في غفلة رقيبي

> شفعنا أمس كتر خيرهم طلعوا بتعادل سلبي امام مضيفهم الزامبي > أمطار خير وبركة > وصبياننا طبعا ًتأهلوا على حساب نيجيريا > والتربية الصحيحة والاهتمام بالشفع والصبيان بتخلينا نحلم بمنتخبات قوية مستقبلاً تتواجد في النهائيات دائماً > ولكن الاحتمال الأقرب هو حدوث ما حدث مع اولاد ماسا > لأننا دولة نجاحاتها إن وجدت، كلها سببها الصدفة > عشوائية العمل الاداري عندنا عنوانها المجاري > والموية القاطعة في الماسورة ومكدسة في ميادين الحواري > و ارتباط السداد الحكومي بشبكة طاشة طوالي > مظاهر عشوائية العمل الاداري عندنا كتيرة > من يفشل في ادارة موقع يتم تحويله لموقع اكبر > ومن يفشل في ادارة الموقع الاكبر يتم تعيينه كبير في موقع كبير > وهكذا تدكه وتتشكه وتتوزع من جديد > نفس الورق الكعب الكان بي جاي بجي بهناك والكان بهناك بجي بي جاي > وقيمنا لسه > يشكوها ويوزعوها ويدكوها ونحن قاعدين راجين قيمنا > والكيشة كتار > في البفوت الخمسين > وفي البجدع بايظو مرتين > وفي الاتقبض هبابتين ولسه ما حرق > لكن التربيزة كلها زون > تربيزة العمل الاداري > وصاحب التلتين عندو فتوح > إن شاء الله من هنا وخمسين > بطيروا لأنهم كلهم زون > ما دايرين تلتين وفتوح يقعدنا شوتة تاني بره اللعب > صدقوني العمل الاداري عندنا عقيم شديد > نسأل الله السلامة > المهم > في غفلة رقيبي > من أجمل اغنيات الحقيبة > هو في شيء في الحقيبة شين! > في غفلة رقيبي قلت ازور حبيبي لقيتو شوية حاسي > وعلى الرغم من أن غفلة الرقيب ما حبابه > إلا انها في الغنية دي كانت جميلة > واذا صدقت انباء مطالبة لجنة التحكيم بوقف فقرة تقييم الحكام في برنامج الرياضة وفي الاستوديو التحليلي > يبقي حبيبي موش شوية حاسي > يبقى مات عديل > الرقابة هي وسيلة اجبار لتحسين العمل واستتباب الامن ومراجعة الأخطاء > ولما ترفض الرقابة معناها ناو ليك زيارة لحبيبك يا حبيب > وزيارة الحبيب بدون رقيب بتجيب الكلام > والكلام التحتو كلام بخلي ما بنفس يعقوب يتضح > أيها الناس > تقييم التحكيم تلفزيونيا يجبر الحكام على الاجتهاد والحيادية > واذا كانت ادارة الحكام ترفض تلك الرقابة > تبقى ادارة عقيمة وفاشلة شأنها شأن جميع مناحي العمل الاداري في كل النواحي > في غفلة رقيبي?? > ليييه! > ولنا أن نسأل > اذا صحت تلك الاخبار > هل في نية غمت كتيمي??? > طيب سايقننا هناك ليه ماتكتلونا هنا > ايها الناس > نطالب وبشدة بفقرات تحليل اداء الحكام > ونطالب القناة الناقله بزيادة عدد كاميرات النقل لدقة اكثر > ولصورة من زوايا مختلفه > و عشان نشوف الاوف اوف ولا الفيديو ساي > بالطريقة دي نجبر الحكام على تطوير مستوياتهم > وتقليل أخطائهم > عساهم يعدوا بلنت أهلي مدني > وتجيهم الشجاعة لاحتساب بلنت للمريخ ضد الهلال بالممتاز > مع العلم > بأن الكاميرات الفوق شغالة زي الورد > ومسجلة كلو شيء > دايرنك تزور حبيبك في وجود رقيبك عشان تلقاهو معافي وسليم وفي السليم > المهم > هلالابي محرووووق > قال لي تدوا الاهلي تلاته?? اكرم ده عملتوا ليهو شنو? > قلت ليهو صنا ليهو مستشفى العباسية > قال لي انتوا بتكتبوا حاجاتنا وحاجاتكم مابتكتبوها ليه? > قلت ليهو اول حاجة نحنا خشمنا ما خفيف > وما زي بنات بايو > بنات بايو ديل طبعاً قالوا خشمن خفيف شديد > وبحبن الشمار > بعد يفطرن يختن قهوتن > فلانة طلقوها > راجلها قال بالليل كلما تمسح وشها ده بتخلعوا > جابت ليهو القلب > فلانة قالوا ليك ماتشوفي جيهتها وسماحتها دي > بيتها وسخان وسخان وسخان >الجقر بقفل نخرينو لما يجي بيتها > وفلان.. قالولك حرامي.. ما كل البلد دي كلها في بطنو > وفلان ود حامد اسكتي ساي > محل مايدوهو وظيفة ياكل مال الدولة > باقي واصل > تاني يدوهو وظيفه وتاني ياكل > قالولك آخر مرة دي جارو اتشاكل معاهو قام قال ليهو يا حرامي > ولا اثرت فيهو > قام جارو قال ليهو والله انت تاكل مال النبي > قال ليهو ومالو.. النبي حبيبنا > وهلل ودور وفحط خلاهو في محلو قالولك لاحقلو اكله > المهم دي شغلت بنات بايو يومياً > خشمن خفيف > فيهن واحدة متزوجه > قال ليك الحرامي يوم جاهم جلد ليك راجلها جنس جلده > لكن ناس الحله ماعافين > وخايفات يتكلمن اختن تطلق > سكتن بالموضوع اسبوع > اتضايقن شديد > يوم شالن عفشن وراحلات > ناس الحله سألوهن مالكن راحلات > قالن لي ناس الحلة مخلين الحله دي… الحلة كلها تنضم بنات بايو خشمن خفيف بنات بايو خشمن خفيف! > نحنا لو خشمنا خفيف فلان راجل اختنا ده الاسبوع الفات الحرامي دقاهو لمن جعر نحنا ما اتكلمنا تقولوا خشمنا خفيف!! > اها > دحين نحنا كمريخاب لو خشمنا خفيف من اهلي شندي صعد الممتاز لي الليلة ما غلبتوهوا في شندي قلنا لي زول! > ليكم تمنية وتمنين سنة ماشلتوا كاس افريقي قاعدين في صفركم ده نحنا كلمنا زول!! > قبضوكم بالمنشطات في تونس خشمنا عندنا > غيرتوا اتنين واطناشر قايلننا عشان ساكتين ماعارفين > زغتوا من وفاق سطيف وعملتو رايحين نحنا كلمنا زول!! > تدق محل الحقنة وتشوتوها بلنت قلنا للكاف! > شاتها الماسورة دقت في الماسورة رجعت للماسورة بدون ماتهبشها اي ماسورة.. كلمنا الفيفا?? > اسي جابت ليها صيانة مستشفيات قلنا لي زول! > نحنا خشمنا ماخفيف مازي بنات بايو > والله لو كنا زي بنات بايو كان ماو يوم راحلين ندق بيكم الطار دق > ايها الناس > ان تنصروا الله ينصركم > اها > نجي لي شمارات والي الخرتوم > كان شفت يا والينا > والناس مصنقرة حزينة وسط موياتها وطينها > اكتشفنا انكم ما مقصرين فينا > ماغلطانين يا والينا > غلطانة المطرة البتجينا سلك كهربا ننساك كيف والكلب يغني ساي يا مطيرة صبي لينا في عينينا وفي كرعينا وفي ريسينا سوطي مويتك دوبي طيننا مابتجرأ زول يمرقك من حينا البلد امان ياستنا والي لقاء سلك