خطرفات من وحي حريقه😅
اول شي ما فعله (حريقه) المصيبة يستوجب الحساب العسير من سجن وجلد والنفي من كل (الاسافير)😡
وللما عارفين..الولد حريقه سجل رقم قياسي في الحبكانة وكان بحب ليهو 45 بنت في نفس الوكت..وللاسف كمان فيهن عدد من اسرة واحدة😳😰😡
ولما كان التعليم عن بعد في زمن الكورونا قلنا نجرب الطب الشرعي والتشريح لحريقة عن بعد:
– اول شي يجب ان نقر ونعترف بأنو حريقه عندو حنك سنين جدا وقدرات في الكذب غير مسبوقة ومقدرة على التلون وهو من فصيلة(الرخم)..لذلك(حريقه لمجلس الشركاء)😎
ـ أكيد حريقه زول (عاطل وشفاتي وقاعد ساي).. لأنو فاضي وعندو جدول مناوبات للجكيس يومي على راس الساعة لكل البلي من الصباح للمساء ولا بد يكون عندو تمويل اصغر او (نثريات مكتبية معتبرة) تعينو على تفعيل انترنت 4G غير محدود واتصال محلي ودولي..وامكن عزومات اسكريم وعضة وفارهات بوقودها تحت اليد..والذي منو..اذن(حريقه للسيادي)😎🙈😂
ـ ثبت بما لا يدع مجال للشك قدرة حريقه على التلاعب بمشاعر الناس.. والايحاء لهم بأنه كفوء وخبير وقادر على تولي المسئولية والشراكة المستقبلية في البناء والتعمير والعمل في (تناغم) والعبور مع الشركاء مهما تتعددوا..اذن (حريقة لمجلس الوزراء)🤪😎
عشان كده نغني ليهو..(دنيا غيرك يا حريقه..أصلي ما بقدر اطيقا..)😅
# (اعلموا يا قوم..لو كبُر هذا الفتى ليكونن اعجوبة زمانه)🤪😂
بِسس يا حريقه😏😅
* تعديل: يعني معقول تشرح لبعض الناس انو دي استعارات كوميدياء سوداء للواقع السياسي… دي مصيبة شنو دي😏
بقلم
د. علي الكوباني
-
-
-
-
-
-
-
-
