وهل لا زلنا جماعتك وناسك؟
ولسه حديثك بين جلاسك؟
ولا الواقع غير روحك.. ولوث حتى عبير أنفاسك؟!!
*
ما بتخيل يوم تتغير… أو تتحول عنى حواسك!!!
إنت ربيع العمر الزاهر.. ومهما تعلى بنفضل ساسك
وحبنا بفضل نور أيامك.. ولون أحلامك.. وضي نبراسك
وانت العيد العاد بالفرحة.. وعمّ الحلة رنين أجراسك
وانت النيل الفاض بي خيرو.. ونحنا المطر البروي يباسك
وانت الكنز الغالي علينا.. ونفضل جنبك زي حراسك
روحك جوهر مابتكرر.. ونحن بنعرف قيمة ماسك
كضاب الحاول يجهل قدرك.. وقال بي كلمة أهانك وداسك
تسلم لينا كتير يا ريدنا.. يسلم عمرك.. ويسلم راسك
عالي مقامك …وين أيامك.. ومين بالله النالك وحازك؟!!
ما بتخيل أنك تنسى… وأنا متأكدة من إخلاصك
**
وممكن أحلف إنى حبيبتك
وإني صديقتك.. وإني قريبتك
وإني الزول الواثق فيهو… بيفهم قصدك ويستر عيبتك
وإني بسامح دايماً وأغفر.. حتى ظنونك وشكك وريبتك
وإني خليلتك… وإني صغيرتك.. وإني حلالك وإني ربيبتك
وإني مهندس كل أيامك… وفي أوجاعك ببقى طبيبتك
وإني العشتا معاك الفرحة… وإني وقفت معاك في مصيبتك
وإني النور الضوّا ظلامك… وإني الأمل البدد خيبتك
وإني وحاتك ما بتكرر.. لا في حضورك.. ولا في غيبتك
وإني حبيبة عمرك كلو… صباك وشبابك.. وعجزك وشيبتك
***
وحاول أفهم عمق إحساسك
واعرف إننا أروع ناسك
وإننا ريدك وساسك وراسك
ومهما تبعد عني وترحل…برضك بفضل ياخي ملاذك
وبجري محل الدم في وريدك.. وبي تتحرك كل حواسك
سيب أوهامك وألحق نفسك.. أنا يا غالي شهيق أنفاسك
ودوني بتفقد معنى حياتك.. وبينطفي بالجد نبراسك.
# تلويح :
إذا كان لحبك عيد.. فأنا هلاله
[/JUSTIFY]إندياح – صحيفة اليوم التالي
