لماذا لا_أحب قحت
لا مسألة شخصية ؛ الامر الشأن العام دا ؛ الحكومة الفاتت والنظام ؛ قالو حرامي وابن ستين مصيبة ؛ ماشي ؛ أفشل من حكم ؛ طييب ؛ طير ووهم ..كويس ؛ فاسدين ..حاااضر ؛ ما ديمقراطيين ..ماف مشكلة ؛ منقادين لدول خارجية ماااشي ؛ غلو البلد طييب ؛ جابو البلاء والوباء . كوييييس ؛ اها جات قحت ؛ قلنا خلاص حنشوف دق كفر ؛ عجيب ؛ الناس ديل ما حرامية معناه اي مأكلة حتقيف ؛ وشطااار ؛ يا مان ديل تربية خواجات ومنظمات ؛ كفاءات اغلبهم جاي من بره ؛ معناه تفاكير خارج الصندوق ؛ وشغل إبداعات اكروباتي ؛ العدالة حتعم يا معلم ؛ والإقتصاد حيتصلح ؛ الناس دي زمان لو البشير قدم موازنة بطعظوها صفحة صفحة ؛ بكلام كبار كبار ؛ معناه وقت حكمو الدنيا حتكون درت ؛ تاني تعريفة تمش غير محلها ماف ؛ وفرة . دا غير الناس الحلفت حتحول بالبنوك ؛ وما بعرف الاتحاد الاوربي حيدينا كم والفيفا والكوديسا ولا سيكافا ما بعرفو ؛ ومافي تاني حزبي وحزبك ؛ وعودي وعودك ؛ وتاني حرب ماف ستة شهور واي زول حيجي يسالم ؛ وقالو ليك البشير كان راقد للسعودية والامارات ؛ وخارب وشنا مع الدول ؛ والابداااع ؛ الشعر حيرقد والإعلام حيتطور ؛ والطب والصحافة ؛ وحنبنيهوووو ؛ قلنا خير ؛ البلد ان نصحت وسلمت ما كعب ؛ وحرسنا البروفات ديل ! ست شهور اولانية ترتيب وتحسس ملعب ؛ ومجاملات ؛ ناس جاية من بره عندهم فواتح بكيات ومواجبات ! ست شهور تانية والقصة ما يااااااها ؛ شيلك اشلعك اطردك ! اقلعك كجم ساكت ! عااااك عااااك ؛ ديل كيزان فرتقو منشطهم ؛ عيييك عااااك ؛ ديل ما بعرفو دولة عميقة ؛ شااااك شنو والله شكلة في ولاية ؛ واااع شنو الشيوعيين الفي الحزب عندهم مشكلة مع شيوعيين مرافيد ! وااااك شنو بالله الحاجة دي بتزعل الامارات خلوها ودي بتحسس السعودية ؛ ودي بتضايق مصر ! الله الناس ديل ما قالو البشير باع ! شوية شوية ؛ ازمة اقتصادية اشد ؛ ياخ زمن البشير والله كان احسن ! لا ما احسن اصبرو شوية ؛ نصبر كيف ؛ زول حرامي ومحاصر دوليا وكل جهة في جيش تمرد وكان ببابصر ؛ ناسو بياكلو زي ما قلتو ؛ النيم بفجغو وممشين القصة ؛ اي بتعبها وصفوفها لكن ماشية ؛ هسة تعب وصفوف ومافي ! وين الحلول الاكروباتية ؛ صنننن ؛ وين النظريات صننن ؛ وين التحويلات صننن ؛ وين قروش الخواجات والعرب صننن ؛ طيب ناكل من الوطن ، وين الزراعة صننن ؛ وين الصادر صننن ؛ وين وين وين صننن ؛ طيب ما مشكلة الوزراء يبدعو ؛ صننن ! والحال وقف قرد ؛ تسد اكل عيشك تفرق ؛ تصوم تفرق ؛ تتكلم يشبكوك يا كوز ! اي ستة نفر منهم شافو منيم استلموه ؛ اي عشرة خمشو شطر ! طيب نباصر نصل الانتخابات والله كريم ؛ صننن ! لا قانون لا حزب دق ليه صيوان قال يا سودانيين تعالو اسمعو ! كل يوم تسمع التهاني ؟ في شنو والله جايينا مدير برنامج الغذاء العالمي وجايينا خواجة عنده منظمة شغالة في تاثيرات غاز الطبخ وطلح الشاف على النساوين ! سمح مرحب حباب الضيف ؛ تاني تهاني في شنو ؟ والله الامريكان قبلو العوض ؛ في شنو ؛ في اي كتلة المهم نتخارج ؛ سمح الله يسهل ؛ تاني تهاني في شنو ؟ والله عملنا برتكول تعاون مع منظمات حقوقية ؛ شغل كدا ما شاء الله ؛ يا جماعة الجماعة ديل بدونا رغيف وقرقوش ؛ بنطونا شاي فلت ؛ لا ياخ خليك عميق ؛ ديل ناس لمن يعتقلوك تقعد في كريسيدا ومحاميك يجيك يشوفك كل يوم غدوك جداد ولا سمك ؛ وحدك في الرج تلاتة يوم ؛ وحات الله انتو ما نصاح ؛ ياخ معمر موسى اظنو ممكن مع كاس العالم بتاع قطر ! لا ياخ خليك عمييك معمر موسى والقذافي شنو ! طيب سمح النسالكم ؛ هسة بالوضع الماشي دا انا كمواطن _خليك مريخابي ولا من حزب الخضر _ حاكون داعم عشان شنو ؟ اذا الجيتو بعده احسن منكم ؛ او بحساب تاني انتو زاتو ما فتوه بحاجة لو ما هو افضل ؛ ادعم عشان شنو ! زول يديني افادة مفيدة ! بدون غنا وشعر ؛ عشان شنو ؛ الجوع زاد ؛ الفاقة زادت ؛ الشظف والضيق والارتهان بالمناسبة الليلة اظن لينين وعفلق قامو من قبورهم جو دا غير الاجانب الكبسو الليلة تحت بند سري ومحظور يتعرف وايييييي حاجة ؛ كدي زول يجاوبني ! برضو صنننننن مش . طيب يا حضرات ..معناه ناسكم ديل مواسير _ ودي ما عاوزة صلعة _ وبكل المقاييس ؛ حصادهم صفر ؛ وصلعتي دي تقوم فيها نيمة لو عملو حاجة ولو بعد عشرة سنة.
محمد حامد جمعة
-
-
-
-
-
-
-
-
