عمسيب: حلو المؤتمر الوطني امشوا شوفوا ليكم شئ ينفع البلد

أولاد المؤتمر الوطني بيرغوا ويزبدوا .. و الله لو حلو المؤتمر الوطني لتكونن ما عارف ليك شنو ..الخ

يا قوم .. المؤتمر الوطني ده لو حلوه ولا لو خلوه القصة دي أنتهت .. مسألة زمن بس يتصدع ويقع .. دي نواميس الكون .. انتو مش حسن البنا قاليكم لا تغالبوا نواميس الكون فأنها غلابة ؟ مش كده ؟

المؤتمر الوطني ده مشروع منهزم .. والاسوأ من كده انو أعداء المشروع بتاعو في أفضل حالاتهم في الأقليم و خارطة السياسة الدولية ..

أضافة لنقطة تانية مهمة .. عملة اللحظة السياسية الحالية هي قدرتك على حاجتين أما خلق المشكلات وأحتكار الحلول عندك وبالتالي منطق الحاجة بجيبك فوق وهنا المؤتمر الوطني ممكن يخلق شوية أزمات على الموجودة لكن ما عندو أي حلول .. أو قدرتك على أنك تحرك كتل بشرية ضخمة في الشوارع .. ودي المؤتمر الوطني فقدها للأبد ..

الي جانب شئ خطير جدآ اللي هو الشخص اللي أسمو غندور .. ذو النفس الليبرالي المهادن .. واللي هو أحد أكبر مساندي حمدوك على المستوى الشخصي .. وفوق ذلك فأنه بلا طموح سياسي وقد أستنفذ كل مع عنده مع الأنقاذ .. غندور ده ممكن بصفقات كبيرة يفرتق ليك الوطني ده طوبة طوبة ..

كان على الوطني أن يبحث عن الشباب لكنه اختار العجائز وقضى عمره كله حزبآ للعجائز .. والوطني وعندما أراد أن يبحث عن الشباب غطس طويلآ ثم خرج ليعين أنس عمر في أرفع المناصب و هو لواء أمن .. لواء وشاب معآ ولك أن تتخيل ..

حلو المؤتمر الوطني امشوا شوفوا ليكم شئ ينفع البلد

عبد الرحمن عمسيب