دا (تمهيدي) يا مرسي ؟

> تكون قاعد تحضر في مباراة ليفربول والارسنال ..يقوم الطبق فجأة كدا يجيب ليك مباراة الاهلي الخرطوم والاهلي شندي.

> في واحد من الجماعة قال لي (الطبق) بعمل كدا ..عشان (ترددات) الاهلي شندي والارسنال واحد.

> قلنا ليه كيف يعني؟.

> قال لينا موش الاهلي شندي دا بقولوا عليه (الارسنال).

> انتوا تعالوا هنا ..النسعلكم (سعال) ديكي.

> الهلالاب ديل اشمعنا (الاهلي شندي) دا وقت قالوا عليه (الارسنال)..ما في واحد فيهم قال ليه كلمة واحدة.

> سطر ما كتبوه في الموضوع دا.

> وقت المريخ قالوا عليه (العالمي)..الهلالاب ديل كلهم قاموا ..واعترضوا على الموضوع دا.

> كسروا ليك في (الوصيف) الاعمى شايل المكسر.

> اشمعنا ..وليه؟..وكيف؟..ودي ما بتجي.

> زي الزول المن يشوف ليه صينية اكل ..بشوف ليه اقرب شافع ويقول ليه : (اجري جيب ليك شطة من جوة).

> في ناس كدا.

> في (فهم) بتاع (شطة) سايد على هذا النحو.

> الهلالاب اعترضوا جنس اعتراض على حكاية (العالمي) دي.

> ديل ما فاضل ليهم إلا يمشوا (المجلس الوطني) ..ويرفعوا الامر دا للبرلمان.

> لكن انت يا سعد ود التومة ..حكاية (العالمي) دي ما فيها (مبالغة) شوية.

> عالمي في شنو؟.

> وينها كورتكم؟.

> كورة ناس الطاهر سادومبا دي (104) كتيرة عليها.

> وينها بطولاتكم؟.

> بطولاتكم (الوهمية) دي …القاطعنها من رأسكم…(ابوبكر كاكي) جاب ليه عشرات البطولات ..ما في زول قال عليه (العالمي).

> انتوا فاكرين الواحد لو حفظ ليه كلمتين انجليزي او حضر ليه فيلم امريكي ببقى (عالمي).

> عالمي في شنو؟.

> عالمي في الـ (12) شوال اسمنت النزلوها في النادي ..وعملوا ليهم (سور) وعلى كدا ..عاوزين يبقوا (عالميين).

> عالمي في شنو؟.

> عالمي في (لوري الطوب) الجابوه للاستاد ..عشان المقصورة.

> عالمي في شنو؟.

> عالمي في (سيكافياتكم) دي.

> وإلا في كأس الشارقة.

> وإلا في كورة الطاهر سادومبا ..الواحد لمن يعاين لي كورتو بقوم بي (حول) في العين.

> الطاهر سادومبا دا كورتو زي الزول الما حافظ رقم تلفونو.

> عالمي بي جمال الوالي رئيس طوالي.

> هو قالوا ليكم العالمية كدا.

> نحن في الحلة جنبنا محل اتصالات اسمو (العالمي)…لو عاوز تضرب ليك تلفون لي زول في الكلاكلة دي ..بقول ليك هذا المشترك خارج نطاق الخدمة.

> مرة شايل موبايلى في جيبي ..قمت ضربت تلفون لي نفسي من تلفون (العالمي)…اديني ليك (هذا المشترك خارج نطاق الخدمة).

> طبعا انا من باب الاحساس ..والتغول اللا شعوري عبارة (هذا المشترك خارج نطاق الخدمة) بتذكرني ليك بي (شيلميس).

> شيلميس دا محترف (اورنيك) طبعا.

> شيلميس دا مهاجم مرخص بـ (طرف) يمين.

> يا حليل زمن الهجوم البخمش.

> والله زمان المريخ دا كان فيه (هجوم) …جدعة التماس تشيل منها هم.

> الجدعة زمن ناس زيكو كانت زي (ضربة الجزاء) زمن ناس باسكال.

> زمن سكواها القريب دا…هجوم المريخ كان (حارس مرمي) الفريق الذي يلعب ضد المريخ بغيروه (3) مرات في المباراة.

> تعال هسع شوف ناس (عنكبة).

> عنكبة كورتو كورة روابط.

> لسع بجري.

> يا عنكبة انت في عصر الانترنت وثورة الاتصالات دي (الجري) خلوه.

> معقولة يا ناس المريخ ..جايبين ليكم مهاجمين بتعازموا على الكورة.

> هجومكم دا زي (الترزي) القدر ما تمشي ليه ..بقول ليك (بنطلونك) تعال شيلو بكرة.

> عندنا نجار في الحلة …سعد ود التومة دا لمن كان طالب في الجامعة ..شال ليه قروش وقال ليه عاوز لي دولاب (3) ضلف.

> الزمن داك الدولاب الـ (3) ضلف كان حاجة كبيرة خالص.

> زمان الدولاب الـ (3) ضلف زي الدولاب ابو (7) ضلف في الزمن دا.

> زمان في حلتنا كان في (ميدان) لو مشيت فيه بي عجلة تصل العصر.

> ميدان طول وعرض.

> الميدان ناس الولاية كانوا كلو فترة بقطعو منو حتة.

> والميدان ماشي يصغر.

> هسع لو قلت ليكم الميدان بقى شنو ما بتصدقوا.

> الميدان داك ..بقى (نقطة).

> ميدان طول وعرض بقى (نقطة).

> ما تعاينوا لي كدا.

> بقى (نقطة) امن شامل.

> لكن دا ما موضوعنا ..ان شاءالله يبقى (شولة) حضانة.

> دا حاجة ما بتخصنا.

> نرجع لي سعد ود التومة والنجار.

> سعد ود التومة شال ليه قروش وقال للنجار عاوز لي دولاب (3) ضلف.

> اتذكر النجار كان اسمو (عسوي).

> واتذكر الـ (3) ضلف دي كانت حاجة كبيرة خالص زي ميدانا الكان الكبير.

> سعد ود التومة الوقت داك كان يا دوب في اولى جامعة.

> سعد ود التومة عارف (عسوي) بتجرجر …قال احسن من وانا في اولى جامعة اجهز (الدولاب) عشان لمن اتخرج (عسوي) يكون انتهى من الدولاب.

> والدولاب وقت ينتهي الزول (عرسو) بمرق.

> زمان الزول وقت يعمل ليه (دولاب) خلاص عرس.

> موش بقولوا ليك الحلة بصلة.

> وبقولوا ليك الفول زيت.

> كمان نحن بنقول : العرس دولاب.

> الكلام دا كان زمان ..هسع العرس بقى (قطع رقبة عديل كدا).

> سعد ود التومة اتخرج من الجامعة …ما استلم الدولاب.

> عمل الخدمة الالزامية ..ما استلم الدولاب.

> سعد ود التومة كل ما يمشي على (عسوى) عشان يستلم الدولاب …عسوي بقول لي سعد ود التومة تعال لي (الخميس) القادم…عندي خالتي اتوفت.

> سعد ود التومة ..اشتغل…ما استلم الدولاب.

> العرس باقى ليه 6 شهور…ما استلم الدولاب.

> العرس باقى ليه 3 شهور ..ما استلم الدولاب.

> العرس باقي ليه شهر ..ما استلم الدولاب.

> باقى ليه اسبوع ما استلم الدولاب.

> باقى ليه يوم واحد ..ما استلم الدولاب.

> سعد ود التومة عرس ..ما استلم الدولاب.

> عسوي قال ليه امشى شهر العسل وتعال راجع بتلقى الدولاب سافر…عندي عمتي اتوفت.

> سعد ود التومة سافر شهر العسل (45) يوم وجاء راجع ..ما استلم الدولاب.

> جابوا ليه الولد الاول ما استلم الدولاب.

> جابوا ليه التاني ..ما استلم الدولاب.

> جابوا ليه بنت …ما استلم الدولاب.

> ولدو البكر دخل المدرسة ..ما استلم الدولاب.

> بنتو خطبوها ..ما استلم الدولاب.

> ولدو الفي النص دخل الجامعة ..ما استلم الدولاب.

> ولدو الكبير ..اتزوج ..ما استلم الدولاب.

> يا جماعة (عسوى) دا يعملوا ليه شنو؟.

> يوم سعد ود التومة زهج ..واخلاقو جاتو في نخرتو ..شال ليه (عكاز) ومشى لي عسوي ..قال ليه اسمع يا عسوي انا صبرت عليك كتير.

> عسوي قال ليه كتير الشوية دي.

> سعد ود التومة قال ليه الليلة انا ما برجع ساكت ..يا الدولاب يا ترجع لي قروشي.

> عسوي قال ليه جدا ارجع ليك قروشك …فتح الدرج واعطاه (15) قرش.

> طبعا الزمن الذي استلم فيه عسوى القروش عشان يعمل ليه دولاب تلاتة ضلف …الدولاب كان بـ (15) قرش.

> الكلام دا في الستينات.

> سعد ود التومة شال الـ (15) قرش وطلع على كدا.

> هسع الكلام دا عندو علاقة بي هجوم المريخ.

> اقول ليكم شنو؟.

> اشرح ليكم كيف؟.

> قدر ما اوصف ليكم ما ح تصدقوا.

> هجوم المريخ زي (الضيف) البجيك (زول نوم ساكت)..قدر ما تحنسو للعشاء ..يقول ليك : والله انا اتعشيت.

> اها دا هجوم المريخ.

> لكن هسع دا ما موضوعنا.

> انا قلت ليكم شنو في بداية العمود.

> قلت ليكم سعد ود التومة كان عندهم طبق اشتر.

> اشتر شديد.

> المباراة (لايف) يجيبها ليك (اعادة).

> مرة قاعدين نحضر لينا في فيلم اجنبي…ليقنا نفسنا واقفين في الشارع نحضر لينا في شكلة.

> لا عرفنا الشكلة (فيلم اجنبي)..لا عرفنا الفيلم الاجنبي هو (الشكلة).

> طبق غريب.

> احمد حسن ميدو تشوفو زي الفاتح النقر.

> محمد ناجي جدو في طبقنا بظهر ليك زي (عنبكة).

> عشان كدا لمن المريخ اتغلب اتنين من كمبالا ..قلنا يمكن الحكاية دي لخبطة ساكت من الطبق.

> احسن ننتظر (الجرايد) بكرة عشان نشوف النتيجة.

> الواطة صبحت ..لقينا ليك الجامعة فاتحين في (العالمي).

> عليكم امان الله نحن حلتنا كان فيها (3) مريخاب ..الي الان جاري البحث عنهم.

> وتلفوناتهم مقفولة.

> اها في (عالمي) بعمل كدا.

> هسع الفاتح ود الشريف ذنبو شنو؟.

> ذنبو شنو يبهدل كدا.

> وقدر ما تضرب ليه يقول ليك : (برجع ليك..تعبان شوية).

> ملحوظة : تمهيدي المريخ دا زي المسلسلات التركية …المسلسل تلقى فيه (64) حلقة…هسع ناس المريخ يا دوب في الحلقة الاولى.

هوامش

> كروجر ابعد هيثم مصطفى من قائمة اللاعبين الذين اختارهم لمباراة الاهلي اليوم.

> كروجر ابعد هيثم من قائمة (18) لاعب.

> الزول دا شايلها معاه عديل كدا.

> عليه يبقى تلقائيا هيثم مصطفى بعيد عن قائمة المريخ المختارة للسفر الي يوغندا.

> يا هيثم الله شافك.

> خلى الجماعة ديل يتبهدلوا براهم.

> مالك ومال التمهيدي انت.

> في واحد قال اسوأ تلات حاجات في العالم الفلس وبيت الايجار والتمهيدي.

> اتحيرت في كروجر اشرك بلة جابر وموسى الزومة امام بايرن ميونخ وابعدهم امام كمبالا سيتي.

> من هو مدرب المريخ القادم؟.

> ضع دائرة حول رقم الاجابة الصحيحة.

> (أ) فاروق جبرة.

> (ب) تكليف ابراهومة.

> (ج) جمال ابوعنجة.

> (د) عبدالصمد محمد عثمان.

> (ك) اي واحد من كتّاب المريخ.

> هل تتوقع ان يسجل المريخ اليوم هدفا؟.

> غايتو يا ناس المريخ إلا تسجلوا بين الشوطين.

> من هو الاداري الذي سوف يكون مكلف بقطع التيار الكهربائي من عربة التلفزة اليوم.

> ضع دائرة حول رقم الاجابة الصحيحة.

> (أ) متوكل أحمد علي.

> (ب) متوكل أحمد علي.

> (ج) متوكل احمد علي.

> (د) متوكل احمد علي.

> (ك) متوكل احمد علي.

> هسع دا (تمهيدي) يا مرسي؟.

> ….

> عاجل : الليلة لو حصلت اي حاجة في المباراة ..خسارة ..تعادل …قطع التيار الكهربائي من العربة..افتحوا قوس وانتظرونا بكرة.