كل شئ ينهار بسرعة.. الناس والحياة والقدرة علي الاحتمال.. انفلاتات امنية ونهب في الشوارع

تدهشنا هذه الحكومة كل يوم.. وتحبطنا.. من الذي يفكر لها وهل تفكر اصلا.. الا يعتقد هؤلاء اننا امام ازمة حكم حقيقية.. احيانا تسعر ان السؤال المنطقي هو ان تسالهم عن اسم الدولة التي يحكمونها.. هل يعرفون اسمها دع عنك التاريخ والجغرافيا وكيمياء مواطنيها.. هل يدركون اننا وصلنا الان الي مرحلة بتنا نخشي معها ان نصحو فلا نجد بلادنا..

كل شئ ينهار بسرعة.. الناس والحياة والقدرة علي الاحتمال.. مامن ضؤ في اخر النفق.. الاقتصاد ينهار بسرعة والحياة من حولنا تنهار وهم ولا هنا.. تستمع الي احاديثهم تتعجب منها ومنهم.. الكيزان الكيزان.. يا اخي الكيزان تطير عيشتهم وعيشتنا معاهم.. ديل شلناهم يا عالم ليهم سنة وقلنا حاكموهم وسلمناكم البلد..

جبتو خبراءكم واستلمتو.. البلد ماشة لي وراء سكتنا.. الدولة العميقة سكتنا.. قلنا نديهم وقت اكيد عندهم خطط وبرامج خصوصا في الاقتصاد والحكومة علي راسها اقتصادي.. لكن الاحوال مشت لي وراء.. محاصصات ومطاعنات وخلافات ولافي خطة ولابرنامج ولا يحزنون.. شوية دراويش لافين صينية.. البلد بتغرق وهو يقول ليك سنعبر..

تعبر كيف وانت من استلمت حتي الان كل الملفات العندك ماشة لي وراء.. معايش الناس شهدت تدهور خلال هذا العام غير مشهود.. الدولار سعرو زاد واتضاعف وماشي.. الكهرباء مافي.. غاز مافي.. بنزين جاز مافي.. خبز مافي.. دواء مافي.. كل السلع سعرها اتضاعف مرتين وتلاتة.. مواصلات مافي ولو لقيت السعر مضاعف مرتين وتلاتة واربعة..

انفلاتات امنية ونهب في الشوارع.. وحروب قبلية كلاشاته بره.. والحكومة التي فشلت في علاج الملفات وبشرتنا برفع العقوبات الامريكية والاوربية لم تجد في النهاية حل سوي رفع الدعم عن المحروقات والكهرباء ورفع الدولار الجمركي لتزيد معاناة المواطن.. تخبط وارتباك وهروب من المسؤولية ومن مواجهة هذا الفشل والاغرب انو بعد سنة لسه ماسكين في لبانة الكيزان والدولة العميقة وماعايزين يواجهوا حقيقة انو حصادهم بائس وبضاعتهم رديئة. قتلوا الاعلام واغلقوا الصحف والثقافة والفن والرياضة.. وقتلوا حياة الناس.

وحتي عندما خرج من صنعوا الثورة بدمائهم ووصلوا حمدوك امام مجلس الوزراء تمنع عليهم.. ابتعث لهم احد موظفيه ليخاطبهم ويستلم المذكرة لانو سيادتو مشغول.. اضحك مع حمدوك.. مشغول بي شنو.. البلد بتنهار وانت قاعد تتفرج.. شنو الاهم من انك تسمع صوت الناس الجابوك قايلنك حاتجيب الرايحة .. الناس الكان عندها ثقة انك الشخص المناسب للمرحلة دي.. صحيح انت سطتها بي عود.. واحبطتنا.. لكن حركة اليوم ماعندها معني.. كان ممكن تطلع تقابل الناس بدل ترسل موظف وترسل ليهم البمبان.. ده لو بنفع كان نفع البشير.. الان المظاهرات شغالة والبلد حاتولع.. وكالعادة حاتقعد انت والوزراء تناقشوا ملف السلام والتوقيع مع ياسر عرمان والمناصب الحاتدوها ليهو هو وجماعتو وتناقشو ترامب حايجي والا بايدن حايشيلو.. لاعيش لابنزين لاحروب اهلية لاعندكم شغلة بالكهرباء القاطعة ولا صفوف الوقود ولا الدواء ولا التضخم ولا المظاهرات..

اعتقد ان لجان المقاومة ادركت الان ان ماظللنا نقوله منذ البداية صحيح.. حمدوك هو علة هذه الحكومة ولن تستقيم الامور بوجوده.. هو الان ومنذ قيام الثورة حجر عثرة في طريق اكتمال التغيير وانجاز الاصلاح.. لا تثقلوا عليه.. الرجل اقل قامة من طموحات السودانيين.. والوثيقة الدستورية اقل قامة من طموحات السودانيين.. دفع الشباب ثمنا باهظا واطاحوا بديكتاتورية باطشة لكنهم سلموها للاسف لسراب يكاد يذهب ريحنا الان.

امير عبدالماجد