ودساب الشلّاب

السلام عليكم يا شباب جميعا (وخاصة صناع الأفلام السودانيين).
في موضوع خطير (على الأقل في نظري) أنا داير أتكلم عنه، لأنه بصراحة حارقني شديد! والأخطر إنه الموضوع دا بيجي مغلف بغلاف جميل جدا أشبه بغلاف أفخم وأغلى الحلويات اللي بناكلها وبدون ما نحس بتكون بتنخر في أسنانّا وتسوسها وتعمل لينا سكري وتطلع ميتينا بدون ما نحس.
الموضوع هو صفحة ودساب الشهيرة.
طبعا الصفحة دي كان عندي معاها حادثة لذيذة قبل شهرين، حاتطرق ليها بعدين.
باختصار، القائمين على هذه الصفحة (بيسرقوا) أي محتوى سوداني جميل من النت سواءً كان يوتيوب أو فيسبوك (الفيديوات على وجه التحديد)، يعملوا ليهو داونلود ويعيدوا رفعه من جديد في صفحتهم دون أي ذكر لمصدر الفيديو الأصلي. وبيدخلوا ليك من باب: “يا سلاااام، شوفوا العمل المبدع دا” و “شغل سوداني جميل” و “شباب مبدعين والله” ومعرفش ايه. ويجيك الشعب السوداني العظيم الطيب (الطيب دي خت تحتها خطين) وينشروا الـ “عمل الجميل” دا في مختلف القروبات والصفحات الشخصية، وتصل مشاهداته لمئات الآلاف. طبعا مئات الآلاف من المشاهدات دي بتتسجل باسم صفحة ودساب. وبالتالي بيزيد رصيد إجمالي المشاهدات واللايكات والشيرات بالصلاة عالنبي عند صفحة ودساب. وبلا شك زيادة الأرقام دي بتصب في صالح أصحاب الصفحة بشكل كبير من مختلف النواحي (إعلانات وأحناك زي دي). في حين إنه الفيديو الأصلي (سواء في الفيسبوك أو اليوتيوب) بيكون قاعد براه معزول ومافي زول شغال بيهو زي قطر مع دول الخليج.
الموضوع دا مساني شخصيا قبل شهرين (بالتحديد يوم 18 ابريل) ولقيت فيلم تزعة منزلينه في صفحتهم (طبعا رافعين الفيديو من الصفحة نفسها وما جايبين أي سيرة أو إشارة للرابط الأصلي). لكن بحكم علاقتي الوطيدة مع عمو مارك زكربيرق، طوالي رسلت ليهم إيميل صغيروني، وشرحت ليهم البتعملو صفحة ودساب من سرقة لجهود الشباب، بالذات صناع الأفلام. وقام طوالي أبو ماكسيما (ماكسيما دي بت مارك) ما قصر، وفي أقل من 24 ساعة تمت إزالة المحتوى المغتصَب من صفحة ودساب.

السبب الخلاني الليلة أطلع من صمتي وأتكلم عن الموضوع دا، إنو امبارح في برنامج قمرة 2 اتعرض فيديو جميل جدا عن السودان لشباب سودانيين زي الورد. فقاموا طوالي الهمباته بتاعين ودساب نزلوه عندهم ورفعوه في صفحتهم بدون أي ذكر لأصحاب الفيديو الأصليين (يا عيب الشوم). وهنا بالذاااات الواحد لازم يتكلم ويوعي الشباب السودانيين إنو الحاجة دي بتضر بشكل مباشر مشاهدات الفيديو الأصلي في اليوتيوب. وللأسف ما شفت لحد الآن زول عمل شير للفيديو من الرابط اليوتيوبي الأصلي، كل الشباب -وبحسن نية- قاعدين يشيروا في فيديو ودساب وللأسف بيضيعوا المشاهدات على الفيديو الأصلي. واللي هي عنصر مهم في إنو الفيديو يتقدم في المسابقة (مسابقة قمرة 2). وللأسف وصلت مشاهدات الفيديو في ودساب لحد كتابة هذا التقرير 160 ألف، في حين إنه الفيديو الأصلي في اليوتيوب يادوب 32 ألف!!! يعني يادوب خُمُس المشاهدات!

فياريت مافي زول يشير فيديو ودساب، والناس كلها تتجه للفيديو الأصلي في يوتيوب من خلال الرابط دا: https://www.youtube.com/watch?v=DNI9_BO-8fU
وماتنسوا كمان تصوتوا للمشاركة رقم 1012 عشان نكون بالجد بندعم صناع المحتوى السوداني، بدل ما نكون بندعم في سارقي المحتوى والمتسلقين على ظهور المبدعين بدون ما نحس.

يللا عن إذنكم، ماشي أضرب لي عمو مارك وأبلغه عن السرقة بتاعت ودساب.
وأبشركم قريب حيتحذف الفيديو من صفحة ودساب زي ما اتحذف فيديو تزعة قبل كدا.

طبعا احتمال ودساب يبلكوني وما أقدر أخش صفحتهم وأشوف إذا الفيديو اتحذف ولا لأ. فياريت لو بلكوني، تخليكم متابعين في صفحتهم عشان تتأكدوا من حذف الفيديو وتجوا تكتبوا لي هنا: ودساب اتفشخ وحيتساب.

أمجد النور