاخد عدد واحد شيوعي مثير للفتن متاجر بالقضايا وستين جزمة على دماغك .
التحول الغليظ البيحصل للناس ديل دليل فصيح انو الحرس الحكومي الإلكتروني ماصناعة انقاذية بس صادف زمن الإنقاذ زمن السوشيال ميديا.. هي ناس بتتحول تدريجيا مع كل نظام من بشر لي كائنات حرفتا التبرير والحوامة بي عبارات جاهزة تترص في أي بوست..وأغلب الظن انهم معتقدين انو ده واجب وطني خالص كما كان سلفهم جداد الإنقاذ يعتقد.. فماكل جداد الإنقاذ كان مدفوع التمن كتير منهم ظن أن ذهاب الإنقاذ هو شر وانو تقعد بي عوارا احسن من يجوا غيرا.. فبين الدفاع عن الامتيازات وسيف الساموراي الذي يقتل أعداء الوطن بيتكاثروا اخوان بيجو ديل.
ألا تشعرون بالذعر من الدور ده..؟
يعني تدعم الحكومة الانتقالية بي انك تتحول للحاجة العجيبة دي؟ والحكومات بتجي وتمشي لكن انت بترجع لي رقبتك كيف…؟
ربنا يرفع عنكم البلا ان شاء الله
ولاحول ولاقوة الا بالله
د. سارة حسبو
-
-
-
-
-
-
-
-
