قولوا اذن وامرقوا

> قلوبنا مع الاهله الشرفاء
> الجاتم تجي للعدو
> موقفهم صعب شديييييد
> والثوار ديل لابعرفوا ارض ولا بعرفوا جمهور
> احفاد عمر المختار مابخافوا من الموت
> الاخوه الاهلة في ضيقة شديدة
> اسي هم ذاتهم ماعارفين كورتهم من عصراً بدري ولا بالليل
> كده وووب
> وكده وووووبين
> كان لعبوا عصر
> الحكام مابجوا
> والثوار مابجوا
> عندهم الكورة ليل
> والليل كلامو كتير
> وكان قالوا يلعبوا ليل
> الا يلعبوا غمدت لبدت
> الكشافات وقفوها زي الزعافات وماعرفوا يوصلوها من وين
> وكان وصلوها ما بتلحق
> وكان لحقت ما بتولع
> وكان ولعت ما بتستمر
> وكان استمرت مابتنستر
> اللمبات الصينية بنعرفها
> واللمبات الماصينية بنعرفها
> الصينية بتطفي براها
> مابتخليك تسأل الطفا النور منو
> الطفا النور بكون اب كسكتة
> لأنو استعجل الموضوع
> غايتو الا تلعبوها بضو الشموع
> اعتبروها عيد ميلاد صفركم التسعة وتمنين
> او اديكم فكرة
> عشان ماتدخلوا في عصر وليل
> اول ما يأذن المغرب قولوا أذن… أذن وقوموا جاريين
> الكاف لابعرفكم جريتو عصر
> ولا بفرزكم جريتوا ليل
> تجروا بس
> المهم
> بقولوا فلان شال اصبعو طبز بيهو عينو
> الهلال شال ابيكو وطبز بيهو عينو
> الزول ده ابعدوهوا من الحتة الخطرة ياروشا
> الزول بطبز ليكم التانية تاني الكسكتة ماتشوفوها
> المهم
> موضوع المطار بتاع التاكسي والمحترفين ما موضوع بتخلي ساكت
> الموضوع ده لو ثبت بثبت الاهمال الذي يرفل فيه الزعيم
> وبتر هكذا اهمالات واجب علي مجالس الادارات
> ولنا عودة حاسمة لهذا الموضوع
> المهم
> جماهيرنا اعدت العدة لاعلان التأهل
> موقفنا جيد
> ولكن هذا لا يعني ضمان التأهل والنوم علي العسل
> كل مجتمع المريخ عليه اعداد العدة للمعركة
> وحقو مانفكر في القسمة قبل انتهاء المعركة
> عشان العدو مايقوم يغدرنا علي طريقة الافلام ويودينا في داهيه يلحقنا اولاد ناس طه لا سمح الله
> ايها الناس
> قررت المجموعة إلغاء التيفو في مباراة الفريق النيجيري
> ويعود ذلك بكل شفافية
> الي ان اهل التيفو يصرفون عليه من مصادرهم الخاصة
> واستغل البعض القصة وحاموا يجمعون التبرعات من الشفوت تحت بند التيفو
> وحتي يكون الامر واضحا وشفاف
> قررت المجموعة إلغاء التيفو مع التأمين علي توزيع الاضاءة الملونة علي الجماهير مجانا
> ايها الناس
> من يريد التبرع للزعيم
> يتبرع من خلال قروبه الذي يثق فيه
> او يحضر لدار النادي ويسلم دعمه بنفسه ويستلم ايصاله
> وده كلو من اجل ضمان وصول تبرعك للكيان
> ومن اجل سد الباب امام بعض النفوس التي قد تضعف
> وبالذات النفوس اليومين دي مضغوطة لمن جابت الزيت
> وضعفها وارد شديد
> والحتة دي حسمها بعد التأهل ان شاء الله ساهل جداً
> ايها الناس
> ماننوم في العسل
> ومانعتمد على نصرنا الهناك
> نقفل باب مدينة بوكو حرام
> ونفتح باب نصر جديد يدعمنا شديد
المهم
> يفرح الوطن يوم السبت
> ليجدد الفرحة يوم الاحد
> وتبقى فرحة الوطن فرحتان
> عشان نخلف رجل علي رجل في وطن الافراح
> وطنا يمتاز بالفرحة
> نلقي الحافلة نفرح
> بتاع الحافلة مايقطعوهوا ايصال يفرح
> الكمساري يتخرج من الجامعة ويشتغل كمساري يفرح
> الموية تنقط نفرح
> تقطع نفرح
> عشان لما تجي بنفرح
> الكهربا تقطع جزئي نفرح
> ولما تقطع عام نفرح اكتر
> عشان الكانت قاطعة جزئي بترجع مع باقي الكهربا الكانت ماقاطعة
> المدرسة تفتح نفرح
> تقفل نفرح
> ننوم نفرح
> نحلم بالفرحة في نومنا
> نقوم من نومنا نفرح
> وهو في زول بقوم من النوم في بلدنا ما بفرح؟
> الموتات والجلطات كلها بتجي والناس نيام
> موية ساي تعمل سيولة في الدم ان وجد مافي
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> الجلطات كترت علينا
> عدم السيولة بعمل اكتر من كده قالوا لينا
سلك كهربا
ننساك كيف والكلب قال لاسيولة في الجيب لاسيولة في الدم بالطريقة دي بتصلبوا
والي لقاء
سلك