بديل

منو البيملا الفراغ في الجوف.. بعد تفقد أعزا ولوف؟!..
منو البيسد فرقة الريد.. وتكتب فيهو تاني قصيد؟..
منو البيكتل هواك جواي.. ويبني صروح أماني معاي؟
يكون بس لي.. .وما لسواي.. وفي إحساسو ألقي عزاي..
أقول حققت تاني مناي.. ويمسح عن عيوني أساي..
منو البعدك بيمحى شقاي.. ويكتب لي غناوي هناي؟..
منو المجنون.. يسيب كل الحسان في الكون.. ويعشق ليهو زول مفتون.. مريض بالشوق.. أسير الذوق.. وشايفك زول أكيد من فوق؟
***
فتش معاي عن زول.. يطفي في الجوف الحريق
يعرف حكايتي مع هواك.. وبرضك يصر نمشي الطريق
زول.. يسبر أغوار الحنين.. وينقذ الود الغريق
يملأ البراحات بالسماح.. ويوزع الورد الوريق
ويعيش معاي واقع جفاك.. ويمدد النبل الأنيق
زول يبقى واحة ويبقى نيل.. مش يخذل الروح والكيان.. ويجي يبقي في الآخر صديق!!!
***
وأنا مستحيل أنساك.. وأنسي الحنان الكان
وكل الجمال والخير.. والصدق والإحسان
بيناتنا ماضي جميل.. لو حتى عدّ زمان
وما بلقى زول يسواك.. مهما يكون إنسان
لكن بعيش قدري.. وأنوم علي الأحزان
وأصحا وعيوني عليك.. ولسه الأمل بستان
وشايلك رصيد من حب.. ولي عمري باقي ضمان
باب العشم مفتوح.. جوايا حتى الآن
إمكن قدرنا يلين.. ويتجدد التحنان
وتعيد حساب الريد.. وأنا ما أكون خسران
ألقاك وتلقاني.. ويبقى الوصال كسبان
*تلويح:
لا بديل لك.. إلا أنت