الانتباهة او لاين
الرئيسية/على مدار الساعة
السودان: بابكر سلك يكتب: الفيفا أم حمد
ديسمبر 20, 2020
سلك
] الفيفا تدعونا لرأب الصدع
] ولم المكونات المريخية لاجل حل الاشكاليات
] وخارطة طريق للحل
] و… .و… .و
] وحاجات البعض يسميها قرارات
] والبعض يسميها موجهات
] والفيفا تسميها مقترحات
] وواحدين اكدوا ان الفيفا جابت 151 مخالفة في النظام الاساسي
] وواحدين قالوا خمسين بس
] وجاط راس محمد احمد المريخي
] لذا قفزت على رأسه اسئلة
] هل الفيفا قالت بالواضح الما فاضح الغاء نظام 2019 ودعت لجمعية عمومية لاجازة النظام الالغتو؟
] ولا جابت سيرة الجمعية العمومية في الحتة بتاعت في حال ادخال مقترحاتها في النظام الاساسي؟
] وهل اذا الغت 2019 قالت الساري 2008 ؟
] وهل عندما طالبت بارسال نظام المريخ الاساسي تم ارسال 2008 ليها؟ وليه؟؟؟؟
] وهل مقترحات الفيفا من ضمنها تضمين مادة تلزم النادي بتسجيل علامته لدى الهيئات المختصة في بلدو ؟
] وهل الفيفا عارفة انو الحتة دي ما ضرورة لانو المريخ اساساً مسجلها من زمناً بدري؟
] وهل من ضمن المقترحات تعديل مسمى لجان الحوكمة لمسمى لجنة الحوكمة؟
] طيب لو كان بالعربي مكتوب لجنة الحوكمة منو الكتب بالانجليزي لجان الحوكمة؟؟؟؟
] وهل هذه هي الـ151 مخالفة بتاعت النظام الاساسي؟؟؟؟؟
] وهل قام الاتحاد بارسال قرار لجنة الانتخابات المنتخبة الاخير والذي تسلم منه صورة مترجمة للفيفا ولا ما رسلو؟؟؟
] ولا ما رسلو ليه؟؟؟؟
] وهل الفيفا عارفة كده ؟؟؟
] وما هي خارطة الطريق ان لم تكن هو ؟؟؟؟
] وهل الفيفا جابت حل ولا معنى كلامها انو موضوعكم ده حلوهو جوة بيتكم وفقاً لنظامكم الاساسي الساري ؟؟؟؟
] ولا الفيفا قالت الكلام البنشوفو في الميديا ده على شاكلة 151 مخالفة؟
] ان بقى كده
] تبقى الفيفا الفيفا أم حمد
] اخت البصيرة أم حمد بت ابوها
] بس ديك امها مشلخة ودي امها خواجية
] ولكن السؤال المهم
] ليه الاتحاد ما عين لجنة للمريخ يا حلفا ؟؟؟
] اقصد يا فيفا
] والملاحظة الاهم
] انو الفيفا ما جابت سيرة 2008
] يا ربي سقط سهواً ام سقط واقعاً؟؟؟؟؟
] محمد احمد المريخي تعب شدييييد
] المهم
] أمس وافق عيد الثورة
] ووافق ذكرى اعلان الاستقلال بالبرلمان
] فهل نحن نشرف الوطن الذي اعلنا استقلاله سنة 1955؟
] وهل نشرف الوطن الذي ثرنا من اجله قريب ده ؟؟؟؟
] وطن بعزو باقي مكانو في جوة المآقي
] صحيح فقير ريو السواقي
] بس مكانو في نفوسنا باقي .. وبجهودنا حايبقى راقي
] ايها الناس
] ان تنصروا الله ينصركم
] اها
] نجي لي شمارت والي الخرتوم
] قالوا يا والينا
] قافلين الكباري علينا
] كان اخير يا والينا
] تقفلوا الكباري الاتعملت فينا
] وتقفلوا معابر تهريب دقيق الفينا
] العيشة بقت زي الاستوبة يا والينا
سلك كهربا
ننساك كيف والكلب قال الجلافيط للكلاب والعضام قدام الباب واللحم للبيتو عالي ما بتخبت ليهو باب
والى لقاء
سلك
صحيفة الانتباهة
