الفيس كضاب صادقة الحكومة

> في حد بعرف اكتر من الحكومة؟ > الحكومة تقول لا اشكاليه في الامداد الكهربائي > الفيس يقول ما فيش كهربا من اصلو > طبعاً الفيس كضاب > لانو لو مافي كهربا عطالة الكي بوردات ديل بفسفسوا بي شنو؟ > الفيس كضاب > الحكومة تقول انتهاء مشاكل المويه وتشيل حق المويه مقدم كمان > الفيس يجيب لينا صور لي ناس لسناتها جاره بالواطه وانبراشات اعضاء القروبات تتواصل بين تحذيرات الآدمنز بعدم الخوض في مواضيع سياسية > ونفتح الماسوره الماسورة والتي تقول لنا خخخخخخخ المويه في ولا تخوضوا في السياسة > الفيس كضاب كضب > والحكومة صادقة شديد > البتقولو الحكومة صاح > ما فيش حد بعرف اكتر من الحكومة > الحكومة تقول هناك جهود مبذولة لرفع المعاناة عن كاهل الجماهير > في الفيس تنزل صور الجماهير عيونهم غاطسة وعضام خدودهم في السهلة وحفر صغيرة بين الكتف والعنق تبدو من خلال شريط الجلابية وواقفين حفايا > لكن الفيس كضاب > صادقة الحكومة > وما خيالات المآتة التي نزلت صورها في الفيس على صفحة الحكومة الشخصية الا فوتو شوب لي ناس سمان وامان ومكنشين وكهربتهم ما بتقطع ومويتهم رااااصدة > الفيس كضاب > والآدمن الرقيب المتطوع بكون م اقاصد شيء لو في عضو في القروب اتكلم عن اهمال المنتخب وقام الآدمن ذكرو بأنو القروب اجتماعي ثقافي رياضي ما سياسي وحذره من الحديث مره اخرى حول اعداد المنتخب وهدده بالحظر > الفيس كضاب شديد > الحكومة تبسط حريات بحسب قولها > كتر خيرها > لكن الفيس بعمل حاجات غريبة تحت مسمى القروب ثقافي اجتماعي ولا مجال لممارسة الحريات > اقصد لا مجال لتناول السياسة في القروب > وبرضو الفيس كضاب وصادقة الحكومة > البلد بلد الحكومة والمواطن مواطن الحكومة > الفيس فيس الحكومة والآدمنز ناس الحكومة > تبسط الحكومة الحريات > ويقيد الحريات آمنز قروبات الحكومة في فيس الحكومة > والفيس كضاب شديد > الحكومة صادقة > لانها تعلم ان السياسه تأثر في جميع المناحي والنواحي والضواحي > وبرغم ذلك يمنع الفيس الناس من قولة الحق بداعي عدم تناول السياسة > الفيس كضاب والحكومة صادقة > في حد بعرف اكتر من الحكومة؟ > ايها الناس > مظهر الزعيم بالأبيض امس يكسف > زي ناس الحلة الماشين تحدي في الحلة التانية > بس الفرق انو ناس الحلة بتكون عندهم عزيمة واصرار > وناس المريخ كانوا امس لا عزيمة ولا اصرار ولا لياقة ولا حتى مجرد امنية للنصر > ان يظهر المريخ وهو مقبل على مباراة افريقية فاصلة بهذا المستوى المتدني من الروح واللياقة فهذا امر مؤسف يا ونسي > وان يكون قوام البعثة من اللاعبين هذا العدد لهو امر مخجل ايضاً يا ونسي > وان تكون طريقة اللعب هي الاداء بالدين > يبقى يوم سبعة وعشرين خمسة بعيد شديد للجمعية > وقفنا مع هذا المجلس بقوة > ولكن ان يكون شعار المجلس بحلها الزمن تبقى مشكلة > جهجهتونا يا ونسي > بشتنتونا يا ونسي > فكوووووونا > ليست ردة فعل للهزيمة > فنحن نصفق للزعيم حتى عند الهزيمة > بشرط ان يقوم كل انسان بدوره كاملاً > لكن ان يقصر المجلس مادياً > وان يقصر اللاعبون اضرابياً > وان نسكت ونسياً > سيصبح المريخ نسياً منسياً > ايها الناس > لو ذهبت البعثة مكتملة > لو ادى اللاعبون بلياقة عالية واصرار > لن نحزن وقتها ولو خسرنا بالخمسة > الشكر كل الشكر لونسي ورفاقه > اكتر من كده مافي > واكتر من كده يبدأ الخصم من رصيدكم > كفاية يا ناس > ونستونا كتير > ونستونا بسداد استحقاقات اللاعبين > ولعب السداد بنعرفو > ما بنتحمل أي ونسة تاني > كتر خيركم لكم أجر المحاولة > ولا يكلف الله نفساً الا وسعها > القصه امانة > وحملها الإنسان إنه كان ظلوماً جهولا > شكراً كثيراً > لكن جبتوا ضقلها يتلولح > المهم > قرعة الكاف أوقعت الهلال في مواجهة بطل الكرنوس > ده حال زول يضحك يا روشا!!! > مسابقة > مدرب الهلال اسمو منو؟ > كردنة زاتو ما عارف > غايتو لو دخلتوا مجموعات الكرنوس يا فطومه بي مدربكم ده حا تتعبوا > اتخرجي سريع يا اختي > الهلال يحتاج لمدربة منسقة جداً > ايها الناس > ان تنصروا الله ينصركم > اها > نجي لي شمارات والي الخرتوم > كان شفت يا والينا > لو كتبنا في الفيس السخانة شدت علينا > من كل قروب خمسة آدمنز ينطوا لينا > ما دايرين سياسة… هكذا يقولوا لينا سلك كهربا ننساك كيف والكلب قال للجريو حظروني من القروب عشان قلت هو هو هو… زمان كان عضينا ما بحظرونا احتراماً لعقولنا والى لقاء. سلك