اثارت الحلقة الاولى من زاويتنا (العرسة التانية مهمة) والتي قمنا بنشرها الجمعة الماضية ردود فعل واسعة وسط الجنسين إلا انه كما توقعت أغضبت الجنس الناعم جدا وتركت اثرا سالبا وسطهن ولهن العتبى ولكن الدعوة للزيجة الثانية لم تأت من فراغ ياحبيباتي ولكنها أتت نتاج ما نشاهده الآن من مفاسد المتهم الاول فيها الرجال المحصنين ثم العزابة وطبعا العزابة ديل أخف ضررا من المتزوجين ديلك خطيرين مرة واحدة، وبالله الراجل زاتو البنات مايعاينن ليهو إلا لما يبقى متزوج ومسئول وطبعا بيعاينن ليهو ليه لأنه بيكون قدم نموذج حي ومباشر كرجل متزوج وقادر على ادارة منزل وزوجة واطفال وكدة طبعا .
وبعدين قلنا رجالنا عليهم جنس خفة زي شاي البكا والواحد فيهم لمن يمرن قصادو بنات تلقى عيونو زي عيون (الحرباء) يقلبهن يمين وشمال عشان يكشف كدة وكدة ويعاين فى البنيات ويتفرس ملامحهن دي صفراء ودي طويلة ودي قوامها مفصل ودي عندها وجنات تبكي ودي تغرود في عيونها وطبعا مع الاختلافات دي عمك يسرح ويطلق العنان لخيالو وطبعا ييوتات الخبرة والتجميل ما بتقصر ، بتلقى حقن للتبييض وفي تحاميل للتكبير لدرجة ان الواحد لمن يشوف واحدة ماشة لا شعوريا يلقى نفسو بيصرخ ويقول (تكبييييير) وبرضو كمان مختلف انواع العقاقير بمختلف المسميات ودواعي الاستعمال شي (٣٠) راكب وشي (الثورة بالنص) وشي اسمو (مفاجأة الجيران) وحاجة كدة اسمها مش عارفة إيه ودي كلللها رغم انها عقاقير ممرضة إلا ان بعض بناتنا بيستخدمنها لنيل إعجاب الرجال وهم طبعا بيكونوا شايفين وعندي قصص وبعرف واحدين كل اسبوعين بيدفعوا قروش الكريمات وعقاقير التكبير ومستحضرات التجميل اهاااا اقعدي لي انتي يا العاملة فيها ست البيت لمن تجي ستك (الشلابة) وخشمك يبقى ملح ملح وتسبي وتلعني في هاجر سليمان وانتي ماناقشة حنانك من الحاصل وانا بوريك وبعكس ليك وبس فـ (دحين) يابتنا يكون متزوج يعدل بينك وبينها بما يرضي الله ولا اخير يعربد برة برة ويديها كل اسبوعين (٦) آلاف و(١٠) آلاف ما يسمى حق الكريمات والمصاريف وانتي وعيالك يقول ليكم ماعندي وانا مفلس وانتي عشان تأكلي اولادك تشيلي وتاكلي في حنانك ومرة سخينة ومرة فول ومرة عدس وصحبتو ديك بيأكلها داك يا الفراخ لا وكمان بيشيلها العشاء لاهلها وانتي وعيالك بايتين جيعانين .
الفرق بينك وبينها انك انتي مسختي ليهو اي نعم في البداية حفى عشانك لكن بعد جبتي الاولاد خلاص بقيتي ما فاضية وست البيت المسئولة من النضافة والطباخة والضيوف، وخشم خشمين من شدة التعب هو ما لاقيهن معاك، وتقعي زي جنازة البحر آخر الليل تنومي لمن تشخري ده اساسا لو ماعندك رضيع بيكورك ويعمل ازعاج ويقطع ليك نومتك وطبعا الرجال مابحبو الازعاج وطبعا بينما انتي نايمة بيكون بعلك العزيز عامل نفسو بيحضر في كورة في التلفزيون وبيكون مساهر مع حبيبة القلب شي رسايل وشي مكالمات فيديو وهلمجرا ولمن يلاقيها بينساك وينسى حنانك لان ديك مدياهو الحنان والحنك والونسة ومافي (نجيغ نجيغ) دي طبعا صوت كواريك الشفع. والله المستعان.
فى حلقات الجمعة القادمات حنكتب ليكم عن الشلابات ومواضيع اجتماعية كتيرة ابقوا قراب ..
كسرة ..
ويا البتفتشن لرقم راجلي دايرات تشلبنو حبابكن عشرة بلا كشرة والله وبرضو انا قبلانة يعرس فيني.
هاجر سليمان – صحيفة الانتباهة
-
-
-
-
-
-
-
-
