فى حوار مع الزميلة (سعاد الخضر) نشرته صحيفتنا أمس، قال الأمنجى السابق والقيادى بالحركة الاسلامية والحزب الحاكم ردا على سؤال حول مؤسسية الفساد فى الدولة: “مافى حاجة إسمها ناس الحكومة ديل فاسدين، ولكن حدث تغيير فى القيم السائدة فى المجتمع والمواطنين، أكثر الناس الأفسدوا الحكومة هم المواطنين، خاصة النافذين فى القطاع الخاص، الذين يفسدون الموظفين الصغار، لأنهم ليس لهم دخول تعينهم على قضاء حاجياتهم المعيشية، وأنانية الناس لها دور أيضا” !!
* عليكم الله شوفوا اللف والدوران والاستهبال ده .. الحكومة، فى رأى كبير الأمنجية السابق هى الموظفون الصغار الذين لا تكفى دخولهم لقضاء حاجياتهم المعيشية، والذين أفسدوهم هم المواطنون خاصة النافذون فى القطاع الخاص، و”ما فى حاجة اسمها ناس الحكومة ديل فاسدين” .. ده يقولوا عليو شنو ؟!
* يعنى الكبار جدا الذين نهبوا المليارات وتطاولوا فى البنيان أبرياء ومظاليم وما فاسدين، أما الفاسدون فهم صغار الموظفين الذين لا يستطيعون قضاء حاجياتهم لضآلة دخولهم، فمدوا ايديهم مقابل تقديم الخدمات للمواطنين، خاصة ناس القطاع الخاص ؟!
* طيب ياخى نفرض إنو كلامك صاح وانو الصغار هم الفاسدين موش الكبار، عشان مرتباتهم ضئيلة، وإنتو عارفين كده .. طيِّب ليه ما حسنتوا أوضاعم الوظيفية، ولو فرضنا انو ده مستحيل لانو الحكومة ما عندها قروش وما فاضية من النهب (الحكومة الحكومة موش بتاعت قطبى)، ليه ما حاولتو تجدوا حلول مناسبة وانتو حاكمين البلد ليكم 30 سنة كاملة، لحدى ما الفساد إستفحل وبقى فساد مؤسسى، ولمن سألوك منو قعدت تهضرب وتلقى بالاتهامات الجزافية على الموظفين الصغار، بتعميم مخل لا يجب أن يصدر من أى شخص ناهيك من مسؤول كبير سابق فى الدولة، وأكبر رأس فى جهاز الأمن فى فترة من الفترات، وله من الخبرات والشهادات أكثر بكثير من الـ (200 مليون ج) بالاسترلينى والدولار واليورو والليرة اللبنانية والليرة السورية التى سرقت من منزله قبل 7 سنوات !!
* افرض يا (قطبى) ان كل الموظفين الصغار فاسدين (زى ما قلت) .. ممكن تورينا النهب أموال البترول منو، أكتر من 100 مليار دولار فى عشرة سنين ما سويتوا بيها التكتح ممكن تقول لينا مشت وين .. وعشان ما تلف وتدور وتقول عملنا بيها كبارى وشوارع وسد مروى (السد السد الرد الرد) .. كل الناس عارفة إنو دى يتعملت بقروض خارجية وداخلية، ولحدى هسة ما اتسددت!!
* وما تقول لى جبتو بيها قمح لأنو إنو المواطنين هم البيدفعوا قروش القمح لأنكم ما بتوزعوا ليهم الرغيف مجانى، وما تقول لى دعم، والكلام الفارغ ده .. فأسعار القمح معروفة، والرغيفة بى كم معروفة، والحكومة بتاعتكم بتربح من القمح والبنزين والجازولين والأدوية كم معروف!!
* وما تقول إنو الدولار وصل السما وكل يوم زايد، لأنو ده من سياساتكم وفسادكم وتدميركم للمشاريع المنتجة فى البلد .. ياخى حتى البنية التحتية للبترول ذاتو عملتوها بقروض من الصين، وما سددتوها لحدى هسة، 6 مليار تكلفة مصفاة الجيلى كانت بى قرض من الصين، بأرباح مركبة، ليه .. ليه ما اتعملت من قروش البترول، مشت وين قروش البترول، وليه لحدى هسة اتفاقيات البترول سرية، وما فى زول عارف عنا حاجة .. !!
* وين مشت يا قطبى القروض الأخدتوها من الصينيين عشان تبنوا بيها مطار الخرطوم والسكة حديد وغيرهم، ولا بنيتو مطار ولا سكة حديد الواطة ولا اشتريتو طيارة ولا قطر، ولا أكلوها صغار الموظفين؟!
* أوكى يا قطبى، صغار الموظفين هم الفاسدين، وانتو حاشاكم .. القصور والفيلل والمليارات دى جبتوها من وين، وارثنها، ولا من المرتبات البتاخدوها من الحكومة .. أى زول عارف الحكومة بتدفع كم، وعارف إنكم لما اغتصبتوا السلطة حالكم كان كيف، والليلة بقى كيف، يا كبار المسؤولين العفيفين النظيفين!!
* بعدين ليه اخلاق الناس اتغيرت وحصل تغيير فى القيم السائدة فى المجتمع .. ومنو الغيرها وكيف إتغيرت، والسبب منو .. ولا الحكاية مجرد كلام، منو الدمر المشاريع والمؤسسات الوطنية الضخمة وشرد الناس من اعمالهم وخلاهم عاطلين بدون شغل وبدون دخل، أو حولهم لأعمال هامشية لا تغنى ولا تسمن من جوع، منو الألغى مجانية العلاج، منو الرفع كلفة التعليم والخدمات، منو الخاتى يدو كل الوقت فى جيوب المواطنين وأرهقهم بالجبايات، منو الكل يوم بيرفع فى الاسعار بكذبة رفع الدعم لمن الناس جابو الزيت وقالوا الروب.. وتجى تقول بكل بساطة أخلاق الناس إتغيرت .. إتغيرت يا قطبى كده بس مزاج؟!
* ياخى عليك الله أخجل .. أخجل، لو كنت بتعرف الخجل، وصدق من قال لو لم تستح فافعل ما شئت !!
صحيفة الجريدة
-
-
-
-
-
-
-
-
