هناء إبراهيم : هاشتاق آخر الأسبوع

# ثمة مقولة من عندي تقول (البشوف ساعاتكم ما يشوف مواعيدكم) لمن له ساعة سمحة وماركة بينما مواعيده (ضاربة).
خلي جمال الساعة لايق على جمال احترام المواعيد.
سماحة احترام المواعيد أسمح من سماحة الماركة.
والله جد..
# (الكحة النفسية) هي أن تتكلم مع شخص في التلفون وفجأة يقول ليك (يلا طيب عشان رصيدي ح يخلص) في حين إنو إنت المتصل.
أنا وحبوبة جيرانا و(66) آخرون، ما عجبنا ليك.
شكلك شين قدام نفسك..
# أحياناً من الجيد أن لا تسأل طالباً ممتحناً عن إنجازاته داخل ورقة الامتحان.
ح يقول (دسيس) ومية مية وظابط وزي الفل وعشرة على عشرة.
وتأتي النتيجة خالية من كل هذا الكلام فيبقى ساقط وكمان كذاب.
لذا خليها لوقتها والموية تكذب الغطاس.
# (الهبالة) هي أن تكتفي بمتابعة نجاحات الناس بينما بوسعك أن تصنع نجاحاتك.
# الفهم الضيق واللبس الضيق الاتنين (ما يتخيروش عن بعض).
# وعموماً يا ناسيني كلياً: كيفك إنت كما تقول “فيروز”.
وإن كان عن نفسي أنا شخصياً: راضية بيك كما تقول “عائشة الفلاتية”.
# و…….
هسه شربنا الشاي