ماذا قالت نجمة النيل الأزرق إلهام العبيد عن الشهرة الواسعة التي حصلت عليها حسناء الإعلام (لوشي)

دافعت مذيعة قناة النيل الأزرق إلهام العبيد عن الهجوم والانتقادات التي ظلت توجه لزميلتها الإعلامية ومذيعة قناة سودانية ٢٤ وصاحبة الشهرة الواسعة آلاء المبارك لوشي.
وبحسب متابعات محرر موقع النيلين فقد نشرت إلهام بوست مطول عبر صفحتها على مواقع التواصل الإجتماعي فيسبوك قالت فيه: سلامات واشواق ليكم

استاضفة قناة العربية للزميلة الاء المبارك (لوشي ) اثارت جدل كبير جدا وسط مرتادي مواقع التواصل الإجتماعي
رأي البعض ان ظهورها علي قناة مثل العربية يعتبر فراغ هذا على حسب ما ذكروه النشطاء علي موقع فيس بوك
…….
طيب ياجماعة دي بداية كويسة جدا والمفروض كلنا ندعم لوشي وكل وجة ممكن يشرفنا كسودانين لي انه يطلع للعالم
لييييييه؟

اولاً :

ياجماعة الصورة الذهنية المكونة عند الانسان العربي او العالمي عن الفتاة السودانية ماخلوووة خالص ودايما بصفوها بأنها غير جميلة (قبيحة ،،،،،،شييييينة) وبكده بتكون لوشي ساعدت في تغير هذة الفكرة

ثانياً :
كل بلدان العالم بتوصل ثقافتها عن طريق المشاهير سواءاً مشاهير كرة قدم او فنانين او ممثلين او اعلامين او غيره
فبالتالي لوشي ممكن تساعد في نشر الثقافة والعادات والتقاليد والحضارة السودانية وممكن تعرف العالم بمن هو السودان واين يقع لان ياجماعة لمن تسافر دول اوروبية او تسافر امريكا او استراليا او اي مكان بعيد مننا وتقول انا من السودان بقولوا ليك السودان ده وين ؟

حضرتك بتضطر تقول السودان ده جنب مصر بعد كده ممكن يفهموا او يركزو طيب هو ليه عرف مصر وعرف الحضارة المصرية وليه مصر بلد سياحية وكل الناس من كل العالم بتزورها لان مشاهير السينما والدراما اهتموا بنشر حضارتهم ولان دايما المشاهير عندهم دور فعال ومؤثر جدا عند الناس
اذن ياجماعة عشان تتنشط السياحة في البلد دي لازم نحن نساعد المشاهير اللي عندنا ديل ويصلوا للعالمية عشان من خلالهم نقدر نخلي بلدنا تكون بلد سياحة من الدرجة الاولي وبالتالي البلد تجلب عملة صعبة لان بتنشيط السياحة ممكن يتوفر عندك دولار وبدل ماهو ب30 ممكن يصل 2 او4 او 1 مابعيد
ياجماعة خلونا نفكر بطريقة مختلفة شوية وياريت نطلع من القوقعة اللي نحن عايشين فيها العالم مشي خطوات بعيدة جدا خلونا نجري كان نقدر نصلهم
بالتوفيق لي لوشي ولي مازن ولي كل سوداني وسودانية بحبوا بلدهم وبسعوا لي انهم يظهروا السودان بصورة حلوة.

كسرة
لكن يالوشي النصيحة ماكان في داعي تدخلي الكلمات الخليجية وانت بتتكلمي سوداني احلي

بالتوفيق.

محمد عثمان _ الخرطوم
النيلين