وقت بتتقشفوا كدا ..فرقكم من لجنة اسامة ونسى شنو؟

من رأسي :

الفرق بين الهلال والمريخ بقى (10) نقاط.

زي الفرق بين الدولار والجنيه.

الهلال بقى سوق اسود عديل كدا.
من كراسي :

(اننا سوف نكسب معركتنا لا بمقدار ما نقتل من خصومنا ، ولكن بمقدار ما نقتل في نفوسهم الرغبة في القتل).

غاندي

اقرأوا معي هذا الخبر الذي نشر على موقع كووورة عربية – وارجعوا لي نشوف الحاصل شنو؟.
قبل ما اقول ليكم اي حاجة.
قبل ما الخبط ليكم الحاجات كلها في (قفه) واحدة.
الخبر كما جاء في موقع كووورة عربية بيقول : (شهد اجتماع المكتب التنفيذي بنادي المريخ السوداني، مفاجآت، كشفت عن السياسة الجديدة التي يريد مجلس المريخ أن يسير عليها، لتغيير الواقع في فريق كرة القدم وتثبيت دعائم وشكل العلاقات على شكل مؤسسي صارم بين قطاعات النادي المختلفة تركيزًا على فريق كرة القدم.أوضحت قرارات اجتماع اللجنة التنفيذية، التي تضم نائب رئيس النادي رئيسًا لها، والأمين العام نائبًا، ومساعدي الرئيس في قطاعات النادي المختلفة، أنها تركز على تثبيت شعار الانضباط والتقشف).
وين المولات؟.
وين النادي الاجتماعي؟.
وين الفندق خمسة نجوم؟.
غايتو لو عصام الحاج كان برة اللجنة دي كان لقى فرصتو.
جماعتكم تاني رجعوا يجيبوا سيرة (التقشف).
لكن (التقشف) دا بحلكم مننا.
الله يجازي محنك يا شيبولا ..كشحت ليك كورة ما كورة نصاح …رجعت بيها الجماعة الى (التقشف).
26 عضو بتكلموا عن (التقشف).
بالمناسبة بكري المدينة ممكن يقبل اي حاجة في الدنيا دي إلّا (التقشف).
بكري ما بتقشف ليكم.
بكري المدنية ممكن يقبل منكم اي حاجة إلّا (التقشف).
بكري المدينة بحب العيشة في (بحبوحة).
هو عليكم الله لو بقتنع ليكم بـ (التقشف) – كان في (50) فرصة مضمونة بجيب ليه (قون) واحد.
تقشف شنو كمان؟.
بعدين لو كان على (التقشف)…ما كان تخلوا ناس لجنة اسامة ونسي.
شلتوا لجنة اسامة ونسى ليه؟.
لجنة جمال الوالي لزومها شنو؟..اذا كان عاوزين يحدثونا عن (التقشف).
الفرق هسع بين اسامة ونسي وجمال الوالي شنو؟.
الموضوع كلو تقشف في تقشف.
الناس ديل من يقوموا من الصباح بقعدوا يتقشفوا فينا.
عملوها لينا كلها (تقشف).
نحن ذنبنا شنو؟…عشان تتقشفوا لينا كدا.
المريخ بقى شغال بي نفرات القروبات.
اهلي الخرطوم ما بيشتغل بالنظرية دي.
نفرات القروبات ما بتفتح ليها بيت.
ولا بتمشي ليها فريق.
كان على (القروبات) كان تخلوا اسامة ونسى.
على الاقل ناس الطاهر الرشيد عندهم خبرة في موضوع (النفرات) دا.
هسع انتوا (26) عضو …وعاوزين تتقشفوا لينا.
عاوزين تتموها لينا كلها (نفرات).
لو دي نفراتكم نفرات التابه.
انت يا جمال الوالي ..جايبنك لي شنو؟…لو عاوز تعملها لينا كلها (نفرات) قروبات.
عاوزين بيك شنو؟.
والله يا شيبوب عرفتها.
والله يا شيبوب الله شافك.
شيبوب ما بقعد في (النفرات) دي.
النفرات دي ذاتها ما بتوصلكم (الفيفا).
والله لو وصلتكم (الكدرو) بتكون ما قصرت معاكم.
عاوزين تمشوا الفيفا بي نفراتكم دي.
انتوا بتلعبوا والله.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
نتم ليكم باقى (الخبر) – عشان قلت ما افوت ليكم موضوع (التقشف) دا.
الخبر فيه ما هو اخطر من (التقشف).
فيه (كارثة) عديل كدا.
شوفوا باقى الخبر بقول شنو :
(المجلس اظهر الانضباط ، وذلك بوقف نشاط لاعبين من العيار الثقيل بمثابة جوكر الفريق وركيزته وهما علاء الدين يوسف، والمهاجم المؤثر بكري المدينة.وبرر النادي قراره، بأن يوسف لم يباشر نشاطه مع الفريق ولم ينتظم في التدريبات، أما بكري وردت أنباء عن نشوب مشادة كلامية مع أحد أعضاء مجلس الإدارة خلال تدريب صالة نفذه الجهاز الفني الجديد، ومن المنتظر أن يمثل اللاعبان أمام لجنة تحقيق. وطالبت اللجنة التنفيذية، الجهاز الفني رسميًا بضبط معسكرات الفريق بالتنسيق مع الجهاز الإداري للفريق، كما طالبت اللاعبين رسميًا بعدم الإتصال برئيس النادي نهائيًا إلا عبر القنوات الإدارية المعروفة).
شفتوا الكلام دا خطير كدا.
افتكر ايقاف بكري المدينة بدخل ايضا ضمن سياسة (التقشف).
الجماعة ديل ما عندهم قروش لي بكري المدينة.
قالوا يتقشفوا بيه.
اللجنة التنفيذية ختتها واضحة وطالبت اللاعبين رسميا بعدم الاتصال برئيس النادي نهائيا.
الكلام دا ما قلتوا انا – ولا قاطعو (الخبر) من رأسو.
الكلام دا كلام اللجنة التنفيذية …قالوا ما عاوزين لاعب يتصل بالرئيس.
هذا يوضح حجم الفوضى التى يعيش فيها المريخ.
يعني الازمة وعدم الانضباط في الاتصال الذي يتم بين اللاعبين ورئيس النادي جمال الوالي.
الكلام دا طبعا معني بيه بكري المدينة ..وعلاءالدين يوسف.
ومعني بيه ايضا جمال سالم وامير كمال وضفر.
لكن انتوا موش كان احسن بدل تمنعوا اللاعبين وتطلعوا قرار بهذا الشكل ..موش كان احسن تقولوا للرئيس ما ترد على اي مكالمة من اي لاعب.
كان ريحتوا نفسكم ..واضاتكم بردت من كلام الجرايد.
الموضوع دا ممكن يحسمو جمال الوالي – اي لاعب يضرب ليه يوقفو في حدو.
فلاحتكم بس في اللاعبين.
غيروا (رقم) تلفون الرئيس لو شايفين الموضوع (محرج).
بكري المدينة وعلاءالدين يوسف بعد الايقاف طبعا بحاولوا يجيبوها من فوق.
اللجنة عارفهم عندهم اتصالات مع رئيس النادي – عشان كدا حسمت الموضوع دا.
بعد كدا يا بكري المدينة …ما عندك حل غير (مريخ الفاشر) او (النيل شندي) او (الامير البحراوي).
او كمان تضرب لي متوكل احمد علي.
ما في زول برد ليك اعلى من متوكل أحمد علي.
خلاص االلجنة دي قفلتها ليك ..واعلنت بشكل رسمي عن سياسة (التقشف).
وانت (التقشف) دا لو في (برشلونة) ما بتقعد فيها.
عجنبا ليكم.
وبسطني (تقشفكم).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الخبر وضح سياسة (التقشف) في خطوات حدثت فعلا ..اذ يقول الخبر :
(أما في إطار سياسة التقشف المالي، فإن اللجنة التنفيذية بالنادي الأحمر، فاجأت الجهاز الفني بقرار إلغاء معسكر القاهرة. وحصل على معلومة تفيد بأن معسكر القاهرة ربما يكلف النادي حوالي نصف مليار جنيه، ولهذا تم إلغاء المعسكر الخارجي، وتعويضه بمعسكر داخلي صارم من حيث الانضباط.يأتي ذلك في إطار قرار المجلس بالتعامل بدقة وحزم مع ملف ديون النادي التي تقدر بأكثر من 22 مليار جنيه سوداني).
يعني الغاء معسكر القاهرة كان نتاج (الفلس).
سياسة (تقشف) ساكت.
حكاية الدنيا رمضان.
والفترة ضيقة.
وما في مباريات اعدادية – دا كلام ساكت.
كان تقولوا كدا من الاول.
المعلومة التى قدمها الخبر بتقول ان ديون المريخ (22) مليار جنيه.
في شنو؟.
الناس ديل لا عندهم (جوهرة زرقاء).
ولا عندهم (بلاتشي).
ولا عندهم (شيبولا).
بعدين انتوا تعالوا هنا – بيني وبينكم كدا (26) عضو في اللجنة وبتتكلموا عن (التقشف).
26 عضو وغالبكم تعملوا ليكم (معسكر في القاهرة).
الكاردينال براهو.
لا عضو ولا حكومة بعسكر بالفريق شهر في تونس.
وبسجل في ناس سادومبا وشيبوب.
وببني في (الجوهرة).
انتوا (26) عضو ..وبتتكلموا عن (التقشف).
طيب خليتو شنو لي (اسامة ونسى).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…………….

و

والله مع (تقشفكم) دا ابراهومة ما اظن يقعد ليكم.
لا ابراهومة ولا مازن شمس الفلاح.
تقشف شنو كمان؟.
خالد النعسان ما فارقة معاه يمكن يتقشف.
ما في زول بيشتغل بيه.
مصعب عمر لو اتقشف في المباراة بعمل ضربتين جزاء.
حالتكم صعبة شديد.
الدنيا عيد.
يتقشفوا ليكم كيف مع (العيد) دا.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………..
السيدة (ل) – صريت ليك (العيد) في طرحه.
وقرّط على كدا.