* مستوى فعلاً مسيمير.
* ولو كان الرومان قد دخلوا فورمة الأعداد.
* لكانت الرابطة كوستى الآن متقدمة على أبوالهل فى الروليت.
* الروليت هين.
* شفتوا الشليت؟
* الدقيقة سبعة أتير يطير بدون الكورة فى ركبة الزول.
* الدقيقة أطناشر نمرة أطناشر يطير جوز فى رجلين زول تانى.
* كروت أستحقها قليلى الأعداد.
* وبيستحقوا أكتر من كده.
* وسيسى بيه.
* كمل الناقصة.
* طرد يستاهلوا لأنه أعتدى على لاعب الأتحاد الموهوب أقبح أعتداء.
* عملية ما بيعملها لاعب موهوب.
* أسى زغنى بتاعنا ده بتتوقع منو تصرف زى ده؟!
* طبعاً لأ وأبداً لأ.
* لأنه موهوب.
* واللاعب الموهوب لايعتدى بقبح على لاعب آخر.
* (فيربلى)موش طيربلى.
* الفيفا حاتجيب ليكم البوليس.
* ولو دى طريقتكم نطالب بفتح نيابة للفيفا بالخرطوم.
* تتفرغ ليكم.
* أيها الناس.
* مدرب يخندق فى مواجهة أتحاد مدنى غير المستعد.
* يبقى مدرب ماسوووووووووووووووووووورة.
* أدوهو حق الموية مقدم مع الكهربا وخلوهوا يشتت.
* الزول ده بتعب أمن الملاعب وناس أبوطيرة.
* بجيبها ضقلها يتلولح.
* المهم.
* الأبواب وما أدراك ما الأبواب.
* من أختصاصات أتحاد الخرطوم.
* هذا الأتحاد الذى منذ تأسيسه يعتقد أن الغرض من تكوينه هو خدمة فريق بعينه.
* هذا الأتحاد الذى يفتح ضلفة باب واحدة عرضها أقل من متر لتخرج
عبرها جماعير المصاطب الشعبية فى مباراة المريخ.
* هذا الأتحاد الذى يفتح بعض البوابات ويفتح للبعض الآخر..بالتأكيد
لايحب الألكترونية.
* لأن فى ذلك تعميق لسلبيات الألكترونية وزيادة عليها.
* ولا يوجد مبرر مقنع لعدم فتح بعض البوابات بداعى عدم كفاية المراقبين.
* هذا الأتحاد يحقر بنا حتى فى مبارياتنا داخل أستادنا.
* هذا الأتحاد يجب ان يوقف فى حده.
* لأنو بعملها ظااااااااااااااااهرة.
* ومن تخرج من هذا الأتحاد وصعد للأتحاد العام.
* بتخرج بتخصص فى الحقارة بينا.
* لذا.
* ما لذا واحدة.
* لذايين.
* لن نسكت على أى أخفاق من هذا الأتحاد سواء كان مقصود او
بالأقساط.
* ونفتكر ان متوكل(وريث العمدة الشرعى)قد أشار الى كيفية التصرف.
* لأننا مللنا أن تتحطم مجهوداتنا بمؤامرات تحت تحت.
* وخيار وفقوس.
* أيها الناس.
* أمامنا كمبالا.
* وهذا ما يجبرنا على تجنيب الحديث عن أتحاد الخرطوم وشركة
البوابات الألكترونية حالياً.
* المهم.
* ألتقيت بالأمس فى أحضان الهدف بين يدى أستاذنا ابوالسباع ألوان
الطيف الجماهيرى الأحمر.
* وخرجوا بتوصيات مفيدة للزعيم.
* وستكون بأذن الله سبباً لنصر كبير على كمبالا.
* جاءت لجنة التعبئة وقطاع الروابط وأولتراس الجوارح المريخ أعتذروا
لأنهم يقومون بالأشراف على جناح المريخ بمعرض الخرطوم وجاء
أولتراس أسود المريخ وأولتراس أوليمبيوس والمرخ يسع الجميع والجنيد.
* أسى ديل براهم مابملوا الأستاد؟؟؟؟
* موعودون بنصر كبير مع هؤلاء الشفوت.
* لكن بى صراحة.
* وارقوا ماساقوهو مدنى لييه؟؟
* وصدق الرشيد على عمر عندما كتب صبيحة مباراة أطلع برة أن هدف بوى فى الحضرى صدفة.
* وأنتقد الرشيد طرفهم اليمين.
* ونزيد على كلام الرشيد.
* أن طرف الهلال اليمين ده طرفنا من الطرف اليمين أذا كان الطرف
اليمين زى طرفكم اليمين الشفناهو ده!!
* يمين ده ما طرف يمين.
* الزول ده مغترب ما محترف.
* ما عندو اى علاقة بالكورة غير أنو سنغالى.
* أخير منو كابوندى ودالحلة.
* الزول ده ود الحاجة ساى.
* شهر ستة بشتت طوالى.
* بختكم دى خانة فضت فى التكميلية.
* أها.
* نجى لى شمارات والى الخرتوم.
* أكان شفت يا والينا.
* كنا كأسرة محترمة قاعدين نتونس.
* وكأى واحد فقد الأمل كنت أحاول أن أغرس فى ذريتى صفات حميدة.
* وأشياء تملأ عينهم وكت ما قدرت أملاها ليهم بالأكياس والسفريات
والرحلات والبلكونات والجلكسيات والنوتات وأخر موديلات السيارات.
* ووكت ما قدرت أملا جيوبهم فى المطارات بالدولارات.
* زكت قصرت فى جلب الفاكخة والشوكولاتات.
* الزول طبعاً يا والينا بحلم بى بيت فيلا(حمانا الله).
* يكبر الزول شوية يصغر الحلم يبقى بيت (ميتين متر)جمب الحاجة
عشان الأولاد يمشوا ويجوا من حبوبتهم بسهولة.
* يكبر الزول تانى ويصغر الحلم أكتر.
* البيوت بيوت الأخرة.
* أها.
* أنطلاقاً من بيوت الآخرة دى يا والينا.
* قلت لى خلفى الصالح.
* أنا ما بورثكم عمارات(التقول قادر وما داير).
* أنا بورثكم أخلاق وقيم يا بناتى(دى ذاتها بقيت أخاف أتجبر وتصبح ما
عندى).
* الوسطانية قالت لى القيمة الناصية بتجيب كم يا بابا؟؟؟
* قبل أجاوب يا والينا.
* نطت الكبيرة.
* قالت لى كيلو الأخلاق بى كم الزمن ده؟؟؟
* ما قدرت أجاوب يا والينا.
*الصغيرة فيهم يا والينا قالت لى يا بابا أعمل لينا مصنع عملة .
* عشان ناكل مما نطبع أحسن من ناكل مما نلبع.
* قلت ليها يا بتى ناكل مما نقلع ما أخير من ناكل من حق الناس
ونتجدع؟
سلك كهربا
* ننساك كيف وقدر ما ناكل ما بنشبع والوجع ال…. البخلى النفس
تطلع.
والى لقاء**********سلك
لن ننساااااااااااااااااااااااااااااااااااااك
في السلك – بابكر سلك
