من مشاهداتي في سفارة السودان بالسعودية

من مشاهداتي في سفارة السودان بالرياض
..امس..

والله ناس السفارة ما قصروا..وعملو حجز الكتروني زي الناس المتحضرة..واول ما تحجز يردوا ليك طوالي في ايميلك بي رسالة..وقبل ميعادك بي يوم يرسلوا ليك بالليل رسالة تذكير..انو نتشرف بخدمتكم ونتطلع لحضوركم..والله صحي..واول ما تجي وتبرز حجزك..يتعاملو معاك برقي ويستلموا ورقك الجاهز..لانو في موقع السفارة موجود كل متطلبات المعاملة..وحتى الفورم البتعبيهو موجود..فقط تقوم بالتسليم..وتنتظر..رغم الازدحام..وتخلص معاملتك..ويرسلوا ليك رسالة feedback..عن الخدمة المقدمة مع الشكر..
للامانة والتاريخ..

للاسف المواطنين هم البقوموا بي عرقلة النظام
اولا ما يكون عندو حجز..ويسمع الموظف ستين كلمة فارغة..والموظف بارد ويستمع ويرد رد آلي..لو عندك حجز يا مرحب بيك..
ثانيا..يتم النداء بالمايك لاتمام المعاملة..ويصر الجميع ..التجمهر حول الموظف..وعرقلة العمل..
ثالثا..برغم الشفافية يصر المواطنون عن البحث عن واسطة..والدخول للضابط المكلف..

رابعا..للاسف الشديد يتم التعامل مع موقع الحجز في موقع السفارة بسوء حيث يتم الحجز اكثر من مرة للمعاملة الواحدة مما يضيق الفرصة على الاخرين..حاليا مافي حجز للجواز الالكتروني الا شهر 5!!..

خامسا..يتعامل الموطنون بعداء محكم مع الموظفين..ويمتص الموظفين ذلك..وكأنهم اخدوا كورس في الامتصاص والتجفيف!!..
سادسا..لا يتاخر الموظفين اطلاقا عن مكان عملهم..الا للصلاة..وحاليا يعملون لغاية الساعة 11مساء نسبة للاعداد الضخمة من المواطنين..
سابعا..عندما يتحدث 10اصوات في وقت واحد..للموظف الجالس..ولا يرد الا لواحد..ذلك لانها لطبيعة الجنس البشري في الاستيعاب..واكيد طبعا..ال9الباقين..سمعوه انو مفتري..لانو اتجاهلمم..

السؤال..ليه نحنا شعب متحضر عند التعامل مع انظمة الدول الاخرى..ويحمل جرثومة التخلف..التي تنشط في العمل مع بني جنسنا ..؟؟

Abbas Omer