يعنى بعد حبوب (النجمة) و(الجيران إتفاجأوا) و(الزنك طار) الليلة لاقانى فيديو مقرف لى واحدة بتروج لى حبوب إسمها ( راجلي ما تطلقنى)!!!
وكلها سموم قاتلة بياخدوها البنات بزريعة زيادة الوزن وتحسين الأرداف والمؤخرة!!
بالله وين وزارة الصحة؟!
وين المواصفات والمقاييس؟!
وين الجمارك؟!
وين الأسر؟!!
ده موت بطئ وأكيد…
نفسى أعرف مستعجلات على شنو ؟…بكرة الواحدة تكوس الريجيم والتخسيس.
وزيادة الوزن دى يعنى السمح فيها شنو ؟.
موية تحت الجلد…فشل كلوى…سرطان… بشتنة…شكل غير متناسق….لزومو شنو ده كلو؟!!
كان الهدف إرضاء الرجال فدى مالطريقة المثلى…ولا أظنهم راضين بالخداع ده.
ياخ والله موضوع تراجع الوعى ده بقى مقلق..
وديل مفروض إنهن حيكونن أمهات ومربيات أجيال…
أتمنى كل المجتمع يتصدى للحكاية المؤلمة دى…
ويابناتى ويا أخواتى ماتستهترن بالعافية وما تعبثن بى خلقة الله…كفاية?
الله يحفظ الجميع ويكفينا شر تجار وتاجرات الموت.
بقلم
داليا الياس
-
-
-
-
-
-
-
-
