السلام عليكم ورحمة الله وبركاته.
لي فترة عايز اكتب في الموضوع دا بس لانو الموضوع طويل مالقيت زمن كافي الموضوع يخص الشعب السوداني اجمع
وكذلك ايضا يخص اللاجئين السوريين
الأمر الذي شدني للكتابة عن هذا الموضوع، كل ما افتح الفيس او الواتساب او التليجرام بجد مواضيع وصور ورسائل تتحدث عن السوريين وما ادراك ما السوريين ،،،وطالبات الجامعات
واخواتنا وبناتنا،
وصور لسوريين قاموا بمعاكسة اخواتنا وتم ضربهم وتأديبهم..
وآخر صورة لاقتني صورة لشباب عليهم آثار الضرب والتعذيب مكتوب عليها
شباب الكلاكلة ينفذون اول عملية تأديب لسوريين قاموا بمعاكسة اخواتنا
#بالنسبة الصورة صور من السجون المصرية
والتقرير المنتشر عن الشرطة وحظر التجوال مفبرك والاصل من قوات الشرطة التركية…
المهم الاعلام الفيسبوكي والواتسابي انا شخصيا ماقعد اصدقو
اصلا اعلامنا كان الكتروني ولا ورقي كلو فاقد المصداقية ،،
دا ما موضوعنا
المشكلة ما في الاخوة السوريين ،، السوريين هم اخواننا ونرحب بيهم في بلدنا ونكرمهم وماعندنا أي مشكلة معاهم
اذا اتحلوا بالإنضباط وحسن الخلق والمعاملة وأي سلوك مشين منهم مافي زول حيرضی ..
بس ,
دا ما معناهو اذا في شخص منهم عمل مشكلة او ارتكب جريمة نحنا نقوم نعمم الموضوع ونقول السوريين عملو وفعلو ونشن حملة اعلامية عليهم… تارة ننشر صور من النت ونقول شوفو السوريين مع اخواتنا في الجامعات ،،،ولقيناهو مع طالبة سودانية في كافتريا وبيشربوا عصير،
وإن صحت الصور،المشكلة وين هنا
هل المشكلة في إنو السوري قاعد معاها وعزمها؟
طيب اذا كان السوري سبب المشكلة ،،الفرق شنو بين السوري القاعد معاها والسوداني الحالق نيمار وقاطع ساطور وداقي سستم وقاعد معاها،، طبعا حيجي واحد ينط لي ويقول لي السوداني دا زي اخوها وزميلها في الجامعة وووو
بالله!
والله شبابنا البتقولوا عليهم زي اخواتهم ديل نحن بنشاهدهم في اماكن عامة بمشاهد اقبح من غيرهم الاجانب ،
طيب انا بسألك سؤال ، هل السوري البتتكلم عنو دا دخل البيت لقى البت محتشمة وبتصلي في البيت انتظرها بعد كملت الصلاة خطفها ؟
ولا لقاها ماشة في الشارع محترمة ومحتشمة وهددها وساقا
يا أخوي القاعد خلف الشاشة وماسك تلفونك وبتتراجل وبتكتب نحن بنعمل ونحن ونحن….ماشاء الله عليك مابتقصر..وارهبت الناس ديل
بس يا أخوي رجالتك دي ماتبرزها مع السوريين بس ،، طبقا في كل الناس سوداني اثيوبي امريكي وووو
#وأول حاجة طبقها في أختك، أي طبقا في اختك البتطلع لابسة نصف ساقها ونص كم وكاشفة شعرها ومتعطرة دي
ياعزيزي انت ربي بنتك او اختك كويس وبعد كدا اذا في زول عاكسها يبقى داموضوع براهو
المسألة مسألة تربية،، إذاكان البنت انت اديتا حريتها في اي شي .. في اللبس وفي الدين وتطلع وقت ماعايزة وتجي وقت ماعايزة..
مفتكرها حتمشي تشتري نقاب وتجي…ولمن تطلع بعد المغرب مفتكرها مشت تصلي العشا في الجامع وراجعة
ولمت تجي خاشة الساعة 12
مفتكرها جاية من الجهاد مثلا ولاكانت بتذاكر مع صحبتها مثلا!
كدي استهدوا بالله كدا وفكروا واتأملوا
اطلعوا الشوارع…الجامعات …المواصلات شوفوا المنظر البتطلع بيها البنت من بيتا وابوها او امها واخوها شايفنها وهي طالعة
راقب بنتك ،،، وولدك ايضا ماترفع عنهم الثقة لكن اديهم الثقة في الحدود الممكن يصارحوك فيهو باي شي
#معليش اعزروني يمكن سخنت وعصبت شوية
بس الموضوع شداني
والله يا اخواني المشكلة ما في البنات بس ولا في الاولاد براهم
المشكلة مشكلة بعد عن الدين وتهاليمها الجميلة
بعد عن العادت والتقاليد الجميلة واستبدالها بعادات دخيلة …الحل الوحيد هو الرجوع لتعاليم الإسلام،،، الرجوع للحجاب واجتناب النواهي
الشباب اليوم بيعانو من مشاكل كتيرة بتخليهم انهم يتطرقوا لملئ اوقات الفراق باي وسيلة كانت،،،
أما مسألة التشهير باخلاق الأخوة السوريين وتعاملهم معنا ووو والله دي مابتشبهنا…
دي مجرد فتن لاننا الشعب الوحيد الإتعامل معاهم بحسن نية وأخوية..
لعن الله الفتنة ومن أشعلها،، في ناس بتحسدنا على الطيبة وحسن المعاملة وسمعتنا المالية العالم، الصدق والامانة والنية الطيبة
،،لذلك ان جاءكم فاسق بنبأ فتبينوا
ماتنشروا أي كلام بدون ما تتأكدوا من صحته،،
اذا كان في شخص عمل غلط ماتعمموا وتتهموا شعب بأكمله بالفسق والشذوذ،،
#وخليك عارف
انت البتنشر صور لبنت سودانية واقفة مع اجنبي ومبسوطين وتكتب ،،،ديل السوريين الدخلناهم بلدنا
ليه ماتكتب ديل بناتنا الربيناهم وصرفنا عليهم دم عروقنا،،،يا عزيزي انت كدا بتأكد للناس الكلام البيقولوه عن بناتنا ،،وبتفضح في نفسك بنفسك،،
#بالنسبة للصورة المنتشرة لسوريين بيشتموا بلدنا وبيصفوها بالعفن اذا كانت حقيقية ،،،بقول ليهم والله عيب عليكم البتعملوه هذا البتقولو عليه عفن هي الدولة الوحيدة الاحتضنتكم واحتمت بيكم وفتحت ليكم ابوابها بدون تأشيرات واقامات،،،هل هكذا تردون الجميل،،هل هذا هو جزاء الاحسان،،، انما نطعمكم لوجه الله لانريد منكم جزاءً ولاشكورا.
الموضوع للنقاش
#اخوكم فتحي حامد نارتي
-
-
-
-
-
-
-
-
