شكله يا اخوانا العقل السوداني دا عبارة عن ملاح ويكة بس.
ياخ مقولة “لدينا ….. تعرفونها جيدا” دي أول زول قالا علي عثمان. انت كزول ثورجي بتكره الكيزان و علي عثمان بالذات البخليك تتبنى المقولة دي و تستخدما شنو ؟
مرة في واحد ناشط صاحبنا كدا اتعرض لسوء معاملة من عساكر و زعلنا ليهو شديد (ما في داعي أقول اسمه، و تاني ما ح أقول اسماء يا اخوانا عموما عشان الشتايم الناس بقت كعبة شديد ) المهم الناشط دا زول معارض و كاتب بوست مفترض بمنتهى الجدية و الغضب و هدد فيهو العساكر: لدينا لجان مقاومة تعرفونها جيدا !
ياخ لو انا كنت عسكري و قريت البوست دا ح افكها ضحكة طوالي.
حسي قريت بوست لصفحة اسمها ثوار بري الدرايسة اعتقلو منهم شباب الليلة و دي حاجة جادة شديد و بتزعل. كاتبين تهديد للسلطة مفاده لو ما فكيتو لينا المعتقلين لدينا شوارع و تصعيد ثوري تعرفونه جيدا !
يا اخوانا المقولة دي قالا على عثمان محمد طه. “لدينا كتائب ظل تعرفونها جيدا” و تحولت الى سخرية دي حاجة مفهومة. لكن كمان تتحول لى خطاب شبه رسمي و جاد و على لسان الثوار ؟ دي عدم جدية و الله.
و بتوري انو عقل السودانيين دا عبارة عن ملاح ويكة.
حليم عباس
-
-
-
-
-
-
-
-
