فتح البلف

من رأسي :
• لو عبدالصمد لقيتوه واقف حارس مرمى في مباراة المريخ القادمة امام مريخ نيالا بدل جمال سالم …ما تستغربوا – الزول دا طالما قفل (البلف) اتوقعو منو اي شيء – ما في زول بقدر يقول ليه حاجة.
• من كراسي :
• إنما تفسر أعمال الإنسان بالبواعث والدوافع قبل ان تفسر بالنتائج والغايات.
• عباس محمود العقاد
• يوم داك لاقيت (حسن ود خرطوش) ، زول طويل واصفر ..واضنينو برة وشيه. لاقيتو حسن ود خرطوش في طرف الشارع شايل ليه (بطيخة) زي علاقة المفاتيح..لو قريت كورس تلاتة شهور في (علوم البطيخ) ما بتعرفها.
• قلت ليه مالك شايل ليك (بطيخة) صغيرة كدا – الحاصل عليك شنو؟.
• البطيخة متل حبة البندول.
• متل ماكينة الحلاقة.
• حسن ود خرطوش قال لي ابدا – بس الايامات دي قافلين (البلف).
• قلت ليه معقولة (قفلة البلف) ظهرت في (البطيخ)..والله لو دي طريقتكم ..يبقى عبدالصمد ما غلطان عليكم.
• اصلو ما غلطان.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• يوم العيد – قمت من الصباح مشيت على (حمد طيب العكاز) ، عيونو متل (قدرة الفول) وقت تكون فاضية ، لقيت ليك (حمد طيب العكاز) ماسك ليه (ديك) عاوز يضبحو لي اولادو.
• ما عارف (الفلسفة) في وضع (قدرة الفول) بعيد من الدكان شنو؟ ، كأنها ما عندها علاقة بصاحب الدكان.
• فلسفة غريبة.
• ما عندها اي علاقة بالفول.
• موضوع الفول دا ما تشتغلوا بيه كتير – مرات بجيب حاجات برة العمود.
• قلت ليه يا حمد انت جنيت ..مالك عاوز تضبح ليك (ديك) يوم العيد.
• حمد طيب العكاز قال لي والله غير (الديك) دا ما عندي حاجة – اصلو البلف مقفول.
• قلت ليه انتوا (البلف) دا لمن كان مفتوح ..كان قاعد يكب وين؟…عاملنها لي كلها بطيخ وضبائح.
• والله لو دي حالتكم اصلو عبدالصمد ما خاطي عليكم.
• ليه حق.
• اصلو ما غلطان.
• بالمناسبة – نحن ناس حقانين.
• الموسم باقى (42) يوم…وقفلة (البلف) دي ما حبابها.
• حقيقة ..ناس مزمل عندهم حق.
• مباراة القمة في الممتاز باقى ليها (22) يوم…ولو استمريتو على (قفلتكم) للبلف دي …خمسة (التبلدي) ما بتمرقكم مننا.
• المريخ بالحسابات الآن بنافس من اجل (المركز الثاني).
• يعني (الوصافة) مهددة.
• ودا كلو ليه؟.
• دا كلو عشان البلف مقفول.
• ناس عنكبة لو ما فتحوا ليهم (البلف) ما بيشتغلوا.
• مباراة القمة يوم 10 اكتوبر – طبعا ح تكون ان شاءالله ودية.
• نلعبها بي بشه الصغير…بشه الكبير ما محتاجين ليه.
• ناس سادومبا وشابولا يقعدوا في المقصورة.
• تشكيلة الهلال ح تتكون من ولاءالدين والشعلة والصيني وحسين الجريف ومحمود ام بدة.
• الهلال بعد ان يحسم مباريات الفاشر والعودة بالنقاط الـ (6) من فاشر السلاطين باذن الله وتوفيقه عليه التركيز على كاس السودان.
• يعني مباريات الممتاز يلعبها بالصف التاني.
• مباراة القمة في الممتاز (ودية) ما تحرقوا دمكم فيها.
• ركزوا لينا في قمة كاس السودان.
• طبعا دا في حالة تأهل المريخ ووصله لنهائي الكاس.
• مع قفلة البلف دي ..ما اظن المريخ يصل النهائي.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• الاهم من دا ..ان اعلام الهلال ومجلسه وحتى جماهيره عليهم ان لا يحملوا مباريات الفاشر اكتر مما تحتمل.
• مباريات الفاشر ..مباريات عادية ..يجب ان يلعبها الهلال بعيدا عن الضغوط والتوتر والشد والشحن الاعلامي.
• الموضوع ما بيستاهل.
• العودة بالنقاط الـ (6) من الفاشر شيء جميل وهو المطلوب ، لكن ان لم يعد الهلال من الفاشر بالعلامة الكاملة – اصلو ما في مشكلة.
• يجب ان نكون عارفين نحن عاوزين شنو؟.
• الموضوع ليس (تحدي) ساكت.
• ولا هو حياة او موت.
• انتصارات الهلال في الفاشر ان شاءالله سوف ترفع الفارق بين الهلال والمريخ الى (12) نقطة .
• اذا لم يتم لنا هذا الامر – يجب ان نتعامل مع الموضوع بهدوء – من غير انفعالات.
• ما عاوزين الهلال يفقد تركيزه ..وجاهزيته للمباريات القادمة.
• نحن في نهائيات الموسم ..الهدوء والتركيز مطلوب.
• الانفعالات والعنتريات مرفوضة.
• ان حدث للهلال في الفاشر اي تعثر لا قدر الله لا نريد ان ينعكس ذلك سلبا على الهلال في مبارياته المقبلة.
• او ينعكس على الجهاز الفني او على اللاعبين.
• علينا ان نتعامل مع تلك المباريات بمنطق ..وهدوء.
• الانتصارات لا تحقق بالشحن ووالتحديات والعنتريات.
• الانتصارات تحقق بالهدوء والتركيز والمسؤولية والجد والاجتهاد والعطاء.
• يجب ان نتقبل كل نتائج الهلال في المباريات القادمة من غير انفعال او خروج من النص.
• هذا الشيء ليس تخذيلا ولا هو تبريرا – وانما هو دعوة للتعامل مع كل النتائج بهدوء ومنطق وقبول.
• علينا ان نتعامل مع كل النتائج …من غير انفعال.
• ان حقق الهلال الانتصارات في الفاشر – هذا ليس كل مبتاغنا ، وان لم ننجح في الخروج بالعلامة الكاملة – فليس ذلك دعوة للانفلات والانفعال.
• المرحلة المقبلة مرحلة (حصاد).
• وهي مرحلة (قبول) ، وتعامل بعقلانية مع كل المعطيات.
• نحمد الله ان الفارق بين الهلال والوصيف يمنحنا ذلك الهدوء ..وتلك الاريحية.
• نحن نبحث ان نرفع الفارق الى رقم قياسي.
• هذا هدف مشروع ..وامر نسعي لتحقيقه.
• لكن ان لم يكن لنا ذلك ..فلن نفقد صدارتنا ولن نفقد بطولتنا.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• كل المطلوب في الفاشر ..المزيد من التركيز والمزيد من العزيمة والاصرار.
• الهلال عبر كل العصور ترتفع المسؤولية عند لاعبيه كلما تقدموا في البطولة.
• ملعب النقعة في الفاشر ..يحتاج الى ان نتعامل معه بمرونة وذكاء – خشية الاصابات والانفعالات.
• يملك الهلال من الخبرات ومن الامكانيات ما يؤهله للانتصار في الفاشر والعودة باذن الله بالعلامة الكاملة.
• جمهور الهلال في الفاشر ..مطالب بالمساندة والتشجيع طوال زمن المباراة.
• الهلال قادر للعودة في كل اجزاء المباراة وان تأخر.
• لذا ..ساندوهم وادعموهم ..وابعدوهم من الشحن والضغط الاعلامي والاداري الكبير.
• علينا ان نشكر لاعبي الهلال ان اوصلونا الى هذه المرحلة التى يجلس فيها الهلال مرتاحا في الصدارة.
• في المواسم الاخيرة ..كان الفارق بين الهلال والمريخ يكون في الغالب نقطة او نقطتين ..وكانت البطولة تحسم في اخر جولة.
• الآن نملك من النقاط ما يجعل اعصابنا مرتاحة.
• علينا ان نستفيد من هذا العامل – دون ان يعرف التراخي والاستهتار طريقا الينا.
• سوف نحترم هلال الفاشر ..وسنحترم مريخ الفاشر ..وسوف نقبل بكل النتائج.
• رهاننا على الفوز لن يكون على التاريخ ولا على الاسماء.
• رهاننا على الانتصار سوف يكون على العطاء والجهد والعزيمة والاصرار.
• اليوم يغادر الهلال الى الفاشر ..نسأل الله ان تكون الرحلة موقفة وان يعود الهلال من الفاشر سالما وغانما وحاصلا على الدرجة الكاملة باذن الله.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• ……………
• و
• عبدالصمد مفروض يفتح (البلف) في الجولات القادمة.
• جولات المريخ القادمة ما بتستحمل اي قفلة.
• يجب الاستفادة من الخلافات والصراعات في مجلس المريخ بتحقيق اكبر الانتصارات والمكاسب على المريخ.
• ويجب ان يكون تحرك مجلس الهلال مبكرا في التسجيلات.
• اهم ما يميز الهلال هذه الايامات الهدوء والعقلانية وعدم الانفعال.
• لا نريد ان نفقد مميزات الهلال واسلحته التى يقاتل بها – تحت اي ظرف.
• هدفنا ليس الممتاز فقط …هدفنا كاس السودان ايضا.
• الملف الذي يجب ان يفتح هو ملف كاس السودان ، باعتبار ان الممتاز حسم لحد كبير لصالح الهلال.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• ……….
• السيدة (ل) – قفلنا بلف الشوق.
• وقرّط على كدا.

دق الدلجة – محمد عبد الماجد