عجبنا وسر بالنا القرار التاريخي الخاص بفك الحظر عن بلادنا ووضع السودان، تحت الاختبار لمدة ستة أشهر (عاد ما بنقدر نقول شيء)، والقرار اتخذه باراك أوباما وأمد ولايته في الرمق الأخير.. أهااا بعد الستة شهور عاد حسب كديسة (ترامب)، وفي مقال سابق طلبت من حكومتنا تكسر تلج لهذا الترامب عشان ما يتنفسن علينا عندما يتم تنصيبه رسمياً.
والحقيقة التي لا تتناطح فيها عنزتان أن الشعب السوداني عانى أيما معاناة من هذا الحصار المفروض منذ تسعينيات القرن الماضي. اكتوى الشعب بويلاته طحناً ورهقاً، وتجني دفع الشعب ثمنه على حساب تعليمه وصحته وأمنه وغذائه وكسائه. دفع ثمنه وهو يجتر خطباً عصماء لأكثر من ربع قرن من الزمان تحكي عن أسباب الحصار وأسباب معاداة الغرب لنا هو التمسك بحبل الله المتين والتوجه الحضاري والهجرة إلى الله ، وشنو ما بعرفو داك. والله لو كنتم مخلصين بالتمسك بحبل الله المتين ما كان انقطع منكم وبقى كلامكم لي وراء ولي قدام لكن (لسانكم الخواجة) هو سبب آلامنا ناس أمريكا روسيا قد دنا عذابها، والعذاب تجرعه الشعب وبي فهم.
وأيضاً من الجلالات (ما دايرين الماكنتوش بناكل الفول مع القرقوش)، نحن من أكل القرقوش وحااااف كمان، بالمناسبة عارفين ربع الفول عمل كم؟.. كدى اتكرموا واسألوا منه !!
أهاااا كل المعاناة السالفة الذكر بسبب سياسات الحكومة الخرقاء العرجاء العمياء، لأن شتمكم لأمريكا وعداوتكم غير المبررة لها، الشعب هو من دفع ثمنها باهظاً غلاءً وفساداً وتحللاً وبعد ده تقولوا حبل الله المتين؟ .. تتشاكلوا وتتصالحوا وتجتمعوا وتنفضوا وتسافروا وتتفاوضوا مع معارضين كل همهم هذا الكرسي وأنتم تعلمون هذا جيداً، لكن طبعاً مستحيل تتنازلوا ليهم، بالمناسبة بسأل من نفسيات ياسر عرمان مع فك الحصار ده غايتو أنا شمتااانة فيه وما داساها الشماتة، لأنه لم يدخر جهداً في إبقاء الحصار على البلاد، بالله دي معارضة ولا عمالة مؤسسة، إبليس يخجل ليك يا ود عرمان، فأنت تعلم علم اليقين أن المهمشين الذين تدعي زوراً وبهتاناً النضال باسمهم، هم من يدفعون ثمن هذا الحصار، لأن الحكومة ومنسوبيها أمورهم (ماشة باسطة).
في الختام التجلة والاحترام لي ود الخالة أوباما وما قصرت معانا وحات الله، لأنه عمره الدم ما ببقى موية، نعم نحن نتحدث العربية وهذا حدنا مع العرب اللغة، ولا شيء غيرها، يعني الإخوة الأشقاء العرب وبحث العلاقات الثنائية والعلاقات الأزلية وكلام الجرايد ده فكونا منه بالله عليكم، أهااا سؤالي لي ناس الحكومة شماعتكم الجديدة بتاعت المعاناة شنو بعد أمريكا رضت عنكم؟
راي:بت محمود
صحيفة آخر لحظة
-
-
-
-
-
-
-
-
