فولفسبورغ ضد رونالدو

الايامات دي عاوز امسك (خشمي) عندى.
ما عاوز اجيب اي سيرة للمريخ.
وعلي جعفر.
والوحدات الاردني.
ما عاوز اتكلم.
بي طريقتهم.
ما عاوز اقول اي شيء.
انا مالي ومالهم.
ما عندي بيهم شغلة.
الفي (جوهرتنا) مكفينا.
ما عاوز اقول اي حاجة.
ولا سبعة.
ولا الوحدات الاردني.
شوفوا ليكم زول تاني يجيب ليكم سيرة (الوحدات الاردني).
دي انا ما بعملها.
ما شغال بالموضوع.
وحدات شنو كمان؟.
براكم قاعدين تتخيلوا (الوحدات).
هسع في زول قال (الوحدات).
كمان عشان اقنعكم ما عارف المريخ سوف يلعب يوم الثلاثاء 19 ابريل امام وفاق سطيف.
الكلام دا كلو ما عارفو.
ولا سمعت بيه.
ولا جايب خبرو.
انا مالي.
لكن – مرة مرة كدا (السكات) بيغلبني.
ما بقدر اسكت.
بقوم من غير ما اشعر بلقى نفسي جبت سيرة (الوحدات الاردني).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
يعني مرة قاعد في الصالون في السخانة دي …قلت للولد عليك الله افتح معاك المروحة في (سبعة).
الولد قال لي المروحة ما فيها (سبعة) – مفتاح المروحة حدو (خمسة).
دي مروحة دي وإلّا (ساعة) الفيها سبعة دي.
قلت للولد خلاص افتح لى (المروحة) في خمسة – والاتنين تمها لي بـ (الشباك).
افتح معاك (الشباك).
هوا الله دا ما في احسن منو.
السبعة دي اصلو ما بخليها.
زي الزول المشى ليه مطعم ..وقعد يسأل في بتاع المطعم.
عندك شية.
بتاع المطعم يقول ليه موجودة.
يقول ليه عندك كبدة.
بتاع المطعم يقول ليه موجودة.
يقول ليه عندك كباب.
بتاع المطعم يقول ليه موجود.
يقول ليه عندك كوارع.
بتاع المطعم يقول ليه موجود.
يقوم يقول لبتاع المطعم عليك الله اعمل لي (فول) سادة ..ما تعمل فيه اي حاجة – لا شمار – لا زيت – لا جبنة..ملح ما عاوزو – خليني (اتغلي) بيه ماسخ كدا.
نحن الفول مصلح كتير علينا.
الدنيا دي فيها شنو؟..ما بتستاهل الزول ياكل ليه فول مصلح فيها.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
ما عارف …البخليني اعلق في (السبعة) شنو؟.
الساعة تكون اتنين.
يسألوني الساعة كم؟.
اقول سبعة.
ساعتي عاملة (سبعة).
اعمل ليها شنو؟.
ساعتي دي لو شافت (علي جعفر) بتعمل (تسعة) عديل كدا – حتى وان كانت الساعة واحدة.
ما عاوز اقلقكم ..واخوفكم ساكت.
بحاول اطلع من الموضوع.
اكلمكم عن عثمان حسين.
عليكم الله في احسن من عثمان حسين.
(شجن) دي زمان وقت ما يكون عندنا حق الفطور في المدرسة …كنا بنسمعها ..عشان وقت نسمعها ما بنقدر ناكل.
بنخش في الحالة التانية.
لكن اكتر اغاني عثمان حسين التفاؤلية كانت اغنية (بحبك احبك لا ما نهاية).
الاغنية التى كتبها محجوب سراج.
محجوب سراج دا كتب (اغنيات)…لو (سودانير) استقلتها صاح بتعمل ليها 1600 طيارة.
بحبك احبك لا ما نهاية اغنية فيها تفاؤل وتحدي وامال.
فيها اعلان رسمي.
ما في حاجة اسمها (دسدسة).
وانا ما عارف.
والزول السنة كلها يكون (متبلم).
ما في كلام زي دا.
لكن انتوا لا شجن ولا عشرة الايام ما بتمرقكم في الجزائر.
انا قلت الجزائر؟.
مالي بدون اشعر بدخّل (الجزائر).
الجاب الجزائر لاغنيات عثمان حسين شنو؟.
الجزائر دي يمكن تلقاها في اغاني حمد الريح.
تلقاها في اغاني خلف الله حمد.
في اغاني حسين شندي.
يمكن.
لكن في اغاني عثمان حسين (جزيرة) واحدة ما بتلقاها.
ما تقعد تلخبط ساكت.
عندك كلام لي (علي جعفر) قولو عديل.
احسن من اللفلفة دي.
احسن الزول يكون واضح.
واضح وصريح.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
امس قلت اطلع من حتة الوحدات دي شوية.
اطلع الموضوع من رأسي.
ولا اجيب ليه سيرة.
قمت قعدت في مباراة ريال مدريد وفولفسبورغ الالماني.
عاوز اشوف لي كورة عديلة.
اول مرة اشوف لي المان (صعايدة).
بعدين المباراة ما كانت بين ريال مدريد و فولفسبورغ الالماني.
ابدا ما في كلام بالشكل دا.
المباراة كانت بين رونالدو و فولفسبورغ.
يتخيل لي العشرة بتاعين ريال مدريد لو قعدوا في بيوتهم ..رونالدو كان حسم المباراة.
التلاتة دي رونالدو بجيبها ..بجيبها.
لو رونالدو دا لاعب في صفوف جزيرة الفيل تلاتو دي في فولفسبورغ دا بيجيبها.
ولا بتلفت.
الشيء المحيرني القون التالت.
القون التالت دي ..لو جابوا ليه مهندس مساحة عشان يفتح ليه في (الحيطة) ما بفتح ليه بالطريقة دي.
ناس رمضان عجب ديل بدون (حيطة) ما بعرفو يختوا ليهم كورة بالصورة دي.
الزول دا الكورة فتح ليها في (الحيطة)…لو شيلوك (طورية) ما بتفتح ليها كدا.
غايتو الكورة دي في العالم اطورت تطور.
تطور غريب.
كورتنا دي زي افلام الكرتون مقارنة مع المسلسلات التركية.
كورتنا دي – زي الكورة الكنا بنلعبها زمان وقت تكون في حصة فاضية.
كورة فوضى بس.
رونالدو دا اي مباراة المدرب بقعد معاه قبل المباراة.
رونالدو بشوف المدرب عاوز شنو؟.
يقول ليه جيب لي قون واحد بجيبو.
اتنين بجيبهن.
تلاتة…
اربعة…
ما تجيب كلو…ما بجيب.
حسب الطلب.
عصير..
برتقال.
منقا.
اي حاجة عاوزها المدرب بعملها.
انا في الارقام الفوق دي قلت (سبعة).
مالها (السبعة) متراوحة لي كدا.
والله من غير ما اكتبها..
ولا اقصدها بلقاها قدامي.
يا جماعة الشيء دا بكون من شنو؟.
ما عارف..
لكن انتوا لو عاوزين الصراحة..ناس وفاق سطيف قالوا شاهدوا شريط الوحدات الاردني.
قالوا سألوا من اكرم الهادي سليم.
قالوا ليهم اكرم ..جابوا ليهم زول اكرم من اكرم ذاتو.
زول اسمو جمال سالم ..بطلع من مرماه بدون سبب.
ناس وفاق سطيف سألوا من مازدا.
قالوا ليهم المريخ دا عندهم مدرب (بلجيكي)…اهتمامو بي شعرو ..اكتر من اهتمامو بي فريقه.
البلجيكي بتاع المريخ دا – يمين نحن في الهلال (طباخ) ما نشغلو.
المباراة كلها يرفع في شعرو.
ناس وفاق سطيف قالوا ليهم ناس المريخ عندهم مدافع اسمو علي جعفر ..لو جبت ليه سيرة (كاريكا) ساكت بقطع الكورة في شبكتو.
غايتو يا ناس المريخ شدوا حيلكم.
واعملوا حسابكم.
لغاية الدقيقة الخامسة من عمر المباراة لو ما جاتكم عوجة ..بتصبروا للدقيقة السابعة.
لكن بعد الدقيقة السابعة تاني ما تسألوني.
اي زول يخلي جوازو في ايدو.
الظروف ما معروفة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…….
و
نشوف الليلة برشلونة بتعمل شنو؟.
اتلتيكو كورتهم طبعا الكورة لو جاملوك فيها ضربة غير مباشرة.
ما بلعبوا.
ديل كورتهم صعبة صعوبية.
وناس المريخ عندهم كورة مع المريخ.
عشان كدا قعدوا يفاوضوا في برهان تية.
حركات جمال الوالي بقى يعملها اسامة ونسي.
ظاهرة.
وملعوبة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………
السيدة (ل) – سبعة في اتنين في الجزائر بتعمل (27).
وقرّط على كدا.