ونسة نسوان وقعدة جبنة

لملمت حبوبة العطايا عدة الجبنه ونادت بی فوق للحيطة ؛ التايه .. التاية .. التوويا هوووي ..تعالى ونادي معاك حاجة السرة ، الجبنة ، النار ولعت ..
لحظات والراكوبة اتملت ، العناقريب ، البنابر وحتى المصلايا فرشوها وقعدوا فيها .. ودورت فناجيل القهوة شمال ويمين وبدت الونسة ..
الحرم ماجات الليلة مالا، مأمن عوايدا … والله شايفا لي عربية وقفت هسي قدام باب بيتهم … هوووي هوووي يا حبيبتي دی عربية حاج عبدالقادر سامعا لي طقة فی الحلة قالوا بدور العرس ..
والله يستاهل ..اها النديكن الشمار ده وستو هسی قاعده معانا فوق جبنتنا دی …
اها شنو ؟
بعد آروق راسی واظبتو تمام واشرب التنی بكلمكن ..
السرة ، النبي ، الرسول كان ما كلمتينا
ابيت …
القطاعة تقطعك حته حته
يا النبي منكن يااخواتی صبرا يبل الابری ما عندكن خلاص سمح ، اها افتحا لي اضنيكن ..
اها شنو قولی شحتفتی روحنا
الشمار ده عاد ما حار يا أخواتي ، اها وحات الله وفي شبابی وفي أولادي سمعت قالوا حاج عبدالقادر داير السيدة بت محجوب القاعدة حداي دی …
والله كان كدی جاتك ليلة القدر يا السيدة بت محجوب !!!
والله بخيت عليك
مبروك
مبروك
السيدة اتنفضت وقامت وقعدت : هوووي ، هوووي ، مبروك شنو انا مالی بعرس ده ، قالوا ليكن انا بايرة ولا عايرة ..
ها بت ها اهبطی فی الوطا دی ، مالو الراجل ده عيبو شو ، محن يا يمة بنات الزمن ده !!؟
بری .. بری .. ابرا منو ، الراجل ابوشا زي بودن الهوستن المظلط ده ؟ ما بدورو ، وحات الله اشوف الموت ما اشوفو …
ها الغبيانه دی مالو عيبو شنو ، راجل السرور ، اريتو راجل الرضية بتی
هييي هييي هييي .. مبرووك عليك وعلی بتك .. يا يمة اعرسو عشان شخصيتو ولا عشان جلابيتو .. الخشم أكان راكوبة دكان حاج العبيد مشلع شليع السواد والرماد ..
والله فی المثل بيقولوا الشقی ما بتساعد ، ها بنية النعمة جاتك ما ترفسيها بی كراعك ، وماتحنی فی حال أبوك المن صباح الرحمن فی السقط ده اتعطن فی الترعة أكان القعونجة فی الموية ، ومن التعب والشقا كان فضل ليهو يقول غاق .. غاق ..
يعني دايرانی ابيع روحي بالقروش واعرس لي زول أكبر من ابوي ، سنتين تلاتة وأبقى ليهو ممرض ، السيدة عصری لی كراعی ، السيدة عصری لي ضهری .. ودونی الحكيم وجيبونی من الحكيم ؟؟؟
هههههههههههههه … والله كان كدی انتی ما ناقشة أي حاجة !!!
كيف ما ناقشة ؟
ها المقفلة دی كان عاش بتتمتعی وكان مات ريح بتورثی .. ما سمعتی بنات البندر بغنن بقولن شنو ..
بقولن شنو ؟
راجل المره حلو حلا هههههههههه …
وهسی جنيات الزمن ديل باقي ليك بعرسو ، والواحد كان عرس بمسك ليهو مره ؟ وحات الله المسعولية دی تاني غير راجل المره زول بقدرا مافی …
والله !!!
والله .. وهسی عاينی لی أبوك ده المسعولية الشايلة دی أولاد الزمن ده بقدروا عليها ، وحات الله تاني العرس ده إلا راجلا كلس .. مالك يا السيدة قاعدة فوق اضنيك ، ماشفتی بی عينيك بت حليمة وبت الرسالة وبت خجيجة ، الجنيات كلهن طلقوهن وشردوا وضربوا ليبيا وكل واحدة خلوا ليها تلاتة وأربعة اطفال ، حال العدو ..
اما والله فی دی عندكن حق ، لكن والله انا خايفة ..
لا لا ، ما تخافي
اها ما اخير ليك حاج عبدالقادر
يايمة حاج عبدالقادر بی نخلوا وبی بيوتو وبی عرباتو وبی قروشو
والله انا بس عشان كبير .. انا عارفاهو زول كويس
هوووي يا بت هوووي والصبيان نجيبهم ليك من وين
هی دحين الحلة فضل فيها راجل ، الفات ليبيا والفات السعودية والفات الدهب ..عيييييك الحلة بقت صقيعة ، وحات الله هسی أكان مات زول إلا يكفننوا النسوان ..
لكن اسمعی شورتی ونصيحتی ليك قبل ابوشا زي بودن الهوستن المظلط ده يغير رايو ولاتختفو واحده منك ، والمثل بقول جراده فی الكف ولا الف طائرة ..
والله
والله
لكن انا عندی شروط ..
ومالو تشرطی طوالی ، اها دايرة شنو بالسيدة ؟
بس بيتی وعيشتی تكون برأي ….
أي يووووی .. ای يووووی ،
يوووووووووووي ، يوووووووووووي ..

احمد بطران