حكى الطالب بكلية الصيدلة أحمد المجتبي والذي فجع رواد موقع التواصل الإجتماعي “فيسبوك” برحيله قصة معاناته مع المعرض والإهمال الذي تعرض له في سلسلة طويلة كشفت عن موهبته الراحل الكبيرة في الكتابة والسرد.
وبحسب تدويناته التي كتبها قبل رحيله وقرأها محرر موقع النيلين فإن أحمد المجتبي كشف عن المعاناة الكبيرة التي عاشها قبل بتر قدمه وبعدها.
وبدأ طالب الصيدلة التدوينة بعنوان “الأخطاء الطبيه حقيقه ؟ ”
دي ما مجرد عنواين بتطلع في الصحف و الجرايد و كلمات بتتكتب في منشورات !
دي قصص حزن و دموع و معاناة و حياة اسرة كامله بتقيف ، و مصاريف ماليها اول ولا اخر ، و تعب و سفر و سهر ، و مصائر ناس بتتغير ، من طالب مثلاً لمعاق . . و ما بتستاهل منكم كل الضحك دا و الهظار و الإستهتار و الإنكار دا ؟ و الردم و خوفي من الردم
دا انا نفسي و ما زول غريب ، و دي الجريده 2011 ودا عنوانها الصادم قدامكم ، الجريده غلطانه و الصحفيين غلطانيين و ستين غلطانين لانهم بكتبوا كلام عام ولانهم ما بفهموا في الطب و دا حقيقه و انا بعيب عليهم كدا ، لكن في دكتور مستعد يتعاون و يكون محايد و يشرح ليهم الموضوع بطريقه علميه ؟!
الصورة دي و الحوار دا اتأخدوا من جوه المستشفى مستشفى الخرطوم الكبير و العريق ، لكن ماف دكتور مستعد يدي تصريح ولا يوصف الحاصل !
قراية المقاله في الجريده دي ما حا تفيدنا حاجه ، لانه كلام عام ساي و كله غلطات في غلطات ، الرجل ما اليمين و السبب المباشر ما الزائدة و الدكتور نفسه ما كان غلطان بالطريقه الصورها الصحفي . .
القضيه في المحكمه اترفعت و ماشيه ، لكن ما ماشيه ! حاولت كتير مع ابوي و مع المحامي انه ننهيها و ننسى الموضوع و نسامح و تكون لي دافع انا و اعمل بنفسي و اجتهد ، لكن ابوي الوجعه بتاعته شديده ، كلم الدكتور في مرة ولدي دا رجله برجلك و رقبته برقبتك ! انا متأكد دا كلام ساي من ابوي و ما بعملها لانه راجل طيب و بسيط و زول بخاف ربنا . .
بالسنين وقف من شغله و اتغرب من بلد لبد و ملايين كتير اتدفعت ، ما ببالغ لو قلت الاتصرف قريب نص مليون دولار ! من سفر و تذاكر و عمليات و اقامه في مستشفيات و علاجات . . .
شنو الممكن يعوضنا عن دا كله ! و السنين و الدموع و الخوف و التعب و الآلم ماف حاجه بتعوضه . .
الحمدلله ، انا ما جاي اشكي و لا عايز اي حاجه لنفسي الصراحه !
انا بس حا اعرض ليكم الموضوع و عندكم الحريه الكامله تأخدوا منه الفايده لو شفتوا فيه فائده . .
السؤال ال في ذهنك الان و انت متأكد وينو هسي الخطأ الطبي ؟
اجابتي هو ما خطأ واحد هي اخطاء و ما من دكتور واحد هم دكاترة ، بالعشرات و في عشرات المستشفيات و في بلدان مختلفه !
قدر دا ! والله قدر دا
لمن التشخيص الصاح ما يتعرف و العلاج المناسب ما يتاخد و حالة العيان كل يوم بتسوء و مع كل إجراء بتعمل من الدكاترة ديل الوضع ببقى اكعب ، و فوق دا كله التشخيص كان متاح و كان بسيط و بسيط شديد و العلاج اسهل من الساهل ، دا اسمه شنو ؟ خطأ طبي ولا حاجه تانيه !
طيب الكلام العام و الساي ما حبابو :
في العام 2008 الم في البطن و فقدان للوعي حمة شديده ، مستشفى خاص ، عملية زائدة مستعجله ، انتهت العملية بعد اكتر من تلاته ساعات ، الزائده سليمه و ما ملتهبه ، لكن لقينا المصران متقيح و شايل صديد و إستأصلنا منه جزء و دي العينه و دوها المعمل نشوف الحاصل شنو . .
العينه ( نضيفه الحمدلله ) ، لسا العيان في المستشفى ، انابيب موصله من الانف بتطلع مواد تلاته يوم راقد في السرير ، الرجل ظهرت فيها حاجه غريبه محمره و سخنه منطقة الساق ( رأي الدكتور بتاع عملية البطن ، البطن دي تبعنا لكن الرجل دي جاتنا فوق للبيعه ) ، التشخيص : جلطه ، لا ما جلطه ، التهاب في الانسجه ، لا خراج ، المهم عمليه تاني ، نفتح و ننضف و نستكشف ، راحت فيها عصبه حصل طوالي Drop foot ، من يومها الرجل تاني ما شافت العافيه ، الجرح في الساق خارج عن السبطرة بزيد و يزيد ، اول حيرة لدكتور مع الحاله دي ، مضادات حيويه قويه ، ماف فايده ، تكاليف المستشفى كتيرة علينا ، خلاص نطلعكم البيت و تعالوا اعملوا الغيار هنا كل يومين ، مع كل غيار الجرح بزيد الانسجه ميته و الحاله بتصعب ، الدكتور السوبر بتاع كل حاجه ، اخيراً ، نحولكم لدكتور عظام يشوف الحاصل شنو ، دكتور العظام ماف جديد عنده ، بس الغيارات ، و الحال بيسوء كل يوم ، و مشي ماف ، و العيان الجى داخل برجلينه ، و لسا ما استوعب انه بقى معاق ، بشيلوه شيل ، بشيله ابوه و بيخته . .
مستشفيات كبيرة مريت عليها السلاح الطبي الخرطوم سوبا الجامعي ، اكبر مستشفيات البلد ، اكبر دكاترة البلد بمساعدينهم ، ما عندهم اي حل ولا تفسير للبحصل دا ، جروح ما بتبرأ بنعمل ليها كل حاجه و ماف فايدة . . كنت بدخل المستشفيات دي و بقعد فيها بالشهور ، و بنطلع اكعب من الاول ، سافرنا مصر ، المصريين بدورهم ما قصروا ! شغل شختك بختك و عمليه وراء عمليه والاف دولارات بتدفع و عملية ترقيع Skin graft بتتعمل و بتفشل ، و جروح زيادة ( إبنكم دا ماله ! حا يجينني خلاص )
من دكتور لدكتور و من بلد لبد و من محافظه لمحافظه ، نقنع و القروش كملت نرجع السودان . .
مقابله مع دكتور العظام ، يغلبه يقول الشايفه في الصور بتاعت الاشعه !
محمد في التهاب شديد العظم و تأكل في مفصل الركبه وماف حل غير انه نقطع ليك كراعك دي !
يا دكتور دا كلام شنو ؟ بعد كل التعب دا !
اي واللع ماف حل غير كدا ، و امشوا لكتور فلان جاي من المانيا ودي الورقه و شوفوا رأيه برضو ، و اسألوا في كم حته ، و فعلاً نفس الكلام سمعناه . .
الحاصل osteomilitis و حاجه في مفصل الركبه زي rehumatoid arthritis ، و اذا ختيت معاها الحاصل من التهاب كان في الامعاء و نتيجته نضيفه داك inflammtory bowel disease
و جروح مافيها infection و بعد كدا ملتهبه و بتزيد ! اها انت كدكتور هسب وصلتا لشنو ؟
الموضوع ظاهر شديد صاح ! و ضيف لكدا فحص الدم بتاع الCBC ببين دائماً انه نسبة ال lymphocytes زايدة شديد و في Lymphoctosis ، بس دكاترتي كانوا بفسروها بفسروها بالتفسير القريب ، انه الحاصل دا بسبب الإلتهاب ما بسبب حاجه تانيه . .
اتوكلنا و اقتنعنا و جات مواعيد عملية البتر ، مستشفى الخرطوم العريق اكبر مستشفى في البلد
الجراح ، رئيس قسم العظام نفسه ، اتعملت العمليه
و انا بتجهز للعمليه ، دكتور تاني بناقش دكتوري ، ليه ياخ نعمل له amputation ماف داعي ! مافي حل تاني و الولد لسا صغير ؟
دكتوري مصر انه لازم ودا الحل الوحيد و الاسهل و العملي ، عشان الود دا يرتاح و يشوف و يكمل حياته بعد كدا ، و الحقيقه قبلها مشينا السعوديه و عملنا فحوصات شامله قبلها و صور اسعة متطورة و بالالوان و صبغات معينه و كمبيوتر ، و كلمونا انه العلاج في ، لكن عمليات ممكن تصل لتسعه عمليات و ممكن تنجح او ما تنجح و بنوصي بالبتر ، و نرجع تاني لغرفة العمليه ، عيبي اني بعرف انجليزي كويس و دي كانت بتزعل دكاترتي الماعيزين زول يتدخل في شغلهم ، و بقولوا لي كل مرة ( دكتور انت ولا انا )
سألته ، الكلام البقولوا الزول دا رأيك فيه شنو ؟
قال لي سيبك منه ، انا مش دكتورك و بتثق فيني !
و الدكاترة كلهم مش قالوا ليك كدا ؟ طيب تاني مالك ! اهدأ وخلينا نشتغل ، سلمت نفسي و وصيته الوصيه الاخيرة ، طيب عليك الله يا دكتور ما تقطعها من فوق شديد ، اقطعها من هنا فوق الركبه طوالي كويس ؟ حاضر خلاص كويس . .
عمري كان 17 سنه ، لاحظت لحاجات كتييير و قريت في النت اطراف الموضوع ، قلت ليهم اسمعوا المضاد الحيوي دا قاعد يأذيني و ببوظ الجرح ! و المشكله من المناعه ؟ كلام غريب صاح ؟
قلت ليهم الكلام دا كتير ، لكن كل مرة كانوا بهرشوني و بطنشوني و بتعاملوا مع ظاهر الموضوع . . بعد عملية البتر تاني نفس المشكله من جديد ، جرح البتر ما بيبرأ و التهب و الخيط اتفك و جرح فظيع قاعد قدامنا ، و جلطه في الرئة حصلت و الدم اقل من ستين ، و دخلت العنايه المكثفه و نسوا الجرحه في العنايه المكثفه و اهتموا بالجلطه ، شفت هناك اهمال ما بتوصف ! كنت واعي وباقي العيانيين نايمين ، كل يوم كان بشيلوا زول ميت من جنبي ، شفت هناك دكاترة صغار في العمر ، شباب كدا . .
شفتهم بيخلطوا اليوم كلوا ! بيشغلوا بالنهار اغاني جعليه و الدكتور الجعلي بقوم يعرض و يبشر ، شفت الدكتورة الحلوة اليوم واحد ما هبشت عيان ، بتتشهى كل يوم و بتقول نفسنا في بيتزا نفسنا في سمك ، و بجيبوا الحاجات دي و بياكلوا ، و بالليل ، شفتهم لمن النور طافي بيتونسوا و يحبوا في بعض ! وسط الناس الميتين ديل . .
قلت ليهم عايز امي عايز اشوفها عايز اشوف ابوي قالوا ممنوع ، كوركتا و صرختا ، قالوا لي ماف فايدة ماف زول بسمعك ، الجرح المنسي كان قاعد يلتهب و الحمى زادت شديد زي الجمرة ، عايزين ينزلوا لي الحمه جابوا الهدوم اللونه ازرق و ريحتها كريهه شديد بتاعت ( جيمس ) بتاع النضافه الكان بجي يغسلني بعد مرات و مرات بسيبوني بوسخي لحدي ما يجي
جابوا هدومه دي و بلوها بالمويه و ختوها لي الدكاترة في صدري و بطني و تحت ابطي و عايزة تختها في رأسي ، بكيت شديد قلت ليها حرام عليكم ، ليه بتعملوا فيني كدا انا عملت ليكم شنو
ما لقيتي قطعه غير الهدوم دي !
قالت لي دي حتات معينه بننزل بيها الحراره و هسي بتنزل روق . .
لمن ازعل منهم شديد بقول ليهم حا افضحكم والله حا افضحكم و طلعوني من هنا سريع ، ناسي المتابعني بتاعين العظام شكلهم نسوني ! لا حس ولا خبر !
اليوم جمعه اخو الدكتور صاحب عمي ، جابوا لي الدكتور الكبير من بيتهم يوم اجازته ، اهلي عايزين يعرفوا حاصل علي شنو ؟
جا الدكتور ، كان هايج شديد ! شاكلهم شكل شديد
عيان دمه ستين و طالع من عمليه وجرحته سايبنها تعفن ، و ما بتجوا تشوفوه ! الزول دا لو حصل له حاجه انا بحملكم المسؤوليه كامله !
و يلا طلعوه لي من هنا سريع بلاش كلام فارغ معاكم . .
كنت زعلان اني فهما انه وضعي باظ شديد ، لكن كنت فرحان اني حاكون مع امي و ابوي و الكابوس البشوفه في الانعاش دا خلاص انتهى . .
كنت بدخل في الاسبوع غرفة العمليات مرتين للنضافه مرت اسابيع وماف اي فايدة الجرح جاب دود !
و انا في المستشفى ياناس
بجي نائب اخصائي العظام ، بقول دي حاجه غريبه
لكن حا نعمل كونسلت طبي و نجتمع كلنا مع اخصائيين الدم و الجلديه و المناعه و ناس الإنفكشن
و نشوف الحاصل شنو ؟
و جاء اليوم المفروض يجتمعوا فيه ، و مستنين بفارق الصبر ، جاء داخل النائب براه ، و الله ما قدرنا نلمهم الناس ديل . . !
ماف اي تحسن ، عيد الضحيه قرب ، جا الاخصائي
قال لي : شوف يامحمد انحنا عملنا معاك كل حاجه و جربنا اي شئ ، و خلاص الدنيا قبائل عيد ، و انا عملتا ليكم خروج ، تطلعوا هسي و تعيدوا تنبسطوا و تجوني في العيادة بعد العيد ، و ما تأخد ولا حبه ، كل علاجاتك تقيف ، حقن السيوله و المضاد و كله ، بس دا مسكن كتبته ليك للالم ترامادول . .
طلعنا البيت و الممرض بجي يغير لي ، و انقر شنو ؟
تحسن كبير لمن ما مصدقين سبحان الله ، لمن رجعت له بعد العيد اتحير . .
عشان ما اطول عليكم و اجيب من الاخر ، مشينا الإمارات زيارة و الحال هناك ما اتغير نفس المشاكل و حصل ابسيس كبير شديد ، و دخلت الطوارئ و عمليات و علاجات ، لكن الفرق هناك ، قلت للدكتور ود الحلال نفس الكلام ( بتاع المناعه و المضاد الحيوي ) الكلام الكانوا بستهتروا به في السودان ، اخد كلامي بمنتهى الجديه ، بعد ما استعمل معاي اقوى المضادات الحيويه و احدثها و ماف نتيجه ، و ختاني طوالي في علاجات مناعيه زي immunoglobulin و عمل الماقدروا يعملوه في مستشفى العاصمه ! اكبر مستشفى في بلدنا البنبكي عليها عشان عايزين يزيلوها ، استدعى كل التخصصات تقريباً و بعد يومين اجتمعوا كل الاخصائيين و كل زول طلب فحوصاته ، و جاني راجع
يا محمد انت صاح
في مشكله في المناعه بنسميها مناعه ذاتيه تبع الجلد تبعك
و فعلاً المضاد الحيوي ممكن يزيد القصه . .
. .
و هسي انا كبرتا و اتعلمت سنه واحده بس و بقيت عارف انه الكان حاصل كان عبارة عن Autioimmunity ، و المضاد الحيوي بالذات البشتغل على ال Bacterial cell wall synthesis و بالذات لو كانت سالبه الجرام ، حا يتسبب انه في مواد في جدار الخلايا دي و المواد دي cytotoxic تطلع و تعمل بهدله شامله و تفعيل للمناعه الاصلاً هي Defect ، و انه بالتحديد الحاصل في الجلد عنده اسم و معروف في كل العالم ايوه صاح نادر ، بس موجود ، صنفه الكبير Auto inflammatory disease و بالتحديد neutrophilic dermatosis و بالتحديد اكتر pyoderma gangrenosum
و ليك تتخيل معاي علاجها بسيط قدر شنو ؟
Immunosupressant agents
و بالذات كورتيزون 40 او 30 ملجم و الموضوع و وفق لكل المصادر و المراجع و الداتا بيسس و ال clinical trials حا يتحل بنسبة 99 في الميه و كل المشاكل تروح . .
لكن ، و معليش اقبلوها مني يا اصحابي ، دكاترتي ال بالعشرات المريت عليهم ديل و ال في السودان و برا السودان ، ما كان فيهم دكتور واحد فاضي انه يفتح النت بس و يخت الاعراض مع بعض ، و يطلع بالنتيجه الصاح !
طيب انا هسي عايز شنو يعني ؟
في الاول خلوني اقول ما عايز شنو
– ما عايزكم تردموني ! عليكم الله ما تردموني
ولا تضحكوا في كلامي و تسمعوني كلام يزعلني و يتعبني شديد ، انا تعبت بما فيه الكفايه صاح
– ماعيزكم تظنوا اني ببوظ سمعتكم او بحقد عليكم .
– ما يجيكم احساس عشان انا صيدله بغير منكم و بحقد عليكم و عايز اطلعكم غلط ، لانه انا ذاتو الصيدله ماشفت ليها شئ ،انا يادوب خلصت اولى و ماشي تانيه . .
العايزه شنو ودا المهم :
– قصتي قدامك و مع اني اختصرتها شديد ، عليك الله اطلع منها بحاجه و لو بسيطه و كلم بيها معاك زمايلك
– خلوا المجال الطبي مكان احسن ، جودوا شغلكم ، طوروا معرفتكم ، اقروا كتير ، اتدربوا صاح ،اجتهدوا
استعيدوا ثقت العيانين فيكم ، العيان و اهلوا ما بكرهوكم و لا شايلين منكم ، بالعكس بسلموكم روحهم عديل ، وبس عايزين منكم إهتمام و تعاطف و قلب حار و جديه و إبتسامه و إنسانيه و كلمه طيبه
و تشخيص صاح وعلاج صاح و العافيه دي من ربنا اصلو ما بجيبها زول
– طب صيدله اسنان مختبرات اشعه تخدير تمريض
اتوحدوا اتعاونوا حسوا دائماً بأهمية بعض ، ماف زول احسن من التاني المشاكل و المطاعنات و الحزازات خلوها . .
– البيئه الظروف الإمكانيات انحنا ذاتنا ما بشر وزير الصحه
انسوها دي شماعات ساي والله و اذا باريناها عمرنا ما نتقدم
انا محمدالمجتبى 24 سنه ، صيدله المستوى التاني
زي ما شفتوا قصتي فيها حاجات كتيرة تتحكي ، و قصتي مع المرض لسا ما انتهت لانه مزمن ، ومن وقت للتاني بتعرض لهجمه وكل الامور بتجوط
لكن مواصل حياتي و دخلت المجال الطبي بعد صراع و تحنيس لإدارات الجامعات و النجاح براه بالنسبه لي ماكان كفايه عشان يقبلوني . .
ممتن شديد و بشكر ربنا على نعمة وجودي في المجال العظيم دا و بستغرب كيف في ناس ما مقدرين انهم بإذن الله ربحانين دنيا واخره.
بقيت ناشط اجتماعي و متابعني كتار و احلامي كتيرة
اولها اكون باحث طبي و نساعد في انه نصلح الطب و نلاقي لكل مرض و كل مريض احسن علاج
و ماف عيان تاني يمر بالمريت به انا . .
و باقي الاحلام انتوا عارفنها
اخر حاجه : عليكم الله ما تزعلوا مني طيب ، و اعتبروني صديق و نيتي سليمه و خلو تعليقاتكم ظريفه ( خايف والله اكضب عليكم )
و متردد شديد انشر و اكتب هسي ولا لسا
و مستحيل اكتبه و انشره برا القروب الطبي دا
، لكن العمر ما معروف . .
محمد عثمان _ الخرطوم
النيلين
-
-
-
-
-
-
-
-
