بينما كنت أقود عربتي صباح الامس إذا بهاتفي الجوال يرن فقمت على الفور بالوقوف ، نظرت إلى الرقم فإذا هو رقم زين عادي (الفوق ده) ، ولأنني أجيب على كل الهواتف حتى تلك التي تتصل لأول مرة فقد قمت بالرد :
• السلام عليكم
• عليكم السلام ورحمة الله تعالى وبركاته
• معاك قسم التسويق والمسابقات شركة زين ، مش إنتا صاحلب الرقم ……..
• أيوه ده رقمي ده ذاااتو .. أهلا وسهلا مرحبا
• (بدأ يقرأ من ورقة) : يسعد شركة زين أن تزف إليك التهنئة بمناسبة إختيار رقمك ضمن آخرين في المسابقة التي أجريت في قناة النيل الازرق هذا وسوف نقوم بتسليمكم الجوائز في أقرب وقت ممكن
• ممكن يا أستاذ ناخد بياناتك؟
• جدا
• الإسم ؟ (هنا دقس لأنو لو شركة مفروض البيانات تكون عندها) !
• …………….
• السكن
• ……………
• شركة زين تحييك ومبروك عليك هذه الجائزة وهي عبارة عن محادثات مجانية لمدة شهر ومبلغ تسعة مليون وتسعمية جنيه (يعني الود خصم الضريبة هههه) !
• أها يعني المطلوب منى شنو ؟
• عاوزنك ما تكلم الناس .. المرة الفاتت يا أستاذ عندما أعلنت شركة زين عن تقديم جوائزها تدفق المشتركون على مباني الشركة وحصل تلف للأجهزة والمعدات لذلك عاوزنك تتكتم على خبر فوزك وما تكلم أي زول إلا بعد إستلام الجائزة (ههه يعني يعني الإحتيال يكون كتامي عشان مافي زول مفتح ينصحك لو كنتا طيرة ) !
• حاضر .. هسه أعمل شنووو؟
• أقرب محل لشراء رصيد يأ أستاذ ليك وين؟ عشان ح نرسل ليك مبلغ الجائزة في شكل رصيد
• قريب مسافة دقايق
• طيب يا أستاذ أمشي إشتري منو كرت رصيد بي عشرين جنيه ولمن تجيبو خليك ماسكو في ايدك وأرجع ليا
• (طبعا عرفتا القصة إحتيال .. قلتا أطلع إسمو من برنامج Number Book لقيتو ما مسجل .. دقائق ورجعتا ليهو .. ) :
• (عشان أخليهو مطمئن) : آلو قسم المسابقات بشركة زين؟
• أيوة يا أستاذ
• أها أنا جبتا الكرت أبو عشرين
• طيب يا استاذ عشان نرسل ليك مبلغ الجائزة لازم يتم شحن رصيدك بي مبلغ عشرين جنيه عشان نفعل الخدمة !! (الجائزة تسعة مليون وتسعمية والشركة بتطالب بي عشرين جنيه ههههه)
• كويس أها أنا هسه أعمل شنووو؟
• أكشط الكرت
• كشطناهو
• يلا ملينى الأرقام أول تلاته أرقام
• (من راسي) : 667 .. (وبدأ ينزل الرصيد في تلفون قدامو ههه)
• والبعدهم
• 552
• والبعدهم
• إنتا عاوزني أمليك الأرقام كوووولها !
• آآي عشان نفعل ليك رصيدك
• شوف يا ود يا محتال … وقف الإحتيال الإنتا بتعمل فيها ده .. وما تفتكر إنو شريحتك دي ما مسجلة إنك ما ح تتمسك وتقوم تحتال على الناس البسطا .. وأنا ح أكلم ليك السلطات عشان يقبضوك يا محتال !
• تتييت .. تتتييت .. تتتييت (وإنقطع الخط) !
من الواضح إنو المسألة دي ممكن تمشي على البسطاء من الناس .. بسهولة ومن الواضح كمان إنو الزول ده إستغل قصة إنو شريحتو (مجهولة) وغير مسجلة مع إنو نحنا كثيراً ما كتبنا عن خطر ظاهرة الشرائح غير المسجلة للهواتف النقالة وأضرارها وتأثيراتها السالبة على المجتمع خاصة على مستوى الجريمة المتنوعة .
في 15 مايو 2014 (تحديدا) أكدت وزيرة العلوم والاتصالات د. تهاني عبد الله عطية على مضي وزارتها قدماً في القضاء على هذه الظاهرة وذلك عن طريق قيادة حملة تحث فيها غير المسجلين من مستخدمي الهواتف السيارة على إكمال عملية التسجيل وقد أوضحت الوزيرة حينها على أن المهلة التي أعطيت لتسجيل الشرائح المجهواة تنتهي بنهاية مايو (2014) وهي غير قابلة للتمديد مرة أخرى .
طيب .. هسه منو المسؤول؟ وزارة العلوم والاتصالات التي لا تتابع عمل شركات الإتصالات ؟ وللا شركة الإتصالات التي لم تتبع تعليمات الوزارة؟
عموما نرفع الأمر للجهات المسؤولة ونحث على سرعة ضبط صاحب هذا الرقم والتحقيق معه ونواسي من إنطلت عليهم هذه الحيلة والجاتكم في (عشرينكم) سامحتكم !
كسرة :
نتوقع رد من وزارة العلوم والإتصالات .. ويا ناس (زين) نحنا نلاقيها من وين وللا من وين؟ !
إنتبه :
هنالك واو (شهر) جديد !!
• كسرة ثابتة (قديمة) :أخبار ملف خط هيثرو العند النائب العام شنو؟ 80 واو – (ليها ستة سنوات و 9 شهور) ؟
• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو؟ 39 واو (ليها ثلاث سنوات وأربعة شهور)
الرقم 0969187542
