* وهى الأسلحة.
* ولولاها لما كان لأى نشاط أنسانى قيمة ولا رونق.
* لو لعبوا كاس العالم بدون جمهور.
* بكون ابيخ كاس عالم فى العالم.
* حتى معلق المباراة يرتقى مستواه أنفعالاً بالجماهير.
* وفى الدنيا دى ماكان فى تنافس من دون جمهور.
* وطلع لذيذ غير كورتنا ضد أخوتنا يوم سكواها.
* داك يوم عاد ساهل!!!
* لذا.
* لذا تانى.
* لا نوصى الشفوت بدورهم يوم السبت.
* نحن نثق كثيراً.
* بالذات بعد تلاقى والتقاء المسميات الجماهيرية برعاية(الهدف).
* أثق تماماً بأن الجماهير ستنافس نفسها.
* وستنتصر للمريخ قبل اللاعبين.
* وستعلن التأهل من هنا.
* من يوم السبت.
* أيها الناس.
* كمبالا ليس بالفريق السهل.
* لذا لا نستهونه.
* ولا نستعجل النصر عليه.
* ولا نمنى النفس بأهداف كأهداف الترجى يوم ترباس مشى يشرب فى مرمى أخوتنا!!
* أذا فزنا واحد صفر.
* كروجر يعرف كيف يحافظ على الواحد وعلى الصفر.
* والحفاظ على الصفر ساهل.
* أخوتنا محافظين عليهو خمسة وتمنين سنة.
* وأذا فزنا أتنين صفر يبقى الموضوع أسهل.
* وأذا خرج كمبالا نقياً يبقى يادار ما دخلك شر.
* أما الرباعية فهى تصبح حقارة بقة.
* المهم أهدافنا يقابلها صفر كبير يسعدنا كما أسعدنا من قبل.
* أيها الناس.
* كمبالا فريق عريق.
* وصاحب خبرة فى التنافس الأفريقى.
* وسبق له وأن تقابل تنافسياً مع فريقنا.
* وسبق له أن أخرج الهلال من التنافس الأفريقى.
* وسبق له زان هزم الهلال رايح جاى.
* فى صفر سيتى وفى كمبالا سيتى.
* غلب الهلال فى أمدرمان وفى يوغندا.
* لذا.
* نأخذ فى الأعتبار أننا علينا أخذ ثأر الهلال.
* مسكين الهلال ما عندو شعار.
* وثأر الهلال نأخذه بالفوز على كمبالا رايح جاى.
* فى خرطوم سيتى وفى كمبالا سيتى.
* أيها الناس.
* دور الجماهير كبير.
* واليوم يلعب أخوتنا.
* ناس منقو بأستاد الخرطوم.
* يلعبون أفريقياً.
* وظروف التوترات السياسية فى السودان الجديد جابتهم لى سودانهم القديم عشان يلعبوا وسط جماهيرهم.
* الجنوبيين ديل قبل الأنفصال جلهم مريخاب.
* وكم ساندوا مريخهم فى الدول المجاورة وأحرزوا له نصراً كبيراً.
* بالعجلات وكدارى.
* وأن كان اولتراس جوارح المريخ قد طبق مقولة لن ندعك تسير وحيداً.
* فأنه طبقها داخلياً.
* ولكن ناس مونج أخوى طبقوها دولياً.
* يذهبون بالعجلات وكدارى من مدن الجنوب الى كينيا ويوغندا لنصرة المريخ.
* عشان كدة.
* ممكن أطلب من الجماهير على وجه العموم.
* ومن الشفوت على وجه الخصوص أن نساند أخوتنا من عصراً بدرى اليوم بأستاد الخرطوم.
* فهم مننا وألينا وهم أخوة لنا وأن كانت السياسة قد قالت كلمتها.
* وقررت ان تقف بيننا وبين منقو وتفصلنا.
* فأن الواقع يقول غير ذلك لأنهم أخوة لنا.
* نعن أنفصلنا.
* سياسياً أنفصلنا.
* ولكن أجتماعياً ما أنفصلنا.
* أخوة ما زلنا.
* أجتماعياً أتصلنا ما أنفصلنا.
* وقد يكون للسياسة رأى جديد فى أقرب مدى أو فى المدى البعيد.
* المهم.
* أن كنا شعب واحد حق الخوة يجبرنا على مناصرتهم اليوم.
* وأن كنا شعبين أتنين.
* حق الجيرة وأرساء السلام والوئام والتبسم والأنسجام.
* برضو يدفعنا لمناصرتهم اليوم.
* ويا ريت يكون عندنا تمثيل من رموز الدولة يشرف المباراة.
* فأننا نسعد كثيراً بأعلاء رايات السلام فى وطننا.
* نجى كلنا.
* ونهتف ونشجع ونساعدهم على التأهل.
* أيها الناس.
* اليوم وبعد مباراة الجنوب.
* المغرب بدار النادى.
* القبادة العامة عندها بيان هام فترقبوه.
* ما تترقبوه من بعيد.
* تعالوا النادى وترقبوهو.
* وأعرفوا دوركم وأحفظوهوا.
* أن شاء الله الأجتماع ينتهى السبت الصباح.
* ماكتير على المريخ.
* صديقى معاوية الجاك يتحدث عن أهمية المدلك بالفريق.
* ويستنكر عدم وجود مدلك بعد أقالة أو أبعاد حبشكة.
* قبل كل ذلك معاوية.
* هل يعلم المريخ انه بدون مدلك؟!
* أتأكد من دى وبعدين تحدث عن أهمية المدلك!!
* المهم.
* الزمن ضيق يا لطيف.
* وعندما شاهدت ولد(الدخان) فى الواتساب.
* تذكرت رائعة أنشادية سمعتها قبل سنوات.
* تقول فى مطلعها.
* الزمن ميل يا لطيف***مركبو أتحير يا لطيف.
* وتنتقد الرائعة تلك البنت وتتناول الولد.
* شوف أخوها كمان يا لطيف***طولو طول البان
والخشم مليان يا لطيف**** بى حلاوة لبان يا لطيف
* ولا يدرى كاتب الرائعة المشار اليها وقتها أن الزمن سيميل لدرجة تفوق الخشم المليان بى حلاوة لبان وتصل لدرجة الطلح دخان يا لطيف يستاهل البمبان يا لطيف.
* اللهم أحفظ عروضنا وعروض المسلمين يا رب العالمين.
* أها.
* نجى لى شمارات والى الخرتوم.
* أكان شفت يا والينا.
* أتحرجنا مع شفعنا.
* محرجين شديد نحنا.
* يوم نمت ولا غبيت ما عارف.
* حلمت انو بتى الصغيرة زعلتنى.
* قلت ليها ما عافى منك.
* أريتنى لو ما قلتها يا والينا.
* البت فى الحلمة ديك ردحت فينى جنس ردحى..جنس ردحى..ردحت ردحى أسكت بس.
* قالت لى ما عافى منى ليه؟!
* ولدتونى فى الراهبات يا يمة ولا سمايتى كانت فى كورنثيا يا يمة؟!
* أجزتو بى فى مانيلا يا يمة ولا دخلتونى كورس لغة فى لندن يا يمة؟؟
* بنيتوا لى عمارة فى ماليزيا يا يمة ولا أشتريتو لى بيت فى الريف الأنجليزى يمة؟؟؟
* بتجيبوا لى الرغيف من دبى يا يمة ولا الشوكولاتة بتجينى بالسارينا يا يمة؟؟؟
* فتحتوا لى صيدلية فى الكلاكلة يا يمة ولا بى أرباحها أشتريتوا لى فيلا فى الرياض يايمة؟؟؟
* أنا الماعافية ليك دنيا وآخرة يا بابا.
* صحيت مخلوع يا والينا.
* حضنت بتى.
* وبكينا.
* نسوى شنو بس ورينا؟
* الوطن وطنا والشفع شفعنا يا والينا.
سلك كهربا
* ننساك كيف والوطن بحرجنا مع شفعنا.
والى لقاء**********سلك
لن ننساااااااااااااااااااااااااااااااااااااك
في السلك – بابكر سلك
