الصادق ابوعيدة… كل الترحيب بالمبدعة السودانية الهوى والوجدان والانتماء … الاعلامية المثابرة .. المجتهدة … صاحبة الامكانات المتعددة ..والقدرات الفنية المتنوعة .. من أعلامنا التي نفخر بها ونفاخر …سعدنا بطلتك وحضورك بيننا .
حبابك الف … نورتينا … عبر فضاء هذا القروب الافتراضي ..مهرجان التقرير التلفزيوني …المتخصص في صناعة وانتاج التقارير التلفزيونية … نشكرك على قبولك ان تكوني في إيهابه لهذا اليوم …
حبابك يا مبدعة وسط اعلاميي وقامات بلادي وبلادك? بكل مقاماتهم النبيلة ..
مبسوطين بطلتك ونورتي وشرفتي ..
✍ الصادق ابوعيدة…
كمدخل للتحاور …
? حابين نقف على تجربتك الاعلامية ..بداياتك والمحطات التي عملت فيها حتى الان ؟
? مسيرتك في صناعة وانتاج التقارير ؟
? تجربتك كمراسل حربي في مناطق النكبات والنزاعات ؟
? الخبرات المكتسبة في ذلك ؟
? كيف يبني الاعلامي نفسه بنفسه ويكون احترافي ومؤهل ؟
✍ شهر زاد فتح الرحمن… اهلا وسهلا بالاعلامية المتميزة رفيدة يسين مراسلة قناة اسكاي نيوز . اهم مواصفات المراسل الناجح ؟وماهي اساسيات التقرير المتكامل الذي يوصل الرسالة بكل وضوح؟ماهي الصعوبات والمشاكل التي واجهتك خلال مسيرتك الاعلامية وتجربتك الفريدة؟ماهي آهم آدوات الاعلام الغربي في توصيل الرسالة الاعلامية . ؟
✍ رفيدة ياسين … انا مستعدة لأي شيء..بس برضه الفكرة انه كلنا بنستفيد من بعض وبنكمل بعض..بتبادل المعرفة والخبرات المختلفة..
✍ رفيدة ياسين… اعتقد انه اي زول عايز يكون مراسل ناجح بيكون اذا عنده الإرادة الكافية فقط هناك مهارات مهمة جدا…الثقة بالنفس هي الأساس لانها اللي بتخلق حالة الeye catching لدى المشاهد..التعامل مع الأخبار بدقة..الجرأة..المصداقية..سلاسة التعامل مع الكاميرا كأنها صديق..الالتزام بلغة سهلة وبسيطة في الحديث اثناء اللقاء المباشر الlive..يكون السرد بيعتمد على اكبر قدر من المعلومات في اقل وقت ممكن من الزمن
✍ رفيدة ياسين… المقدرة على خلق شبكة علاقات عامة مهم لأي مراسل
✍رفيدة ياسين.. اساسيات التقرير هي التوازن…والفرق بين كتابة التقرير الصحفي والتقرير التليفزيوني انه الأخير بيكون كتابة على الصورة…التركيز على عكس الجانب الإنساني في اي تقرير بيجعله اكثر تأثيرا على المتلقي..كلما كانت الجمل اقصر في كتابة التقرير التليفزيوني كلما كانت أفضل…اختيار بداية التقرير مهمة جدا من حيث الصوت والصورة…
اهم حاجة انه المراسل يكون على استعداد تام للتعامل مع المفاجآت في الميدان..
✍رفيدة ياسين … الصعوبات كتيرة جدا…قد لا يتسع الوقت ولا المساحة لذكرها جميعا…لكن دعوني اخبركم بصراحة شديدة ودون تجميل للكلام انه انا فتاة طموحة اكتر مما يجب وده خلاني اتعرض لمواقف قاسية يمكن حتى فاقت مقدرتي على الاحتمال وانهكتني نفسيا بس برضه ادتني خبرات يمكن ما اتوفرت لناس أكبر مني فالسن…
المراسل في الميدان هو قائد فريق العمل وهو صاحب القرار امام المؤسسة..بس المراسل الناجح هو اللي بيكون مدرك انه دور المصور او مساعد الكاميرا او ال producer لا يقل أهمية عنه ان لم يكن اهم…يعني وهم النجومية والاهمية على باقي الفريق ده ما بيخلق مراسل ناجح أبدا على العكس تماما بينتج عنه كائنات نرجسية منتفخة بالوهم عمرها ما بتتعلم ولا تتطور
✍ رفيدة ياسين … يعني الإيمان بروح الفريق هي الأهم في العمل الميداني
✍رفيدة ياسين … في سؤالين ما رديت عليهم عن الاعلام الغربي والصعوبات اللي واجهتني هرد عليهم بشكل سريع عشان أكون نسيت حاجة لأي زول
✍ رفيدة ياسين… الاعلام الغربي أدواته مختلفة تماما عن الاعلام العربي انا اتوفرت لي فرص حضور ورشات عمل وتدريب في سكاي نيوز في لندن وفي الCNN في أمريكا…وكمان كنت مهتمة بزيارة BBC WORLD
✍نس الامام.. هل معني كلامك يا استاذة رفيدة إنّو معايير التقرير في الاعلام العربي والغربي مختلفة ؟؟
رفيدة ياسين … الاعلام العربي هو اللي ممكن يجسد معنى السلطة الرابعة..وبيهتم بعمل المراسل وبيقدره اكتر من عمل المذيع الموجود في الاستديو..
احنا اعلامنا ناقل لحدث او لا حدث احيانا..
الاعلام الغربي لا يكتفي بنقل الحدث بل يصنع الحدث احيانا..كمان مساحات الطرح وحرية التعبير مافي مقارنة بينا وبينهم
✍ رفيدة ياسين …يعني الإعلامي في بريطانيا وأمريكا اهم من اي مسؤول حكومي
✍ ايمن بشير.. سلام عليكم رفيدة يس ..
تجربة انسانية فريدة تغطيتكم الحرب السورية عند الحدود التركية وظننا انها احدثت تحول كبير فى مسيرتك المهنية ..
ننتظر تعليق حول التقارير التى قمتم بنشرها فى تلك الفترة ومايميز التقارير التى تاتى فى مثل هذه الظروف . ? رفيدة ياسين .. كمان الاعلام الغربي بيهتم بالصحافة الاستقصائية جدا احنا في الاعلام العربي عندنا نقص حقيقي في الصحفيين المتخصصين في الصحافة الاستقصائية لانها مكلفة جدا وتستغرق وقت وجهد كبيرين
? رفيدة ياسين…بصراحة شديدة اذا مافي صرف وميزانيات ما هيكون في إعلام مؤثر ولا كوادر منافسة على مستوى إقليمي وعالمي
✍ أنس الامام.. قلتي إنّو الاعلام الغربي يصنع الخبر
كيف
? رفيدة ياسين ..طيب تجربتي في سوريا فعلا شكلت فرقا مهنيا في شغلي بس انهكتني على كل الاصعدة وكل حاجة ليها تمن طبعا
?رفيدة ياسين…يصنع الخبر يعني يفجر القضايا ويصنع منها احداث مؤثرة على الرأي العام
✍ ايمن بشير.. بالتاكيد..
لقد راينا رفيدة مختلفة رفعنا لها القبعات احتراما ..
✍ محمد عليش… من الشخصيات المهمه التي أجريتي حوارا معها؟؟
?رفيدة ياسين … يمكن حواراتي السياسية هي الكانت واضحة وملفتة للناس بس الحوار اللي كان مهم بالنسبة لي انا كان مع محمد وردي قبل وفاته بفترة ما كبيرة
✍ رفيدة ياسين … بالنسبة للناس كان حواري مع سلفاكير
✍ محمد عليش.. هل بتفضلي العمل من موقع الأحداث ام الحوارات وفق برنامج داخل استديو…لو خيروك مثلا
?رفيدة ياسين … خارج السودان أفتكر انه اهم حوارين
الاول أني اجريت اول حوار مع عبد الحكيم بلحاج القيادي الليبي وفجر فيهو معلومات عن القاعدة وعن تعامل الحكومة السودانية مع الإسلاميين الليبيين
التاني كان مع رئيس اقليم كردستان العراق برزاني
✍ شهر زاد فتح الرحم.. الحرية الصحفية هل متوفرة نوعا ما في الاعلام الغربي ام شعارات فقط؟
? رفيدة ياسين …لو خيروني بفضل الميدان بس في أماكن اتعرضتا فيها لخطر بيمنعني ارجع ليها تاني
✍محمد عليش… ده عمل ممتاز اذا كانت بدايه عملك الاعلامي..ودافع للمزيد من العطاء يارفيده
✍ محمد علي.. العمل الميدان خطر فعلا .. وفيه نوع من المغامرة
? رفيدة ياسين .. مافي حرية كاملة مية في المية في اي وسيلة إعلام في اي مكان…لانه راس المال بيفرض الاجندة دايما
?رفيدة ياسين… بس لو المساحة عندنا ١٠ في المية في الاعلام الغربي ٨٠
✍حسن الرشيد .. نصائح وقواعد ومهارات لقیتیها فی الورشات وکان لیها اثر فی تقدمک؟
? رفيدة ياسين .. اي زول بيدعي انها ١٠٠ في المية في اي مكان يبقى بيقول شعارات ساكت
✍ محمد عليش.. الحريه في الوطن العربي نادره…في السودان منعدمه…في امريكا مفتوحه حسب القناة والاجندة
? رفيدة ياسين… بس هديكم مثال بسيط انه الموظفين في بي بي سي عملوا إضراب عن العمل ووقفة احتجاجية ضد إدارة القناة والقناة نفسها نشرت الخبر ده للموظفين ضمن النشرة اعتقد دي مساحة ما ممكن تكون عندنا أبدا لانه البيعترض ساكت بترفد
✍ شهر زاد فتح الرحمن…عصارة التجربة التي خرجتي بها من عملك في قناة اسكاي نيوز ومفهوم ترسخ في زهنك من هذه التجربة؟
? رفيدة ياسين….انا لسة محتاجة اتعلَّم حاجات كتيرة إنما بالنسبة لورش التدريب دي اتعملت فيها إسعافات أولية ونصائح للتعامل مع اخطار الميدان وتدريبات من ناس كانوا بيخدموا في الجيش البريطاني والأمريكي والمؤسسات بيستفيدوا منهم بعد التقاعد في خبرات الجوانب الأمنية والعسكرية
?رفيدة ياسين… علموني اعرف انواع الأسلحة ومدى الرصاصة او القذيفة وعلموني كيف اتعامل لواتخطفتا
ولو اتعرضتا لاصابة
✍ شهر زاد فتح الرحمن… اهم الجوانب التي يجب توفرها في المراسل او الصحفي حتي يصبح مؤهلا للعمل خارج السودان
✍ جمال جعفر…انطباع اﻻعﻻم الخارجي عن الكادراﻻعﻻمي السوداني.
?رفيدة ياسين … سكاي نيوز تجربة مهمة جدا في حياتي لي فيها ٥ سنين لحد الان…
بيسموني فيها الجوكر لانه اشتغلتا فيها حاجات كتيرة وفي غالبية الأقسام تقريبا مراسلة ميدانية وفي ديسك الأخبار وقسم المراسلين ومنفذة نشرات ودخلتاًجاليري والآن لي فترة في الراديو طلبتا نقلي لفترة محددة لاكتساب خبرة العمل في الراديو…وكمان بتنقل بين التليفزيون والراديو..يعني تجربة مهمة في حياتي المهنية
? رفيدة ياسين …طيب أهم الجوانب لعمل المراسل خارج السودان..يا جماعة اللغة مهمة جدا لازم جدا الزول البيشتغل في قناة خارجية يشتغل على نفسه في اللغة الانجليزية..
كمان باختصار أقوليكم حاجة..القرص تنتزع لا تعطى على طبق من ذهب..
?رفيدة ياسين… يعني بالبلدي كده لو ما بتعرف تقلع حقك ما هتقدر تشتغل في قناة خارجية لانه المنافسة شرسة لو انت زول مسكين بتنداس عادي مافي زول هيشوفك أصلا
✍ عوض الفاضل.. حبابك عشرة الاستاذة رفيدة
كيف اصنع تقرير تلفزيونى ناجح؟
كيف تتعامل رفيدة مع الاشاعات والنقد والتهديدات الطائشة
? رفيدة ياسين … عارفين احنا مشكلتنا كسودانيين بنخجل من فكرة الشو اوف وتسويق النفس…الجنسيات التانية بتكون خبراتم ومعرفتم اقل مننا بكتير وبيعرفوا يسوقوا نفسهم أحسن مننا..
? رفيدة ياسين ..طيب بتعامل مع الإشاعات والتهديدات بالتجاهل بقعد اضحك بس وبطنش..اصبح جلدي خشن في التعامل مع الحاجات دي لانه لو ركزتا معاها عمري ما همشي لقدام..المهنة دي ما بتتحمل زول هش أبدا…
اما النقد اذا كان موضوعي بهتم بيهو جدا وبستفيد منه مافي زول أبدا كبير على انه يتعلم ومافي زول ما بيغلط إنما لو نقد هدام فبرضه بطنش عادي وبواصل طريقي
✍ الامين الزبير… تحياتي وتقديري .. الزميلة رفيدة يسن
مرحب بيك حبابك طن .. ?
? الإعلامي القادم من الإذاعة اي الذي ابدا عمله الإعلامي عبر مايك المذياع بعيدا عن ضوء الكاميرا ورهبتها يكون أكثر نضوجا وثقة بالنفس من نظيره الذي ابتدأ مباشرة عبر الشاشة هل يعني ذلك أن البداية عبر الإذاعة تكسب الإعلامي تلك المهارات ام المسألة لها أبعاد سيكولوجية ؟
الأمين الزبير ..
مراسل تلفزيون السودان . السعودية.
✍ ماريا الحسيني … الاستاذة رفيدة ياسين يا الف هلا بيك وموفقة دوما .. ما هي مفاتيح التسويق لعمل المراسل ?
? رفيدة يس…كيف اصنع تقرير تليفزيوني ناجح…
القصة محتاجة تحديد هو تقرير عن شخصية بروفايل يعني ولا عن قضية او موضوع لانه الاتنين مختلفين…
تقرير الموضوع بيحتاج توازن في الطرح يعني عرض آراء الأطراف المختلفة مصحوبة برأي تحليلي…مع التركيز على sequence الصور..الجمل في الكتابة لازم تكون قصيرة عشان النفس في القراءة يكون في رتم واحد..كمان اللغة مفروض تكون بسيطة وسهلة..وانه يكون مليان بالمعلومات التقرير..
تاني اختيار بداية التقرير مهمة جدا فيما يتعلق بالصوت والصورة خاصة الnatural sound
✍ محمد عليش.. فعلا يارفيده فكره قلع الفرص والمنافسه الشرسه حقيقيه..
✍محمد عليش… خصوصا في القنوات العربيه الخارجيه..
? رفيدة ياسين .. غير انتزاع الفرص مافي زول هيديك حاجة على الجاهز
✍ محمد عليش… اذكر من غير اسماء ان سوداني خبره اكثر من 20 عام بالقنوات وكتابه البرامج زول صاحب تجربه..تم تعينه بقناه عرببه خارج الامارات…ومع المعركه الشرسه وهو زول خجول ومحترم..لم يستطع. .ومن وظيفه shif editor نزلوهو producer اربعه درجات وظيفيه…
?رفيدة ياسين.. طيب بالنسبة للإذاعة هي تجربة ثرة ومهمة جدا…دايما اشطر المذيعين في التليفزيون اللي اشتغلوا مراسلين في الميدان واللي اشتغلوا في الإذاعة…
بس ما اي مذيع إذاعي حتى لو شاطر بيقدر يشتغل مذيع تليفزيوني لانه مهارات الصوت وحدها ما كافية للعمل كمذيع تليفزيوني هنا قوة الشخصية والكاريزما والحضور عندهم دور اكبر من الصوت بكتيييير جدا..
مواجهة الكاميرا والتعامل معاها مع لغة الجسد مهارات قد لا تتوفر لدى مذيع في الإذاعة
? رفيدة ياسين … انا عن نفسي بديت شغل ٢٠٠٦ في الصحافة الورقية وما بديت شغل تليفزيوني الا في ٢٠٠٩ تقريبا…برضه حسّيت أني محتاجة لخبرة الإذاعة لأَنِّي ما مريت بيها وأول ما فتحوا إذاعة في القناة حبيت أخوض التجربة لفترة محددة فقط
✍محاسن سيد احمد.. برضو الاذاعة عندها خصائصها . بتضييف للاعلامي . كتيير.. خاصة ف مهمة توصيل كلامك بالصوت بس .
?رفيدة ياسين: كيد الإذاعة بتضيف كتير بس هي ما شرط للعمل كمذيع او مراسل..
انا مثلا جربتا وحسيت انه ما بنفع مذيعة في الإذاعة لانه طبقة صوتي رفيعة شوية او حسب ما وصفني البعض صوت طفولي بنفع اكتر في برامج منوعات إذاعية ما اخبار ?
وكمان عندي مشكلة صغيرة في حرف الراء…معوق شوية عندي ?? بس ما ظاهر شديد..التليفزيون الصورة بتغطي إنما الإذاعة فاضحة لمشاكل الصوت والحروف
?رفيدة ياسين: انطباع الاعلام الخارجي عن الكادر الإعلامي السوداني سؤال عام جدا لانه مافي انطباع واحد بس معروف عن السوداني انه مخلص في شغله وجاد وما بيحب الحقارة..بس كمان في حاجات سلبية زي عدم الاكتراث الشديد للمظهر مثلا والعصبية في بعض الأحيان
? رفيدة ياسين: في زول سألني عن مفتاح حاجة كده تقريبا بس عموما الثقة بالنفس هي مفتاح كل الأبواب على الإطلاق حتى لو الزول ما مؤهل بشكل كلي
? رفيدة ياسين: كمان مرحبة بأي نصيحة او نقد أو مقترحات انا كمان حابة أستفيد واتعلم منكم
✍الصادق ابوعيدة: ⚪رفيدة ياسين ..مسيرة حافلة بالاحداث والوقائع …ما المطلوب ان يتوفر في المراسل الميداني ؟
⚪هل بالضرورة المراسل يصور ويمنتج ويكتب…؟
⚪ حسب خبراتك ..كيف نكتب للصورة ؟
لمحات من تجربتك في تغطية الثورة المصرية.. وتغطية الاحداث في ليبيا ..الاحداث السودان ..مع الدروس المستفادة من ذلك للفائدة العامة ؟
? كيف واجهتي المخاوف .. وانتي بنت …وفي مجاهيل ردود فعلها غير متوقعة ؟
? كيف تغلبتي على قلقل اسرتك وانتي في قلب الاحداث ؟
? رفيدة ياسين: في حاجة مهمةنسيت أقولا فيما يتعلق بموضوع التقاريرالتليفزيونية انه في عناصر مهمة مقروض تتوفر في التعامل عن اختيار الصورة هي العمق والتكوين والتباين…والتركيز على انه الزول بيكتب نص على صورة يعني لازم يعبر عنها بالحرف لتحقيق حالة تكاملية بين الصورة والحرف للمتلقي
✍يحى البحاري: بعد التحية.
الى إي مدى ساهمت مسابقة فتاة العرب في فتح أبواب القنوات الأجنبية. بالنسبة لك.
? رفيدة ياسين: طيب ردا على الأسئلة الاخيرة:
اولا قصة انه بت دي انا كمان بت وحيدة في بيتنا بس والدي الله يعزه ما معترف انه أنجب بنات أساسا ???
✍محمد عليش: في ناس بتفضل تبدا في تصوير التقرير ومن ثم تفرغ الصوره حوارا …رايك شنو؟؟
?رفيدة ياسين: المهم نرجع لموضوعنا..
المطلوب انه يتوفر في المراسل الميداني انا ذكرته بالفعل مسبقا هو الجاهزية للتعامل مع المفاجآت وحسن التصرف معها..
الثقة بالنفس..
إقامة شبكة علاقات عامة والاحتفاظ بمصادر مختلفة للحصول على المعلومات..
السرعة في التعامل مع الخبر مع مراعاة عامل الدقة..
كمان مهم انه الواحد يفصل نفسه من حيث الجانب النفسي عن الحدث وده شيء صعب جدا انا شخصيا احيانا كنت بفشل فيهو لانه بتأثر بالاحداث الانسانية تحديدا العنف تجاه الأطفال والنساء..
?رفيدة ياسين: طيب يا الصادق قصة انه المراسل يكتب ويمنتج دي مهمة شديد..ليه؟؟
للاسباب التالية
انه في وقت الأحداث الساخنة البيكون مهم هو الqantaty ما الquality يعني ما شرط المراسل يكون محترف في التصوير بس لازم يكون عارف يتعامل مع الكاميرا ويتصرف اذا هو في مكان ما موجود معاهو مصور عشان ما يفقد توثيق الحدث..
كمان لو المراسل بيعرف يصور بيكون في لغة فهم بينه وبين المصور حول المصطلحات وحجم الصورة ونوع الكاميرا نفسه وطريقة التسجيل وهكذا..عشان كده احنا مرينا بتجربة الفيديو جورانليست او الون مان كرو..بس ده ما بينفع الا حالة الاخبارالسريعة أوالأحداث الساخنة بس ما بينفع في شغل إبداعي زي التقارير الطويلة والافلام الوثائقية لانها تتطلب مصورين محترفين جدا جدا
? رفيدة ياسين: هي كانت تجربة لطيفة بس ما ساهمت في طريقي اللي انا اخترته لاحقا لانها فتحت لي أبواب وقتها انا ما حبيت أواصل فيها عشان عمري ما قدمتا نفسي كفتاة عايزة تركز على شكلها إنما بالعكس اخترتا طريق قاسي عشان أقول أني ما مجرد صورة…يعني حبيت أكون امرأة فكرة
✍ شريف محمد الحسن: رفيدة سلام لماذا لم تقومي بعمل تقارير حول تجربة بث برامج ذات طبيعة وتاثير علي علي العالم العربي ومعلوم انها صنيعة غريبة تستهدف الشباب العربي في دينه واخلاقه وقيمة ومثله عرب ايدول…من سيربح المليون… ذا فويس… ارابس قوت تالنت وغيرها
?رفيدة ياسين: فعلا كبنت واجهتا مشاكل كبيرة في مناطق النزاعات تحديدا..ما هكذب عليك واقوليك ما بخاف بس بعرف أواجه خوفي بمقاومته بصورة مضادة..وكنت بضطرا آكون قوية وجادة اكتر من اللازم عشان افرض شخصيتي على كل من حولي وما اسمح لزول انه يختصرني في التعامل كأنثى ضعيفة مثلا..بس ده خلاني فتاة شرسة الى حد كبير لانه كنت بقاوم في طبيعتي
✍داؤود محمد داؤود : مرحبا بالإعلامية رفيدة .
مرحبا بك بين أهلك و زملائك:
سلسلة التقارير التي أنجزتها في المنطقة النوبية أوقفتك على جوانب تحتاج لعودة جديدة لسبر غورها .
ماهي ؟!
و ما صدى هذه التقارير على المشاهدين السودانيين و العرب؟
و إلى أي نوع تصنف مثل هذه التقارير؟
و ما الصعوبات التي تواجهك في إنجاز مثل هذه التقارير في السودان؟
?رفيدة ياسين: بالنسبة لاهلي فأنا محظوظة لأَنِّي اتربيت وسط أسرة متفتحة ومتفهمة وداعمة الى ابعد الحدود…اهلي انا ارهقتهم وقلقتهم جدا بطموحاتي ورغم القلق عمرهم ما قفوا في طريقي ولا قالوا لي لا بالعكس كانوا طول الوقت بيشجعوني ادوني ثقة ليس لها حدود وواجهوا القلق بالدعاء والتحصين.،،
خلوني اقوليكم انه البنت اللي اَهلها في ضهرها بتقدر تواجه العالم كله بلا استثناء…
✍ انتصار محمد مختار: مرحب بيك اخوتنا رفيدة بين اهلك وأحبابك
موفقه في كل حياتك وسعيدة جدا بقرات تجربتك في الوسائل الاعلامية منك نستفيد اكتر ???
? رفيدة ياسين: اولا انا ما ضد البرامج الإبداعية والمشجعة للمواهب العربية رغم انه غالبية البرامج دي تجارية أصلا بس انا ضد التعامل مع الإبداع بعقلية المواجهة والمنع ونظرية المؤامرة العالم مفتوح على كل ان يختار ما يناسبه سواء قناة المجد او ام بي سي انت كمتلقي صاحب الاختيار..إنما البرامج دي ناجحة لانه المتلقي او المشاهد متابع وكمان بتفتح فرص لمواهب فنية فليه نقيف ضدها ممكن ننتقدا بس الشباب المبدعين زي الأزهار دعوها تتفتح وتخرج الى الناس
✍ حدثينا عن بداياتك مع الصحافة المصرية؟
والمقارنة بينها وبين الصحافة السودانية.!
وحقيقة تمردك على صحيفة المجهر السياسي. مما خلق خلافات بينها وبين صحيفة السوداني.*
✍ شهر زاد فتح الرحمن: شكرا استاذة رفيدة دايما الانسان الطموح هو اكثر الناس هما ورهقا في الحياة ونتمني ليك مذيدا من التألق والاذهار واعطيتنا ثقة في عمل الانسة خارج الوطن وكنتي مثل اعلي في بلوغ آسمي الغايات مع توافر الرغبة والطموح. والي الامام دايما .
?رفيدة ياسين: طيب الصحافة المصرية حقيقة مدرسة مختلفة وانا كنت محظوظة في الاحتكاك باشخاص مؤثرين زي هيكل كان مستشارلصحيفة الشروق التي كنت اعمل بها وكتاب زي علاءالاسواني وهاني شكر الله وروائيين زي صنع الله ابراهيم وإبراهيم عبد المجيد الخ…الصحافة المصرية دخلتا من خلالها أقسام شرطة وأوكار واتعرفتا من خلالها على عوالم وسط البلد وخلقت لدي قاعدة علاقات لا باس بها…إنما الصحافة السودانية برضه رغم انه المساحات فيها ضيق الا انه الفرص بالنسبة لي كانت اكبر ولقيت دعم من ناس كتار وقفوا جمبي…الصحافة المصرية بتعرف تلعب مع السلطة الى حد ما الصحافة السودانية فيها مبدعين كثر بس الجو العام محبط وسيء لانه ما بيعتمد على الكفاءة والعدالة في توزيع الفرص ما لم تتماهى بشكل كامل مع السلطة حتى وان حاولت السباحة ضد التيار ستكون في حالة مقاومة وإرهاق مستمرين وستبذل نصف طاقتك في المقاومة للطقس العام والنصف الاخر في العمل… اما موضوع تمردي على المجهر ده فأنا ما فهمته انا ما حصل أصلا عملت في هذه الصحيفة عشان أتمرد عليها
? رفيدة ياسين: السوداني تجربة مهمة اضافت لي وكمان أفتكر أني لم ادخر جهدا فيها للعطاء
✍محاسن سيد احمد: فعلاا وصفتي الصحافة السودانية . ووصف ??
نحيي المهنية العالية والثقة ..
ان شاء الله دايماا موفقة . ?
✍ رشا مهدي … سلام عليكم ورحمة الله .هل يمكن اعادة التقرير مع اضافة احداث جديده
? رفيدة ياسين: مفروض المراسل يكون ماشي للتصوير بفكرة أولية للسيناريو قبل ما تكون عنده المادة المصورة ..وبعدين مدة التقرير التليفزيوني الجيد مفروض يكون في حدود من دقيقة ونص الى ٣ دقايق بالكتير اذا كان الامر يستحق..
بعد التصوير قد يختلف السيناريو لانه الصورة هي التي تحدد مسار النص..
في خطا كبير بيقعوا فيهو مراسلين انهم يصوروا مادة كتيرة جدا ولقاءات طويلة تعطل إنجازهم للمهمة عند العودة للكتابة والمونتاج..
اذا التقرير دقيقتين او ٣ ويكون تم تصوير اكتر من ١٠ دقايق يبقى تضييع زمن..
ده في الأخبار طبعا.. اما في العمل الإبداعي انا قبل كده استغرق مني ومن مصور لتصوير مشهد واحد ٢٤ ساعة
? رفيدة ياسين: عشان يقدر يتلقطلي لحظة معينة في مكان فيهو طبيعة
?رفيدة ياسين: الإعادة بتصلح في الاستخدام عند تطور نفس الحدث فلابد للعودة الى خلفياته ومن ثم اضافة الأحداث الجديدة لكن يجب ان تكون في مكانها يعني ما ينفع نبدأ بشيء قديم بل بمحور التطور ثم العودة فيما بعد للخلفيات والصور القديمة في السياق
? رفيدة ياسين: تصدقوا انه رغم أني مشيت أماكن اكثر خطرا وسوءا الا انه ممارسة العمل الاصعب بالنسبة لي كانت في السودان…انا بجد صعوبة بالغة في العمل في بلدي بصراحة شديدة جدا..لتعقيد الإجراءات والتصريحات والتصديقات حتى بعد الحصول عليها يواجه مشكلة الشرح والمواجهة في كل صغيرة وكبيرة ده غير المكايدات غير المنطقية ودي حاجات بتهدر زمن كبير..وتؤثر على الانتاج العام
? رفيدة ياسين: الفيلم الوثائقي اللي اشتغلته عن النوبيين استغرق مني أربعين يوم من العمل المتواصل بلا توقف ما كنّا بنوم اكتر من ٣ ساعات بالكتير وفي ٣ ايام متواصلة ما نمتا فيها ولا ساعة واحدة حتى…
في وسط الشغل ده في أمن احدى الولايات بعد أمضينا ٣ ايام تصوير تعبنا راح هدر لأنهم بيتخيلوا اننا مفروض ناخد إذن استباقي منهم واحنا أصلا حاصلين على تصريح بالتصوير من الخرطوم من الاعلام الخارجي للتصوير في كل الولايات اللي احنا هنزورا في الطريق…وهما ما معرفين بالتصريح العندنا عشان ما طلع منهم تحديدا وبالتالي اتمسح كل شغلنا تقريبا بلا اي سبب ولا فهم
? رفيدة ياسين: رغم أني كنت شغالة شغل حضاري وثقافي بيخدم السودان بس واحد ما فاهم ولا عارف ممكن يبوظ لي شغلي كله بدون
بدون وعي
✍محاسن سيد احمد: والله مشاكل غريبة . ما مبررة .
السياحة مهمة . وتعريف البلد بالاخرين . . دا اساااسي ف الاعلاام
✍محاسن سيد احمد: التوعية والتثقيف والاعلام و …
?رفيدة ياسين: احنا أصلا عندنا تصريحات كان للتصوير مسبقة يا رشا بس في ناس حافظة ما فاهمة..
بس زول ممكن يشخصن الأمور لانه ما تم إخطاره..لانه انا كجهة عمل خارجية بتعامل مع المركز فقط ما مع الولايات
? رفيدة ياسين: المركز هو المطلوب منه يخاطب الولايات بحضور اي وفود المهم في النهاية إنتي زمنك بيضيع بسبب ناس ما عندها موضوع عادي يعني
? رفيدة ياسين: المهم بس انه الواحد يعرف يتعامل مع محيط البيئة اللي هو فيها ومع كل الناس
✍ محمد عليش: حاجه مؤسفه انو مجهود كبير زي دا يمسحو فرد اي كان وظيفته… موضوع الاذن للتصوير اصبح معقد في السودان..
? رفيدة ياسين: بس هو ده اللي بقصده انه في السودان الأمور اكثر تعقيدا
✍محمد عليش: كمان في ناس بتكسر الكاميرا كما حدث لزميل وهو بغطي احداث العصيان السابق
?رفيدة ياسين: انما ده ما بيعني انه الناس ما تشتغل وما تقدم حاجة أصلا ما في حاجة سهلة وسلسة
✍محمد عليش: رغم انك بتمثل جهه اعلاميه معروفه وبرضو تتعرض لانتهاك حقوقك عادي
✍نهى العسيلي… مرحب بالاعلاميه الثقه والعلامه البارزه في جوهر اعلامنا رفيده ليك كل الود والامنيات والصادقات بغد اعلامي زاهر ومتطور ولكي خالص الامنيات بالتفرد والنجاح
✍رشا مهدي… طيب مفهوم الاذن ده عندهم يكون كيف هل هو شخص مسؤل منهم ام لازم تستاذنهم فردا فردا ؟ولا كيف .اذا كان التصريح بالنسبه ليهم غير معتمد
? رفيدة ياسين: أصلا في ناس مخها اتجاه واحد انا قبل كده تم القبض علي في جنوب كردفان بوشاية زول قال انه إعلامية اجنبية بتعمل شغل عن المحكمة الجنائية…وتم القبض علي واتبهدلتا واتعرضتا لتعامل مع اخلاقي واتضربتا وكل شيء..
طيب لو زول واحد بس عنده مخ انا كيف هعمل شغل عن المحكمة الجنائية في كردفان وهي في لاهاي…ثانيا انا سودانية ما اجنبية..ثالثا انا كنت ماشة الولاية بدعوة من الوالي نفسه اللي هو احمد هارون..وحتى لو احمد هارون مطلوب هو الشخص الوحيد اللي ممكن بديني تصريح عن المحكمة الجنائية…ورغم أني حاًولتا اشرح كل الكلام ده مافي زول فهم الناس دي ما بتسمع أصلا لانها اتعودت على انها تتكلم وأنها تتسمع وتخوف الناس وبس…ببساطة لانه الناس ما بتعرف حقها ولا بتعرف تدافع عنه
✍محاسن سيد احمد: ااي اصلاا ف فوبيا كاميرات الكبيرة بالزات . من بعض الجهاات .
وبعتقدو انك جااي تشوة الصورة . طبعا ف عدم وعي وواضح .
لكن هدم مجهود . كبير برضو بحتاج تبرير . ما ساي اشيل اكسر حاجات الناس . !!!!
? رفيدة ياسين: ما بيفرق معاهم الكلام ده أصلا الكاميرا شيء مزعج لأي زول ما منضبط
?رفيدة ياسين: بيتعامل معاها كسلاح وهي كذلك
✍يحى البحاري: يبدو أنك بدأت الصحافة مع شيوخ أحزاب اليسار في شمال الوادي.
ثم توجهت الى شباب اليمين جنوب الوادي!!.
✍رشا مهدي …. الجهل ايضا سبب رئيسي للفشل في اتمام الموضوع .
✍ الامين الزبير: طبعا ضوابط العمل الإعلامي لابد منها في كل دولة لكن تتفاوت طريقة التعامل انا في السعودية عدة مرات مشيت لتغطية مؤتمرات كبيرة كمؤتمر وزراء الخارجية العرب ومنظمة المؤتمر الإسلامي وللأسف مرتين واجهت مشكلة في استلام التصريح لتغطية الحدث برفقة الوفد الوزاري السوداني ولكن كنت اتحايل بالدخول بسيارة دبلوماسية تابعة للسفارة وداخل القاعة في مرة من المرات اصدمت بالأمن وحاول إيقاف العمل والدخول في تحقيقات لكن تدخل الوزير كان حينها علي كرتي شخصيا ..
كنت أقر بخطاءي لكن بيروقراطية الإجراءات ورداءة التعامل مع الإعلام موجودة في كل الدول العربية .
?رفيدة ياسين: فعلا موجودة في كل الدول بنسب متفاوتة
✍ الامين الزبير: لا أعتقد .. . !!
لانه معنا قنوات سعودية والعربية وMBC ما كلم حد غير الفضائية السودانية?
✍ حسين ابراهيم … مقدم برنامج جنود الوطن: سلام استاذة رفيدة
1⃣هل من شخصية اعلامية وطنية استندتي علي تجربتها من باب الاعجاب بها?
2⃣ و من الذي يمتعك بادائه من الاعلاميين الوطنيين?
3⃣ وبعيدا عن نظرية المؤامرة كيف يمكن التوفيق بين وطنيتنا وفهمنا للامور و سياسة القناة الاجنبية وخطها التحريري الذي قد يتصادمان احيانا?
اشكرك علي لطف مشاركتنا
✍حسام الدين حيدر … تحياتي ..وفائق احترامي للجميع ..
بخصوص السؤال حول الوطنية وسياسة المحطة او القناة التحريرية لا اعلم مالرابط بينهما فالصحفي والمراسل خاضع تماما لاخلاقيات المهنة والضمير الصحفي والامانة في انجاز عمله والاحترافية في النقل الخبري
✍ الصادق ابوعيدة.. انتقاء العبارات … واختيار المداخل الادائية في تختمة المذيع او ptc… حدثينا عن اسرار وخفايا وصعوبات ذلك ي رفيدة….
? رفيدة ياسين… في السودان ما كان عندي زول استندت على تجربته لانه نادر كان بنات يكونوا بيسلكوا الطريق اللي انا اخترته في ذلك الوقت…
انما في إعلاميين سودانيين انا احترم جدا تجربتهم واتعلمتا منها كتير وهم كثر منهم ناس كبار قامة وقيمة زي محجوب محمد صالح وزين العابدين احمد وفيصل محمد صالح وغيرهم ومن الشباب المراسلين سعد الدين حسن ومحمد الطيب وأبوبكر احمد
كمان في مخرجين مبدعين اشتغلتا معاهم زي لؤي بابكر صديق القائمة تطول
✍حسام دين حيدر… الزميلة رفيدة وضحت ان الامر متعلق بالاجراءات الحكومية ولا علاقة له بمهنية المراسل ..
هذا من ناحيةومن ناحية اخرى لماذا يتم التعامل مع المراسلين كأنهم عملاء مخابرات سواء من السلطات او من قبل بعض الزملاء في الاعلام المحلي الذين يربطون الامر بالوطنية دون مبرر موضوعي او وجود رابط منطقي بالاساس ؟؟
? رفيدة ياسين: الوطنية دي كلمة فضفاضة جدا انا اعتقد انه ما مفروض يتم استخداما كتير في العمل الإعلامي منعا على المزايدة فلتكن اخلاق المهنة هي الحكم
✍حسام الدين حيدر.. دي وجهة نظري بشكل دقيق عن عملنا كمراسلين وصحفيين عموما ….
الصحفي في مختلف وسائل الإعلام لا يتخذ موقفا سياسيا حزبيا ولكنه يتخذ موقفا سياسيا يتسق مع الحقوق الدستورية ومبادئ دولة القانون حتى بنائها ولايتخذ موقف الضد أو مع ولكنه ينتقد ويقدم نقده لواقع الحال والراهن ، الصحفي في مختلف وسائل الإعلام لا يعطي نفسه منصب الناطق بإسم حزب ما ويعبر عن موقف حزبي صارخ لا يتوافق مع مهنته ولكن بالضرورة هو ليس محل رضا بصورة دائمة طالما أنه متمسك بمهنيته وأخلاقيات الصحافة ومتجرد في إنجاز مهامه ،الصحفي يكتب رأيه كذلك بشجاعة لكن نقد تحكمه ضوابط وأسس صحفية ،ينقل الحقيقة كماهي ويعكس الواقع كما هو ويتحلى بالمهنية والشجاعة الصحفية .
المشتغل في مجال الإعلام واجبه أن ينحاز للحقيقة وأن ينحاز للحق وليس غير ذلك ، للصحفي مؤكد آراء سياسية لكنه ليس ناطقا سوى بإسم الضمير المهني لا المؤسسات الحزبية والسياسية .
الصحفي يعكس الواقع هموم الناس مشاكلهم وآمالهم عبر الاشكال الصحفية المعروفة تلفزيونيا واذاعيا ومقروء ، لايقع عليه عبء الخروج للشارع الا لنقل حراك الناس والانحياز للحقيقة .
الصحفي من خلال التقرير والخبر والتحقيق والقصة الخبرية والصورة بإمكانه فعل الكثير وتغيير الكثير من المفاهيم والتوعية بالحقوق والواجبات .
الصحفي في مختلف وسائل الإعلام من الواجب ألا يخون الحقيقة والمهنية والشعب الذي ينتظر نتائج عمله كسلطة رابعة .
✍ الرائد حسين ابراهيم. شكرا ليك
ما وددت ازعاجك بسؤالي عن الوطنية لكن مربط الفرس في فهمنا للامور لان الاجنبي لا يستطيع التفسير لبعض التفاصيل بامتدادها
عموما كما افدتي وبعض الاخوة ان شرف المهنة هو المرتكز
✍ الامين الزبير: شكرا اخي الحبيب ابوعيدة على هذا التنوع الجميل في إثراء روح التبادل المعرفي في هذا القروب التخصصي الناجح شكرا لك يا مبدع .. .?
✍الصادق ابوعيدة: حقيقة …رفيدة نموذج للاعلامي المتمكن … وصاحب اسلوب ومبدأ… ورسالة … واخلاق …سعيدين بهذا المد المعرفي والتلاقح الفكري…
نشكركم على صبركم ..وجميل مشاركاتكم …لكم التحيات
✍ عائشة عبد المجيد برااااااافو عليك الصادق
لفته بارعه منك
من كترت مامركزة زى الامتحان
شكراااا رفيدة بت البلد
✍ ابتسام كمال إعلامية متمكنة وتخطو بثقة كبيرة لها كل الاحترام والتقدير
فخورة بكى رفيدة وفخورة بحواء السودان أينما كانت
كل الشكر والتقدير لك أخى ابوعيدا
ولقروبك الناجح والمتخصص ومزيدا من التجارب
?رفيدة ياسين: طيب القصة ما فيها كفاية الPTC هي اختصار لPiece to camera
وهي بمثابة امضاء يفترض ان يقدم من خلالها المراسل محصلة تقريره ووضع بصمته الشخصية بالظهور من خلالها ومن الأخطاء الشائعة هي انه في ناس كتيرة بتختتم الptc بسؤال انا ذاتي وقعتا في الخطا ده في يوم من الأيام بس لقيت ناي علمتني ونبهتني انه شغلنا نجاوب على أسئلة الناس ما نخت ليهم علامات استفهام
?رفيدة ياسين: برضه من الأخطاء انه المراسل يكتب الptc في ورقة ويمسكا ليهو زول عشان يقرأها..مفروض المراسل يكون حافظ وعارف هو هيقول شنو وكمان عينه مباشرة للكاميرا عشان يقدر يوصل رسالته للناس وما يكون حضوره باهت
✍ الامين الزبير: ?? دي كلنا وقعنا فيها حكاية الخاتمة بصيغة الاستفهام وقصاصة الورقة
✍محاسن سيد احمد: مرات علامة الاستفهام ما موجهة للناس بقد ماهي اسئلة ملحة وتساؤلات
✍ الصادق ابوعيدة:
? الاعلامي الشامل … محتاجين وقفة منك يارفيدة ؟
? الكتابة للصورة … نصائح عامة ؟
? تطوير مهاراتنا الادائية لا سيما الصوتية ،
? هل بالضرورة ان التزم حرفيا بقواعد واساسيات التقارير بصورة تقليدية ؟
?متى اكسر القواعد المتعارف عليها في انتاج وصناعة التقارير ؟
?كيف اجعل لي اسلوبا خاصا في هذا المجال …مجال التقارير ؟
? رفيدة ياسين: اللغة مرنة دايما في طرق مخارجة أفضل من ترك علامات الاستفهام
✍زكريا محمد زكريا : السلام عليكم استاذة رفيدة
هل هنالك فرق بين التقارير المعدة لقنوات عالميه والتقارير المعدة لقنوات محليه ؟
? رفيدة ياسين: المهم رأي المتلقي اكتر من ناس الموتمر لانه رهان تقييمك الحقيقي هو شعور الناس بصدقكك
? رفيدة ياسين: حتى زعل منك مسؤول وحتى لو ضايقك او حاربك هيفضل يحترمك لأنك كنت ببغاء ليهو
? رفيدة ياسين: أنا قبل كده تم إبلاغي باني موقوفة عن العمل من مسؤول قالي انا بحترم فيكي تمسك بما تؤمنين به…وأتعامل معاي برقي رغم أني كنت بتفصل ???
✍ الامين الزبير: ?? المهنية تحتم على الجميع احترامك
?رفيدة ياسين: يا جماعة الناس اللي بتقدم تنازلات كتيرة جدا عشان ترضي اي سلطة ويكونوا متماهيين زيادة عن اللزوم بيتم استخدامهم زي الليمون وبيترموا بعد اداء المهمة وبعد يتحرقوا بس اللي بيتمسك بحاجاتو حتى لو خسر اي شيء بيكون كسب نفسه واحترام حتى أعداءه
? رفيدة ياسين: مفروض نبتدي التقرير ده بمريض متضرر عشان نكون دخلنا مدخل انساني يشد انتباه الناس بواحد بيعاني زيهم ومنهم ثم اجيب رد مسؤول هيقوليكم الحقيقة كذا وكذا وغالبا هيكون بيكذب ? لانه ما هنقدر نقول انه كذاب نقوم نمشي لدكتور صيدلي يقول الكلام ده ويوضح الحقيقة..نكون ختينا الكل في مواجهة دون ان نكون طرفا…ونعمل آلبي تي سي فيها شوية معلومات وبس كفى الله المؤمنين شر القتال
? بهاء طباسي .. أستاذه رفيدة نود أن ننهل من مهنيتك.. هل ممكن أن تعطينا جدول عن كيفية إنجاز التقرير التلفزيوني من الالف حتى الياء
✍ اكرام عمر يس: والله انا سعيدة جدا في حضور قامات نيرة التحية ليك الأستاذة رفيدة شكرا كتير استاذ أبو عيدة
بصراحة أنا من كتر منتبه ومركزة ما قادر اعمل أي شئ عشان ما ألقى معلومة فاتني ثاني وثالث التحية لك رفيدة
? رفيدة ياسين: تحية لكم جميعا احنا كلنا بنسفيد وبنتعلم من بعض أصلا المعرفة في حد ذاتها شان عام اهلًا عزيزي بهاء مرحب بيك بين اهلك السودانيين
✍ بهاء طباسي .. وإضافة إلى ذلك ما ذكرته الاستاذه رفيدة. . إنه مثلا نبدأ بجزء من الام وآهات المريض مثلا “يا عالم والله انا كل يوم بموت… اهلا بيك أستاذنا العزيزة.. يسعدني والله ان اكون بين أطيب شعوب الأرض صدقا.. بلا مجاملة
?رفيدة ياسين: مظبوط بهاء بداية مؤثرة مهمة في التقرير
✍ محاسن سيد احمد: برضو ممكن نختم بانو من لايملك حق دواءة لايملك حيااتة .
ف صيغة مسج . لكل الاطراف .
✍ بهاء طباسي : شكرا أستاذنا
الآن فيه سؤال مهم حول التقرير التلفزيوني تحديدا.. هل يجوز لي أن أبدأ تقريري بغير المقدمة المعروفة التي تجذب انتباه المشاهد.. مثل “على أنغام السلام الوطنيين الفلسطيني والسوداني احيى الفلسطينيون ذكرى الثورة السودانية”
✍رفيدة ياسين: اضافة جيدة ومعبرة فعلا محاسن
✍ بهاء طباسي : بمقدمة خبرة عادية مثل “أحيت الجالية السودانية في غزة ذكرى الثورة السودانية”
*بمقدمة خبر عادي
ولو حبذا أستاذنا أن تعطينا الصيغة العملية لإنجاز التقرير.. سواء لحظة الكتابة للصورة والمقابلات والستاند والمونتاج
? رفيدة ياسين: مافي تابوه ثابت لبداية تقرير..
او لمضمونه في مفاهيم عامة مهنية متعارف عليها….حسب الموضوع والحدث
مثلا اذا الموضوع احياء حفل وطني زي ما انت قلت ممكن البدء بموسيقى معروفة ومؤثرة ومن ثم بدء الكتابة كما اشرت…لكن مقدمة التقرير ليست كبداية التقرير نفسه لانه يجب الا تكون الصبغة خبرية الا في المقدمة
✍ بهاء طباسي… باعتقادك وسامحيني على كثرة الاسئلة
ما هي الطريقة السليمة للتدريب على الصوت ليصبح خامة راقية أثناء إلقاء الصوت على التقرير
?رفيدة ياسين: انا بدرب صوتي بقراءة القران وقراءة الصحف بصوت عالي
✍ بهاء طباسي …. كيف ابدا التقرير وكيف أنهيه من ناحيه الصوت.. هل التلوين مطلوب
?رفيدة ياسين: حس ما تكتب يا بهاء صوتك سيتماهى وحده بالطبقة المطلوبة للنص لا تقصد التلوين حتى لا تبدو اصطناعيا ومفتعلا
✍ بهاء طباسي … هل ممكن أن تعطينا الخطوات العملية لإنتاج التقرير
وكيف نكتب للصورة.. وليس لتفسير الصورة
✍ يوسف محمد ابوزيد : أستاذة رفيدة هل التخصصية مطلوبة في المراسل كأن يكون هنالك مراسل حربي وآخر للشؤون السياسية ومراسل ثقافي مثلاً بل وحتي مراسل للمناسبات الدينية كالحج وذلك لتجويد المعلومة أم لا بد للمراسل أن يكون موسوعيا
? رفيدة ياسين: بصراحة صعب كل شيء يتضح هنا ياريت لو كنت في السودان كان اتجمعتا وعملنا ورشة عمل
?رفيدة ياسين: التخصصية مطلوبة طبعا للتعامل بعمق مع القضايا…بس المراسل المحترف هو اللي بيسد مكان ما يتختا..عشان كده الصحفي لازم يمون على درجة من الوعي في كل المجالات ويكون متابع اخبار الاقتصاد والرياضة والفن والثقافة وكل حاجة
✍ يوسف محمد ابوزيد : يعني يمكن أن نقول أن هنالك مراسل متخصص ومراسل عمومي علي طريقة الأطباء
? رفيدة ياسين: في مراسل متخصص لا يعرف سوى تخصصه ومراسل محترف متخصص وواسع الأفق يمكنه ان يسد في اي مكان اخر
?رفيدة ياسين: يعني مثلا زي مباراة مصر والجزائر قبل سنوات كان حدث رياضي لكنه تخول الى أزمة سياسية لاحقا
? رفيدة ياسين: وبرضه ري رفع الدعم عن الدعم والمحروقات هو شأن اقتصادي في الأساس بس بيمس كل الناس وبأثر على حياتهم لذلك على الناس المتابعة
✍ يوسف محمد ابو زيد: فعﻻ لابد للمراسل في هذه الحالة أن يكون ملما بالرياضة والسياسية والاقتصاد
? رفيدة ياسين: سعر الدولار موضوع اقتصادي بس لو مشيت عشان تشتري ليمون ولا دوم هتلاقي البائع بيقول السعر ارتفع عشان الدولار
✍يوسف محمد ابو زيد … يعني موسوعية المراسل تنبع أهميتها لتشابك الشؤون الحياتية وتداخلها بحيث يصعب الفصل بينها
✍ يوسف محمد ابوزيد : معلوم أن لغة التقرير ينبغي أن تكون سلسلة ومباشرة لإيصال المعلومة ولكن هل يمكننا أن نتجاوز هذه القاعدة لمقتضيات يفرضها الموضوع فنتعمق في اللغة ونوغل في البﻻغة من محسنات لفظية ومعنوية واقتباسات ولاوضح أكثر وبالمثال تتضح الأشياء مثﻻ عندما أصف في ثنايا التقرير منظر طبيعي أردت وصفه ليخدم التقرير الا يشفع ذلك لهذا
? رفيدة ياسين: شباب انا اتشرفتا بوجودي بينكم جدا وسعدتا بالنقاش معاكم..أنا ما من محبي الواتساب ولا بتعامل معاهو كتير وما نشيطة في قروبات عشان كده كان قبولي انه أكون ليوم واحد فقط..بس هرسليكم ايميلي ممكن اللي عنده غرض سؤال أر تواصل مهني يراسلني في اي وقت..انا هستئذنكم في مغادرة القروب..ولاحقا بس يكون عندي مساحة من الوقت بعمل شيء مكتوب عن شغل التقارير ممكن اديهو لزميلنا الصادق..تحياتي واحترامي للجميع وأتمنى أكون اديت الغرض اللي جيت عشانو القروب وشكرا على الدعوة والترحاب..
✍ الصادق ابوعيدة: كل التقدير ..والاكرام … والاحترام …والامتنان ….
للمبدعة … الرائعة .. الخلوقة ..الراقية … المثابرة …المتطورة .
رفيدة ياسين …
مع كل شكرنا على صبرها ..وسعة صدرها .. وتحملها ..وادبها الجم.. وانسانيتها …. وتجربتها..وزمنها الغالي … واجتهادها في ان تفيدينا .. وتقدم افضل ما عندها …
يعجز اللسان عن الشكر .. ويطرب الوجدان بهذا الجميل وهي تتوافر عطاء ..وتتوافد كرم .. وتتفضل علم ..
كتر خيرا كتير ..وسعدنا بيها…
وكلنا نتعلم من بعض
✍عماد العمد … بارك الله فيها صراحه استفدنا منها الكثير .. شكرًا لك استاذ الصادق ابو عيده علي اثراء مهرجان التقرير اليوم واتمني ان تتكرر مثل هذه الاستضافات مره اخري مع شتي نجومنا الاعلاميه في مختلف العالم ????
✍ الصادق ابوعيدة .. رفيدة التزمت بدورة تدريبية مجانية للجميع … بس نرتب ليها كويس ..
من صفحة
مهرجان السودان للتقارير التلفزيونية
-
-
-
-
-
-
-
-
