] ظروف سواءً كانت مقنعة أم غير مقنعة.
] أدت لتعطيل المدارس.
] وضجت البيوت بالطلاب.
] فاضت الشوارع تلاميذ.
] ضاقت الأسر(برغم الضيق اليابا صديق)
] وغنت البيوت مع عقد الجلاد يلا يا أولاد المدارس.
] وفتحت المدارس .
] حبن غارز.
] فتحت بعد زمن طويل وألم كثير.
] بعد لبخة حلبة ومر حجازي.
] فتحت.
] ولكن هل فتحت بقرار مدروس.
] أم فتحت خجلة من إعلان تجميد العام الدراسي؟.
] ناس الأساس للصف التالت يمشوا سبعة يرجعوا حداشر.
] ومن رابع لي تامن يجوا حداشر ونص ويرجعوا واحدة ونص.
] الكلام ده كان ممكن يحصل زماااااان.
] لما كان القبول بالذات بمدارس الأساس بكون جغرافي .
] يعني أولاد الحلة بقروا في الحلة.
] لكن هب أن لديك ولدين بس .
] واحد في تاني وواحد في سابع .
] وأنت ساكن أمبدة وأولادك بقروا في الملازمين.
] وهب أنو عربيتك مليانه بنزين.
] لأنو لو أشركتهم في ترحيل بتكون داير ليك تلتين الف شهرياً للواحد.
] الأتنين بستين.
] وأنت ماهيتك طمنطاشر بي مية بشة.
] أكيد حاتفتح للترحيل وترجع لخيار تنك عربيتك المليان.
] تودي الصغير وترجاهو.
] ترجعو حداشر ونص وتودي الكبير وترجاهو.
] ترجع الكبير واحدة ونص تصل بيتك أربعة من فرط الشوارع الفي الحفر.
] موش من فرط الحفر الفي الشوارع.
] لما تصل البيت أربعة تغديهم شنو؟.
] أنت مامشيت الشغل يتغدوا كيفن عاد؟.
] وإذا سقتهم سوا وخليت الكبير بره المدرسة والصغير دخل المدرسة .
] وأنت مشيت شغلك.
] على أساس الصغير يطلع ينتظر بره المدرسة. والكبير يدخل المدرسة على بال ماأنت تصل.
] ومع مانسمعه عن إجرام بالذات في حق الصغار.
] بالتأكيد مافي داعي تجيء راجع.
] أنا ماعارف.
] لكن الوزير عمل فينا غلوتية المرفعين والقش والخروف.
] وداير تقطعهم النهر.
] والمركب مابشيل معاك غير واحد منهن.
] تشيل معاك القش.
] ترجع تلقي المرفعين أكل الخروف.
] تشيل المرفعين ترجع تلقي الخروف أكل القش .
] ولو عملت فيها شاطر و فكرت تشيل معاك الخروف.
] وترجع تشيل المرفعين.
] ختيتو بهناك وتجيب معاك الخروف راجع.
] تودي القش وترجع تشيل الخروف.
] موضوعك برضو بايظ.
] لأنو أول ماتودي الخروف بهناك.
] ترجع تلقي بتاع موتر لفح المرفعين والقش وشتت.
] لكن حلها كيف بس .
] هكذا يكون سؤال الأسر.
] علم مجهجة ولا جهل يوفر سلامة شفع ؟.
] المهم .
] أخبار الكورة شنو؟.
] الكورة البتشبه الكورونا؟.
] هل نحن مصرين لسة أنو عندنا أندية كبيرة.
] ونحن نبحث عن من يستطيع أن يدفع تسييراً للنادي.
] بصراحة .
] أنديتنا خرفت لكن لسة ماكبرت.
] أيها الناس.
] إن تنصروا الله ينصركم.
] أها .
] نجي لي شمارات والي الخرتوم .
] البقت بقت يا والينا.
] والفيكم أتعرفت والفينا.
سلك كهربا
ننساك كيف والكلب رقد وناااااام .
وإلى لقاء .
سلك
صحيفة الانتباهة
