نضمك ما بفيد..!!

شوف غيرنا قوليهو النضِم..
ما بنتلدغ من جُحرِ واحد مرتين..
ما بسرى في أجسادنا سِم..
شعباً مدرّع بالقيم..
رافع شعار الله أكبر مُلتزِم..
ماسك صلاتو على نبيك..
صادق مُحصن بالعلِم..
خائف كتير من الله قُبال الممات..
من قبلِ ما يبلى الجسِم..
خليهوا نضمك ما بفيد..
يكفينا كُل القلتوا من زمنٍ بعيد..
في رُبع قرنٍ أو يزيد..
نحنا خاشين الفيلِم..
حافظين تفاصيل الفيلم..
حتي البطل عارفنو عارفين الإسم..
كان الصبُر ترياقنا ليك..
من يوم مجيك..
رابط قِناعك في وشيك..
خايف تجيك..
الطامة قُبال تستجِم..
أهلك قبيل قالوها ليك..
ما ترجى زول ..
قاعد يحش بي دقنو في الزرِع الوهم..
لابد حصادو يكُون سراب..
بايرة الأرض أضحت يباب..
تدخل صراع تمرق نزاع..
الخاتمة كانت هي الخراب..
والشر بِعِم..
مُبهم كلامك يا أخي..
لي غيرنا ما عاد بِنفهِم..
والرباط الكان وثيق..
أصبح ضعيف زي خيط رقيق..
شان الوطن كُل يوم بضيق
والحال ..
يا سيدي يغنيك عن سؤال
خليهوا بالله النضِم..
نحن خاشين الفيلم..

بلا أقنعة – زاهر بخيت الفكي
صحيفة الجريدة