القانون لايحمي (المستهدفين)

نشال في سوق امدرمان قبضوا عليه والمسروقات في يده ..اخد ليه علقة مظبوطة ثم ذهبوا به لقسم الشرطة.
صاحبنا من وصل القسم فر ضراعاتو وقال للضابط(سيادتك انا عايز افتح بلاغ في الزول دا …انا معوق !!!
وسط دهشة الجميع قلب اللص الطاولة عليهم واصبح بقدرة قادر شاكي بدلا عن مشكي مطالبا باورنيك 8 !!!
اها قاليك الجماعة بدو ينسحبوا من مكتب البلاغات واحد بعد التاني وخلوا ليك صاحب القروش براهو.
لكن بفضل الله تدخل واحد ود حلال واقترح عليهم عمل تسوية خرج منها اللص بمبلغ محترم (للعلاج )مضافا اليه المبلغ المسروق ويادار مادخلك شر..والمل تلتو ولا كتلتو.!!!
ومرة تانية قريت في جريدة قبل فترة انه في لص تسلق سور منزل ليقوم صاحبه بالاشتباك معه داخل الحوش.
صاحب المنزل كان شايل سكين جرح بيها الحرامي في يده ليهرب الاخير…لكن بعد اسبوع يطرق الباب ، واذا بشرطي في يده استدعاء للقسم لان الحرامي فتح بلاغ في صاحب المنزل لانه (جرحه)اثناء محاولته سرقة المنزل…واظنه فتح البلاغ تحت المادة -13(تجرحني ليه وانا كلي جراح)..!!!
ولو بتتذكروا حرامي (الشطة) اها الحرامي داك قالوا فتح بلاغ في شباب الحي وجهجهم ليك.
صاحب دكان قام لص تحويل رصيد بالاحتيال عليه فقام بضربه وذهب به الي القسم وليته لم يفعل.فقد اصبح هو الجاني.!!!
امس الاول ابن الجيران يسكن جوار قسم الشرطة (في نفس الشارع) جاهم حرامي ولمن سكاهو قام الحرامي ضربو بي حديدة كسر ليه يده.وطبعا الحرامي هرب والولد بتعالج الان !!!
من قبل وفي حارتنا الحرامي ضرب واحدة في صدرها ماتت من لحظتها وايضا الحرامي هرب وكتييير بنسمع عن لصوص يقتلون اصحاب المنازل !!!
الشاهد في الموضوع ياسادتي .ان اللصوص اصبحت لهم سطوة وقوة تمكنهم من الفوز فالقانون يساوي بينهم والمستهدف . فكيف يعقل ان يحاسبك القانون اذا اعتديت بالضرب علي لص داخل منزلك او حتي اذا قبضت عليه خارج المنزل بعد مطاردة ..وهل يقبل اللص بالذهاب معك الي قسم الشرطة بي اخوي واخوك ؟؟؟
عمركم شفتو لص قالوا ليه اتفضل معانا نسجنك رد بكل احترام وادب .جدا اتفضلوا قدامي وانا بلحقكم ؟!
اللص بالتاكيد ليس هو ذلك الشخص الذي يقف امامك بدون مقاومة منصاعا اليك.فهو في الغالب مسلحا ومستعدا للهجوم.فكيف يطلب مني القانون عدم الاعتداء عليه وهو الذي تسلق سور منزلي ودخل حتي غرفتي ليسرقني ..فهل انتظر ان يبدأ اللص الهجوم علي او علي احد افراد اسرتي لادافع عن نفسي واهل بيتي؟؟

ماهذا الهراء ؟؟!!؟

اتمني ان يعدل هذا
القانون الذي يساوي بين اللص والضحية.والذي استقوي به لصوص المنازل مثلما استقوي علينا لصوص الوزارات بقانون التحلل.

خالد ضياء الدين‎