جيبوه حي

كدايسنا البقت تنبح…..(تقول هو …هاو…هاوو).
الاتغير شنو؟…في الدنيا دي؟.
غنيماتنا البقن يحلبن (جبنة لباشكري)…
جدادنا الصار بدل ما يبيض – ببيض (لالوب)…
بدل تضحك …تقد عينك…
دا ما منك …
القصة بقت غريبة كدا …بقينا نشك في (الطحنية).
والكلام الكُتر كُتر..
الما مفهوم….
الحيطة (وقعت) قبل الخريف ..قالوا السنة دي (الخريف قوي).
قلنا ليهم طيب علاقة الكلام دا بي وقوع الحيطة شنو؟.
قالوا لينا حيطتكم دي عاوزة ليها سبب (توقعات) ساي من ناس الارصاد الجوي بجيب خبرها.
حيطتكم دي حساسة شديد.
حيطة مرهفة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
ندخل على (الجغرافيا).
حكاية انك تشيل ليك لاعب من (كشفو).
دي حارة.
وما بتتبلع.
تجيبوه من (بيتو).
وتقلعوه قلع من ناديه بدون ما يكون خلص – وعلى عينك يا تاجر …اصلو ما في زول بيستحملها.
الشافع وقت تقلع منو (لعبتو) بالواضح كدا ما بقبل.
ولا بسكت.
إلّا تغفلو.
تجوا انتوا يا ناس المريخ يشيلوا منكم (شيبوب) بالطريقة دي.
شابكننا السنة كلها.
عمر بخيت (ولدنا).
مهند الطاهر (ولدنا).
المعز محجوب (ولدنا).
بكري المدينة (ولدنا).
مجاهد احمد محمد (ولدنا).
ريتشارد (ولدنا).
طمبل (ولدنا).
كلتشي (ولدنا).
ليه بقت ليكم حارة في شيبوب.
عشان جبناه من (الكشف).
شلناه من القائمة الرسمية للمريخ.
من جوة.
من حباب عينيك.
انتوا وقت ما بتستحملوا الحاجات دي ما تقربو مننا.
الهلال حقو اصلو ما قاعد يخليه.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
شيبوب كان في كشف المريخ وكانت اقوانو (الجزائر) كلها بتقوم فيها.
بتقوم وما تقعد.
البلد كلها بتتكلم في قون شيبوب.
يجي (الكاردينال) يجيبو الهلال.
زول مسجل عندكم.
واسمو في الكشف بتاعكم.
وبيلعب في (الرديف) يا دوب.
وموجود اسمو الآن في كشف المريخ الافريقي ، واللاعب مع الهلال.
عليكم الله دي ما حقارة.
شيبوب دا هسع لو كان مع المريخ ..الجماعة ديل ما كانوا استفادوا منو في مباراة (الكوكب المراكشي دي).
كأن اتأهلوا للمجموعات.
بدل ما تعتمدوا على لاعبين فات فيهم الفوات.
الكبر حصل.
شيبوب ولد صغير.
وخفيف.
وخطير في الضربات الركنية.
كان نفعهم.
شيبوب كان في (المغرب) بجيب ليه قون.
شيبوب (نص الليل) جاب ليه قون في (الجزائر).
تفتكروا في (المغرب) ما بجيبو.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
في داعي الكاردينال في الظروف دي..يجيبو الهلال.
والهلال قاعد يلعب محلي.
وليه شهر ما لعب ليه مباراة.
يا هلالاب – انتوا الحقارة ليكم شنو؟.
قلنا ليكم في المساحة دي – الهلالاب ما بخلوا حقهم.
الشفوت ديل …اصلهم ما بنسوا.
تشيلوا بكري المدينة (مفكوك) – نشيل شرف شيبوب (مقيد).
من جوة البيت.
من الكشف.
والله الهلال دا عظمة.
اللاعب ذاتو اول حاجة نوديّه (تونس)..يتحرر من قيد المريخ ويتخلص من (ماضيه) ثم نأتي به بعد ذلك للهلال.
ما عندنا لاعب من المريخ بنجيبو من غير يعمل (دلّيت) لتاريخه في المريخ.
اول حاجة (يدلّت) تاريخه في المريخ.
الطاهر سادومبا ..ما جبناه الهلال إلّا بعد ما مشى (الرابطة).
شيبوب جبناه من (تونس).
ولا كلمة.
شوفوا شغلتكم وين؟.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
موضوع انك تشيل ليك لاعب من (كشفو) – طبعا ما حصلت قبل كدا في السودان.
ناس المريخ الموضوع دا لغاية الآن ما وقع ليهم.
دي اول عملية تتم بهذه الطريقة.
شابكننا الذراع الطويل – الذراع الطويل – لمن الذراع الطويل بقى عليكم.
في ذراع اطول من شيبوب يمشي جوبا.
ومن جوبا يمشي كينيا.
ومن كينيا يمشي اثيوبيا.
ومن اثيوبيا يرجع الخرطوم.
ومن الخرطوم يمشي تونس.
ومن تونس تاني يرجع الخرطوم.
من الله خلقكم شفتوا ليكم (ذراع طويل) بالشكل دا.
عشان تاني بس ما في واحد منكم يتكلم لينا عن الذراع الطويل.
(اصبع) ساكت ما عاوزنكم تتكلموا عنو.
بلا ذراع طويل – بلا لخمة معاكم.
حكاية شييوب ..وتسجيله من كشف المريخ بتذكرني ليك بي المصطلح العسكري البنسمعو وقت القائد يطلب ليه (قائد) معين.
وقت يكون في زول عاوزنو.
القائد بقول ليهم تجيبوه (حي).
عاوزنو حي (يفرفر).
الجنود وقت يمسكوا الزول المطلوب للقيادة ويكون ما حصل ليه اي مكروه بقولوا عليه (جبناه حي).
جيبوه حي.
زي شيبوب.
المصطلح بقى يطلق على اي عملية تتم بي سلام ومن غير ما يكون فيها خسائر.
شيبوب هسع ناس الهلال جابوه (حي).
ما فيه ولا شلخة.
ناس الكاردينال جابوه حي.
زي الكتاب ما بقول.
وجابوه حي من وين؟.
من كشف المريخ.
قالوا ليك شيبوب باقى ليه عقد (الهاوي) مع المريخ سنة ونص.
الحكاية البتغيظ ..قالوا ليك بيانات شيبوب تطابقت مع السيستم.
شوفوا السحر دا.
حكمة الله البيانات تطابقت مع السيستم رغم اللفلفة الكتيٍرة دي.
والله انا قلت بعد (التليب) الكتير دا ..البيانات ما اظن تتطابق مع (السيستم).
الزول دا من جوبا لي نيروبيٍ.
من نيروٍبي لي اديس.
من اديس للخرطوم.
ومن الخرطوم لتونس وبالٍعكس.
مع ذلك البيانات (اتطابقت).
والله يا ناس الهلال انتوا (طحنيتكم) قوية.
قوية عديل كدا.
غايتو بعد كدا إلا تمسكوا في (الرباط الصليبي) يا ناس المريخ.
ما عندكم خيار غير (الرباط الصليبي).
ركزوا في (الرباط الصليبي) بخفف عليكم الصدمة شوية.
بدل ما تقعدوا لينا كدا.
تسجلوا في اللاعبين المفكوكين.
الكاردينال دا اصلو ما بجيب ليه لاعب مفكوك.
اللاعب من المريخ بنجيبو (مقيد).
مفكوك نعمل بيه شنو؟.
شوفوا الهلال السنة دي سجل ليهم 21 لاعب من فريق اول للرديف للشباب…ما فيهم ولا لاعب (مفكوك).
ناس المريخ ابراهيم جعفر (مفكوك).
صلاح نمر (مفكوك).
ديديه (مفكوك).
محمد مصطفى (مشطوب).
الفلس كعب.
عدم القروش ..صعب.
نفسي اعرف بس (النفرة) دي مشيت وين؟.
اذا علي جعفر ما قادرين تعيدوا تسجيله.
علي جعفر شنو؟.
عمر بخيت فشلوا يوفروا ليه (500) الف جنيه.
انتوا نفرتكم دي مشت وين؟.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
……….
و
نتمنى اليوم الهلال يكمل قيد شرف شيبوب بعد وصول الكرت.
ويا ريت يوقع لخمس سنوات.
عشان ما عاوزين اي (تليب) تاني.
تسجيلات المريخ العاصمي بقى ما عندها اي فرق من تسجيلات مريخ الفاشر.
الظاهر الاتنين وراهم محسن سيد.
يا ناس المريخ قالوا في لاعب مفكوك في الاهلي مدني.
امشوا عليه.
ابراهيم جعفر ..صورة معدلة مع علي جعفر.
انتوا وين الريح علي؟.
…………….
السيدة (ل) – الصبر الايامات دي بدون (كهربة) هو ذاتو ما ببقى.
وقرّط على كدا.