قون (بشه) جاء في منو؟.. في (يس) ولّا (جمال سالم)؟

محمد أحمد بشه جاب ليه قون في الاهلي شندي (الثكليبة) دورت ليك في العرضة جنوب.
بكاء مبالغ فيه.
الناس ديل مالهم؟.
مرات في الحلة بتسمع ليك صوت (كواريك) وما بتعرف الكواريك طالعة من ياتو بيت!!.
بعد قون بشه ..نحن ما عرفنا (الكواريك) طالعة من وين؟.
الاهلي ام المريخ؟.
اول مرة اشوف لي (صاقعة) تقع في شندي …ناس العرضة جنوب يختوا ايدهم في رأسهم.
اول مرة اشوف لي مطرة تنزل في دنقلا …ناس كادوقلي يغرقوا.
انتوا مالكم؟.
شفتوا ليكم (ميت) بيبكوه (الجيران) اكتر من اهلو.
يا بشه تاني لو عاوز تجيب ليك قون (صادم) كدا ..عليك الله راعي للحالات المصابة بالسكري.
راعي ناس الضغط.
والقلوب الخفيفة والوصيف.
يا بشه الناس الكبيرة في السن ما بيستحملوا العمائل البتعملوا فيها دي.
ولا بقدروا عليها.
مرة كاريكا.
ومرة بشه.
يجيبوا ليكم (اعصاب) من وين؟.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
التومة بنت خم الحمام ..قالت قون بشه في الاهلي شندي افقدها (3) شاشات وتلفزيون وتلاجة كبيرة و7 سنون.
قلنا ليها الشاشات والتلفزيون والسنون عرفناها …(التلاجة) دخلها شنو؟.
بشه دا اصلو ما تدقسوا منو.
لو سرحتوا منو (لحظة)…يبقى تلفزيوناتكم زايد تلاجة الجماعة منهم العوض وعليهم العوض.
قون بشه بيعمل فيكم كدا – يا ربي اقوان شيبوب ح تعمل فيكم شنو؟.
شيبوب دا لو جبتوا شهر خمسة يا الكاردينال …خلى المريخاب يراجعوا الطبيب.
الناس ديل ما بيستحملوا.
اعصابهم بقت زي الزول النائم في الحوش – لو شاف ليه (كديسة) ساكت بقول (حرامي).
لكن لو جينا للحق ..قون (بشه) في يس …حرق ليك المريخاب اكتر من القون البجيبوه في جمال سالم.
انا ما عارف القون جاء في يس وإلّا جاء في جمال سالم؟.
بشه جبد سفاري ..علي جعفر وقع.
بشه مشى على مالك ..امير كمال رجع.
وقت القون في (يس) بيعمل فيكم كدا – بعدين في (جمال سالم) بتعملوا شنو؟.
ناس الاهلي شندي ..اقتنعوا وطلعوا رضيانين ..ناس المريخ قالوا لا.
عاوزين يسخنوا (البكاء).
اول مرة اشوف لي (كسير تلج) في (البكاء).
في البكاء ذاتو بقيتوا يا ناس المريخ تكسروا في (التلج).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الحاجة بنت عثمان ..قالت ولدها الطاهر جاء راجع البيت الساعة 12 ..قالت ليه مالك؟..عمك مات….عمك (اتلحس) يا الطاهر؟؟؟.
الطاهر قال ليها عمي كويس زي الحصان يضرب في (عصيدة البلح) ..بس (بشه) جاب ليه قون في الاهلي شندي.
هسع (عصيدة البلح) الدخلها هنا شنو؟.
المريخاب بعد قون بشه عملوا عمائل صعبة.
وكان لي (سفاري) – صاحبكم قايل نفسو الى الآن بيلعب في المريخ.
بيلعب بي نفس الشعور.
يا سفاري ..انت المريخ فارقتو ليك (4) سنوات – اطلع من الاحساس دا عشان يوم الاهلي شندي يواجه المريخ ما (تبهلها) لينا في شندي.
الايامات دي في زول جديد في المريخ.
زول مجدي عبداللطيف اقدم منو في المريخ.
خالد النعسان بالنسبة ليه قديم.
صاحبكم مفتكر (جمال الوالي) عمل اسمو بـ (التصريحات) – عشان كدا زولكم شغال (تصريحات).
الزول دا مسكوه صوامع سمسم القضارف.
مسكوه الميناء البري.
الزول عندو فايض كلام.
عندو إلتهابات في حروف النصب.
ما معقولة ننتهى من بلة جابر ..يظهر لينا كمال شقاق.
يا كمال شقاق ..انت لو عاوز تثبت وجودك ..اثبت وجودك بعيد عن الهلال.
اتشطر على الخرطوم الوطني.
على النسور.
على الاهلي عطبرة.
ما في زول بيسألك.
لكن تشتطر على الهلال وانت مجرد (عضو مجلس معين) في المريخ ..يبقى خلينا نقول ليك لو مشيت الدهب – احسن من البتعمل فيه دا.
الهلال دا ما اي زول بتكلم عنو.
امس طبعا صحيفة (الصدي) كانت عبارة عن (نشرة سرية) ضد الحكام.
بيت بكاء عديل كدا.
الجقليبة العملوها ..في ضربة مازيمبي ما حصلت.
بقول (نشرة سرية) عشان الكلام الذي اتنشر فيها ما عندو اي سند ولا قيمة.
الناس ديل ..فيصل سيحة براهو.
سيحة يا بابكر مختار ..امس قال ليهم في عالم الرياضة ..مفروض تراوري وبكري المدينة الاتنين ينطردوا في مباراة مريخ الفاشر والمريخ العاصمي.
طرد عديل كدا.
ومن الشوط الاول.
الكلام دا ما قالو رمضان أحمد السيد.
ولا قالو خالد عزالدين.
الكلام دا قالو فيصل سيحة.
وبعد دا ..اعلام المريخ ..ومنو كدا شقاق بتكلموا عن (التحكيم).
يا جماعة اي زول عمل ليه (عمة).
ودخل ليه مباراة في الاستاد ..ممكن يهاجم (الحكام).
انتوا اعضاء لجنة التسيير الما فاهمين حاجة ديل بتجيبوهم لينا من وين؟.
لو في (حكام) بكري وتراوري من الشوط الاول مفروض يطردوهم في الفاشر.
الحكم لو كان شجاع وعنده شخصية وطرد بكري المدينة وتراوري امام مريخ الفاشر …كان المريخ اقل حاجة خسر هذه المباراة 0 / 5.
وكان خسر بكري وتراوري.
كنتوا خسرتوا المباراة بالخمسة.
وبعد دا ناس منو كدا شقاق بتكلموا عن التحكيم.
يا جماعة انتوا كنتوا بدكوا حصة الفيزياء.
فسحة الفطور ما كان بتطلعوا.
الكلام دا اصلو ما ممكن يطلع من زول بيحضر حصة الفيزياء.
غايتو اول مرة اشوف لي زول مجلي (فيزياء).
مجلي رسمي.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
محاسن بنت خلج النحل ..قالت زوجها امس قدر ما لفه الطبق عشان يطلع هدف بشه ..ما قدر.
كمال شقاق ..عارفين امس بعد (هضربة) قون بشه ..قال شنو؟.
تعالوا شوفوا (يوسف عيد) قال ايه؟.
غايتو نحن عذرناه ..عشان قون بشه دا بخلي (المريخاب) يطلعوا من شعورهم.
شقاق قال شنو؟.
(شن اللواء كمال شقاق عضو مجلس إدارة نادي المريخ والناطق الرسمي باسم المجلس هجوماً عنيفاً على التحكيم على خلفية المساعدة الواضحة التي قدمها للأزرق وجنّبه بها التعادل في مباراة الأمس أمام أهلي شندي وقال شقاق إن الحديث عن توجيه الحكام للانحياز لنادٍ بعينه لم يعد مجرد اجتهاد قابل للخطأ والصواب بل أصبحت الصورة أكثر وضوحاً وأصبحت كل الدلائل تؤكد أن هناك نادٍ سينتصر في كل الأحوال لأنه يُحظى بحماية لا مثيل لها من الحكام وأضاف: أصبح واضحاً أن شانتير وبقية الحكام الذين تم اختيارهم لإدارة مباريات الهلال لديهم توجيهاً واضحاً بعدم السماح للأزرق بخسارة أي مباراة مهما كان من أمر مستواه حتى وإن لم يؤهله لتحقيق الفوز في مباراة وحيدة لأن الاتحاد يخشى من انسحاب الهلال حال ابتعد عن صدارة الممتاز وتأكد من ذهاب اللقب لغيره، وأبدى شقاق دهشته من اعتماد لجنة التحكيم المركزية على الحكام الدوليين في إدارة مباريات الهلال ولم يستبعد أن تكون للأمر علاقة برغبة اللجنة في الاستفادة من خبرات هؤلاء الحكام في نصرة الهلال في كل الأحوال لافتاً إلى أن حكام صلاح يجتهدون أكثر من لاعبي الهلال حتى لا يخسر الأزرق أي مباراة).
الزول دا عارفين عمرو كم في مجلس المريخ.
و21 يوم بس.
الكلام الزي دا ما بقولو زول جاء بـ (التعيين).
كدا اول حاجة يا منو كدا شقاق اكتسب اهلية الدخول لمجلس المريخ عبر (الجمعية العمومية) بعدين اتكلم عن الهلال.
نحن الهلال دا اهلو لو ما جاءوا عبر (صناديق الاقتراع) والجمعيات العمومية ما بنسمح ليهم يتكلموا عن الهلال.
تجي انت مجرد عضو.
وجاء عبر (التعيين).
وليك 21 يوم…وتتكلم عن الهلال.
الناس البتجيبهم (العلاقات العامة) ..ما عندهم (رأي) في الهلال.
ولا بنسمح ليهم.
انتوا ما شفت عبدالتام حصل عليه شنو؟.
عبدالتام دخلتوا ليك (خلعة)..بقى نص النهار بتكلم عن (السوبر).
يا شقاق عليك الله شوف اول حاجة ..بكري المدينة في الفاشر ليه ما طردوه؟.
وشوف معاك بالمرة تراوري …زولكم عاوز يكتل ليه (مدافع) في الفاشر ..(كرت اصفر) ما ادوه ليه؟.
وبعد كدا تعال اتكلم عن الهلال.
الهلال دا ما بتكملوا عنو بي (عمة).
بعدين انتوا وقت شاطرين كدا في (الشوف) نسيتوا هدف بشه في المريخ.
نسيتوا هدف بشه الذي لم يحسبه الحكم لصالح الهلال في مباراة القمة.
التسلل اليوم داك كان وين؟.
……….

و

اقترح اعارة اللواء كمال شقاق لفريق الاهلي شندي في فترة التسجيلات القادمة.
الجرسة كعبة.
اركزوا شوية.
حالتكم بقت شينة.
ووضعكم بقى ما بيسمح.
الجقليبة بالصورة دي ما كويسة.
بقوم يطق ليكم عرق ساكت.
لو تابعتوا (بشه) دا بكتلكم كلكم.
اسألوا موسى الزومة لو مغالطني.
………..
السيدة (ل) – ناس الولاية منتظرين الخريف يجي ..عشان يقولوا تفاجأوا بالمطرة.
وقرّط على كدا.