ملعوبة و كدا !!

جاء بالزميلة (آخر لحظة) بعددها الصادر يوم الأحد 14 أغسطس الخبر التالي (شرعت حكومة ولاية الخرطوم فى التحقيق فى صفقة إستيراد قطارات بقيمة 42 مليون دولار، والمحت مصادر مطلعة لـآخرلحظة الى وجود مخالفات فى عملية إستيراد القطارات التى يبلغ عددها (6) والتى نفذتها إحدي شركات القطاع الخاص، وقالت المصادر أن قيمة الصفقة تم دفعها بالكامل وبسعر مضاعف، وأشار الى أن تلك القطارات التى تتكون من (3) مقطورات وقاطرة تقبع حاليا بإحدي مخازن السكة حديد ببورتسودان بعد أن تحفظت حكومة ولاية الخرطوم الحالية إستلامها ،وزاد” والان تكلفة تخزينها عالية بجانب تكلفة التشغيل حتى يتم الحفاظ على البطاريات” ، وأردفت المصادر الى أن المخالفة تكشفت بعد أن شرعت هيئة السكة حديد فى إستيراد قطارات من ذات المصنع وبنفس المواصفات وتتألف من (6) مقطورات وقاطرتين وبسعر أقل من قيمة الصفقة بكثير، مشيرة الى أن تلك القطارات كان مقرر لها أن تدخل الخدمة فى فبراير من العام الماضي. (إنتهى) …
عزيزي القارئ تعال معي نقف في كل نقطه إحتواها هذا الخبر :
– إستيراد القاطرات تم تنفيذه بواسطة إحدى شركات القطاع الخاص .. يعني لا عطاءآات لا بطيخ لا شفافية !
– الصفقة قيمتها (42) مليون دولار تم دفعها للشركة بالكااامل وكمان بسعر مضاعف ( مضاعف ليه ما تعرف؟)
– هنالك وجود لمخالفات فى عملية إستيراد القطارات (طبعن شيء متوقع في ظل إنعدام الشفافية ) !
– (3) مقطورات وقاطرة تقبع حاليا بإحدي مخازن السكة حديد ببورتسودان بعد أن تحفظت حكومة ولاية الخرطوم الحالية إستلامها (حلوة تحفظت دي !! يعني متوقعين شنووو؟ هو الشراء ذاااتو تم بالطرق الرسمية .. قال أيه تحفظت)
– والان تكلفة تخزينها عالية بجانب تكلفة التشغيل حتى يتم الحفاظ على البطاريات” (أها الخسارة دي البيدفعا منووو) ؟
– المخالفة تكشفت بعد أن شرعت هيئة السكة حديد فى إستيراد قطارات من ذات المصنع وبنفس المواصفات (طيب دي المرة الأولى ما جبتوها براكم مالكم وأديتوها لى شركة قطاع خاص ليه ؟؟)
بلد ما عندها وجيع .. كل يوم فساد وهبر ولهط في حتة (غير) .. يوم في المؤسسة الفلانية ويوم في المؤسسة العلانية .. يوم في الهيئة العلانية ويوم في الهيئة الفرتكانية .. يوم في الجهاز الفلاني ويوم في الجهاز العلاني .. شيء عجيب .. أيه (اللبع) البدون رأفة ده ؟ وفين القوانين واللوائح والمحاسبة .. وفي النيابة والقضاء والمش عارف أيه؟ هي خلاص القصة هاصت للدرجة دي والضرب بقى (في كل مرفق) بملايين الدولارات ؟ فين (القوى الأمين) ؟ ووين (لا لدنيا قد عملنا)؟ أيه القرف ده؟ ما معقول البلد تكون مستباحة بالشكل ده ومافيش مسؤول واحد يقدم للقضاء .. ده فساد غير مسبوق على مرأى ومسمع من كل المسؤولين الكبار في البلد وقدام كافة الأجهزة العدلية .. هل أصبح الفساد هو الأصل والنزاهة هي الإستثناء؟ الناس البتنهب دى جات من وين؟ البلد دي ما فيها (ناس بطالين) كتار بالحجم ده؟ معقولة الفساد يشمل حتى مؤسسات ليها قدسيتها كالحج والعمرة والأوقاف وديوان الزكاة ؟ والها ده كلام أغرب من غريب … الناس دي الله ما بتخافو؟ لا وأيه .. كلما يظهر فساد يقولوا ليك (كونا لجنة تحقيق) .. والموضوع (يندفن) على طووول .. مافيش لجنة تحقيق واااحدة (طلعت ليها) أي مخرجات أو تقارير .. بعدين قصة لجان التحقيق في ما يختص بالجرائم الجنائية دي ما أدونا ليها .. مافي حاجة إسمها لجنة تحقيق في زول متهم بلهط أموال الشعب المسكين ده .. في (فتح بلاغ) وتحقيق وتوجيه تهمة ومحاكمة .. وبينات .. يا براءة يا إدانة !
بالله عليكم شوفو هسه الكلام الفوق ده؟ الحكومة عاوزة تستورد قاطرات تقوم تدي الموضوع لشركة قطاع خاص؟ ليه؟ هي ما بتقدر؟ محننة؟ ما عندها إمكانيات؟ ما أهي عاوزة المرة دي تستورد براها؟ طيب المرة الأولى الحصل فيها (اللعب) ده ما إستوردت براها مالا؟ طبعن عشان يحصل الحصل ده .. عشان (جهة ما) تكاوش على ملايين الدولارات دي … يعني المسألة ملعوبة وكده ..!!
كسرة :
كونتو للقاطرات دي لجنة تحقيق وللا لسه ؟!!! هههههههههههه هات الحبوب يااا ولد !!
• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+وووووووووووو)+ (وووووووووووو)+(وووووووووووو)+(وووووووووووو)+ (وووووووووووو)+و+و+و+و+و+و+و+و+(و)+و
• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+و+و+(و)+و
• كسرة جديدة لنج :
أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنو (و)+(و)+(و) +و؟