(ست الشاي ) البشرب عندها الجبنة كل يوم واتعودت علي جبنتها… مرة بسيطة جدا ومحمولة في الزمن الصعب دا وعندها تلاتة اطفال صغار .. اكبر واحد ممتحن للاساس السنة دي … امس قالت لي دايرة تطلع البطاقة القومية ليها ودايرة ارقام وطنية لي اولادها لانو الود الكبير قالو ليهو لازم تجيب رقم وطني عشان يسجلوك في تامن لانو بيحتاجو ليهو في الامتحانات النهائية ..
عشمت فيني خير وانا رغم الزحمة والضغوطات قلت ليها جدا بكرة اتصلي علي ان شاءالله بتتسهل …
الليلة الصباح اتصلت علي وانا خاشي اجتماع وعندي مية شغلة في راسي قلت ليها ارجعي لي بعد ساعة بكون قضيت ليك وبديك زول تمشي ليهو فقامت دعت لي دعوة سمحة خلاس وقالت لي ربنا يسهل ليك امرك يا حسن ياولدي ويفتحها عليك محل ما تقبل… الدعوة دي كيفتني عديل وادتني احساس وراحة سمحة كدا …قمت بعداك عملت كم اتصال لي كم زول عشان يكملو ليها الاجراء بتاعها سبحان الله كلهم طلبو مني اخلي الموضوع لي بكرة …
حاجة تانية :
وانا سرحان بفكر كيف اساعد الزولة دي الليلة جاني اتصال من رقم غريب.. ولاول مرة ارد علي رقم غريب فدار بينا الحوار التالي :
هو : سلام عليكم… ابوبكر الامين??..
انا : عليكم السلام معليش والله انا ما ابوبكر .
هو : ياخي معقولة انا داقي لي واحد اسمو ابوبكر ادوني رقمو دا امس..
انا : لالا معليش دا ما رقمو..تكون لخبتا في الارقام بس ..
هو : يازول خير معليش طيب اسفين للازعاج…
انا : لالا عادي والله مافي ازعاج ..
هو : معليش اسم الكريم منو. ..
انا : انا حسن حسين
هو : انا العقيد …….. السجل المدني ..
انا باستغراااب : يازوووووول سبحان الله.. السجل المدني ذااااتو… الغريبة انا حسي كنت جاي هناك …
هو : سبحان الله صدفة عجيبة.. مرحب بيك والله عندك شنو…
انا : عايز اطلع رقم وطني وبطاقة قومية لي جماعة وكنت مالاقي زول يعملها ليهم..
هو : خلاص تعال نعملها ليهم طوالي…
انا : خلاص برسلهم ليك بيجوك طوالي ناس بسيطين والله ومحتاجين زول يخدمهم .. ( وحكيت ليهو القصة).
هو : نحن اصلا تحت الخدمة في اي وقت ولكل الناس… واعتبر اجراءهم منتهي وكمان اكرامي مني…
انا : تسلم ياسعادتك وربنا يجزيك خير ويجعلو في ميزان حسناتك..
حاجة اخيرة :
الحاجة دي حاجة عادية لكن انا ركزتا معاها وكتبتها لانها بتوريك تدبير الله للامور وبركة الدعوات من الناس البسيطين … شوفو الاقدار عملت شنو بتسلسل غريب .. خلت العقيد مدير السجل يخطئ في الارقام … خلت الرقم الخطأ يكون رقمي انا … خلتني ارد علي رقم غريب مع اني لي زمن موقف الحاجة دي … خلتنا نتكلم مدة من الزمن عشان اعرف انو سعادتو في الشرطة وبابتحديد في السجل المدني مكان الاجراء .. وفي النهاية قضت للمراة المسكينة امرها الكان واقف ليهو زمن وبدون رسوم.. يعني بدل افتش لي زول في السجل المدني يكمل اجراء المرأة دي ربنا رسل لينا المدير ذاتو …
سبحانك ربي مدبر الامور …سبحانك ربي مستجيب الدعاء ميسر المقصود … سبحانك ربي وكفى…
حاجة خارج النص:
وسيقضي الله امراً كنت تحسبه مستحيلاً… لكنه عنده سهلاً يسيراً…
بقلم
حسن حسين محمد
*الصورة رمزية فقط وهي للفنانة ندى القلعة
-
-
-
-
-
-
-
-
