ما تتخلى عن احلامك الكبيرة، عايز تبقي كاتب؟ رسام؟ طبيب؟ والله العظيم الحلم الصادق مصيره واحد من اثنين: يا تحققه، يا تعيش في ظل غيابه للأبد

نحن بنخوض معركتين في الحياة ، معركة خارجية (العمل، الدراسة، المعيشة، الضغوط الخارجية بأنواعها). ومعركة داخلية ، ودي الأهم وهي البتحدد محصلة واقعنا.
لأنو العالم الخارجي ما بيقدر يهزمك لو ما اتهزمتا داخلياً.
اغلب الأحيان بنكون مهتمين بوضعنا في جبهة واحدة: الخارجية ، عشان كدا بدون مقدمات الواحد مننا بيلقا نفسو في اعتاب الإكتئاب و مليان بالتشاؤم والحزن، فجأة كدا بيبقا ما عندك نفس لزول او شي، وبيبقا ما فارق معاك لا معدلك لا مرتبك لا علاقاتك لا غيرو. وبتعيش بعدمية تامة.
هنا الهزيمة الداخلية بتلغي اي انتصار خارجي حققتو، وبتخلي ما عندو طعم او معنى.
الإهتمام بالصحة النفسية ما عملية لجوء لطبيب نفسي و ترقد في كرسي ويطلع اوجاعك وحكاويك، دي تهيؤات عاطفية ، واختزال ظالم لعلم النفس الواسع في مشهد درامي شائع.
الإهتمام بالصحة النفسية مطلب يومي و دائم ، ما أقل أهمية و تكرارية عن تقليم الأظافر او الإستحمام وشرب الماء ، اهتمامك بصحتك النفسية بيعني انك تخت نفسك دايماً في المسار الصحيح ، و تغذي مشاعرك الصحيحة، وتوظف نصائح وتوجيهات علماء النفس في سلوكياتك البسيطة والكبيرة. وتلجأ ليهم وقت الضرورة بدون تأخير ، بنفس جديتك في التعامل مع المشاكل العضوية.
انا عن نفسي عانيت خلال عمري القصير من تحديات نفسية كتيرة ، ما عارف اصلاً نجيت منها كيف، وحبيت اشارككم بعض النقاط الأساسية المبسطة، العرفتها بالتجربة والنصح والقراءة، فيما يتعلق بالصحة النفسية.
عشان تعيش سليم من جوة حاول، أو الأفضل تقرر وتعزم :

– قضي وقت اطول مع أسرتك ، و خليك فاعل وجاد في تهيئة البيئة المنزلية ، شاور واتكلم واتفاعل عشان تحل أبسط المشاكل في بيتكم، والما عندها حل ناقشها عشان تخفف أضرارها . تستوعبها و تعدي منها بسلام، أكبر مؤثر في الصحة النفسية هو الأسرة ، الأسرة عندها عامل قوة ما متوفر في العوامل الأخرى (الإستمرارية) ، زي قطرات الماء البتقدر تقطع الصخرة مع السنين، بتشوفهم كل يوم، لا بيفرقكم خصام لا إجازة لا مأمورية.
لازم على الأقل، على الاقل شديد ، تلحق وجبة في البيت، كباية شاي، أو قعدة مغرب بدون موضوع.
حتى الحبيب او الحبيبة ، كل الزخم البيناتكم بيكون سعي من كل واحد فيكم عشان يبقي التاني فرد من الأسرة (عشان كدا البتسأل عن شريكها مناسب او لا بقول ليها شوفي تعاملو مع اخواتو ودا الحتكونيهو بعد سنين بالضبط ما اكتر ولا أقل). فالأسرة هي المثال الأكمل للعلاقات وبتتربع على رأس الهرم العاطفي.

-ارتباطك العاطفي ، الحبيب/الحبيبة ، ودا معامل ضرب (Multiplier)، ايجابيتو من سلبيتو ممكن تقلب الفسيخ شربات ، او الشربات فسيخ.
المحبة رزق ما بالإيد بس حاول قدر الإمكان تفضل مع شريك بيدعمك، يحترمك ، يتفهمك و يكون الجزء الأفضل والأسهل والأجمل في حياتك.
ربنا منح الحب قدرة عجيبة على الإسعاد والإتعاس على حد سواء، فالسلاح الفتاك دا أفضل ما نسلمو لزول ما ضامنين نواياهو.

-المشية لشارع النيل اكبر بكتير من المشية لشارع النيل، الفسحة الاسبوعية خليها فرض من الفروض البتؤديها بدون نقاش أياً كان ظرفك. تمشي الري المصري، ود العقلي ، الساحة، المهم تشم هوا نضيف وتجدد نفسياتك وتروق بالك بدون اي ضغط عصبي، امشي مع ناس عايزين وقادرين يتونسو ويضحكو ويرفهو ، ما تشيل كوتشينة لا اي لعبة فيها ضغط فكري.
Enjoy doing nothing atleast once a week.

-ابعد الف ميل من اي شي/زول بيزعجك او يضايقك او يستفزك. ما تخلي زول يجرك للانفعال او تسمح لتصرفاتك تبقا ردود افعال. بيضايقك في الفيسبوك؟ احظرو ، بكل أدب وبدون اي عداوة. بيضايقك في الشارع لفظياً كلموا ما يتعامل معاك، اما جسدياً أحسموا قانونياً ، وفر لنفسك بيئة مسالمة وداعمة قدر الإمكان و ركز مع الناس العايزينك بخير.

-في ناس تعبانة نفسياً لأنها بتفكر كتير ،وناس تعبانة لأنها ما لاقية وقت مع نفسها، قيّم نفسك واحتياجاتك كل فترة..محتاج تبطل تفكير ؟ انخرط في الحياة ، اخلق برامج واعمال ، محتاج وقت مع نفسك؟ قلل نشاطك و رتب نفسك ونفسياتك في مكان هادئ. سافر ، اعتكف.

-ما تتخلى عن احلامك الكبيرة، عايز تبقا كاتب؟ رسام؟ طبيب؟ والله العظيم الحلم الصادق مصيرو واحد من اتنين: يا اما تحققو ، يا تعيش في ضل غيابو للأبد. ما عندنا خيار ثالث كبني آدمين بيتميزوا عن سائر الكائنات بعمق التمني.
عندي صديق عزيز مهندس حاسوب وحلمو كان يبقا جراح. بطريقة ما ، بيوصف لي انو المسلسلات الطبية البتنتمي لحلمو ، بتعجبو أكتر من المسلسلات الرقمية والافلام من نوعية ماتريكس البتنتمي لوظيفتو. وانو لسه رغم سنين عمرو الثلاثين بتجيهو احلام يقظة عن بطولاتو كجراح.
و كان عندي صديقة تانية طبيبة ، بعرفها سنين طويلة، ما حصل اتكلمت لي غير عن الرسم والألوان والفن، ولما تتكلم عن حياتها وطموحاتها ما بتقدر تتخيل غير معرض لرسوماتها. الطب بالنسبة ليها واقع ثقيل مفروض عليها.
اسعى بكل ما اوتيت من قوة تشتغل الحاجة البتحبها، في تحربتي الشخصية، انتقالي من المختبرات الطبية للأنميشن كان قرار مكلف جداً ،مادياً وزمنياً، لكن على المستوى النفسي بعتبرو أفضل قرار اخدتو في حياتي، وبشكر نفسي عليهو كل صباح، غير انو القرار دا قصر لي مشوار الوصول للراحة النفسية، نفعني على المستوى المهني، كوني قادر ابذل بقوة ورغبة خرافية،و جلوسي للشغل لمدة 16 ساعة ما ممل بالنسبة لي (كأنو موعد غرامي) دا خلاني مرغوب في اي وظيفة اقدم ليها، وخلاني راغب في اي وظيفة متوفرة ضمن تخصصي، وطور مستواي جداً لأني ببحث شغفاً وليس حوجة.
فتزوج واعمل عن حب.

-المنبهات، النيكوتين، المخدرات بأنواعها، قهوة، سجائر، بيبسي ، ريدبول، بنقو، دي سموم نفسية اكتر منها عضوية، وبختها كلها في نفس الخانة، عن عمد مهما بدى الأمر متطرفاً، جميعها بتديك دفعة مكثفة من التوتر والأرق والقلق والوساوس. ودي حقائق طبية، ابعد عنها وخليك حاسم جداً مهما كلف الأمر.
في نفس السياق مارس الرياضة بانتظام، اتمشى بجدول ثابت، الرياضة اقوى مضاد للتوتر والاكتئاب عرفه الطب الحديث.

-النقطة الاخيرة دي كل شخص حيهضمها بذوقو ومعتقداتو: القرب من الله عز وجل ، القرب من الإله .
قد تختلف معتقداتنا ومسمياتنا، لكن الكون دا مخيف جداً بدون الإيمان بوجود مدبر نتوكل ونتكل عليهو ، مسلم بوذي مسيحي ، حاول تكون عبد مخلص و مسالم و اتوكل على الله.

دي نصائح مختصرة والموضوع طويل، العندو اضافة ما يبخل علينا في التعليقات، شنو البيساعدك تحافظ على استقرارك النفسي و ايجابيتك؟
شاركونا خبراتكم ،وحيلكم، دمتم بخير.

بقلم
محمد خالد دوشكا