العلم علم البلد

نحن والله عندنا حاجات كده تحير, حاجات عجيبه كده,يعني في موضوع كده عامل سافوته ,ومجنني ومحيرني وشايف انو موضوع اساسي ومهم جدااا(حسب شوفي), وهو موضوع العلم ,علم بلدنا ده (علم السودان ) بي الوانو الاربعه ( الاحمر فوق ,والابيض في الوسط,والاسود في الاسفل,والمثلث الاخضر,)يعني نحن بنتعامل معاهو بي طريقه غريبه.. يعني العلم ده عندو قانون وعندو طريقة تعامل معينه واحترام خاص جداا,,اكن نحنا ماشغالين بالموضوع ده اصلو ولا جايبين ليهو خبر,ولا هامينا ,والكلام ده لي كل الاجيال,,يعني جيل حنتوب ..(جيل الاباء) متعلق بي علم الاستقلال وبفتكر ده هو العلم وعلمنا الهسه ده علم السبعينات وجيل السبعينات (علم النميري) وجيلو,وجيل السيستم طبعا مابفرز بين علمنا ده وعلم كتير من الدول العربيه, وفعلا كل اعلام الدول العربيه بي نفس الوان علمنا(ياربي نحنا بنشبه العرب؟) فما بتتفرز بي سهوله,, وعندي كم موقف كده,حصلو لي بي سبب العلم,مرة لقيت بتاع عربيه معلق علم السودان ولقيت اللون الاسود بي فوق ولما نبهتو للحته دي وانو اللون الاحمر هو الفوق علي اساس انو ده علم البلد ,عاين لي بي زهج وقال لي (ماكلها الوان الفرق شنو؟) ههههه الفرق شنو؟ والله المو فيك ناس الفنون الجميله الاتهاجر امريكا الجنوبيه عديل..ونفس المشكله اللون الاسود بي فوق ,وتوش دخلت المدرسه والحمد لله لقيت معلم وبعد السلام والتحايا نبهتو للمسالة دي استغرب وعاين لي , وقال لي (جدا مافي مشكلة بنصلحو),وتاني يوم نفس العلم (في نفس المدرسة ) مشقلب الاسود فوق والاحمر تحت,خشيت المدرسه وفتشت زول اتكلم معاهو ,بعد بحث وسؤال, المهم قابلت معلم غير زول امس اتفهم ونادي ليهو طلاب من ذوي الاحجام المحترمة, قال ليهم يعدلو العلم. واخلو اللون الاحمر فوق…واستغربت المدرسة دي كلها بي المعلمين والعمال والطلاب مافيهم زول عارف او بهمو علم بلدو؟.واولادنا ديل مش نحنا بندرسهم عن الوطن وكيف جدودهم دافعو و ماتو من اجل علم البلد ده ولاشنو؟؟ده غير انو اطفالنا لم يقولو النشيد الوطني كل يوم في طابور الصباح, المسالة عندهم تقليد و لعب ويغيرو في المعاني بتاعت النشيد الوطني,ويهرجو ويضحكو (في حاجه مقدسه).. ودي مشكلتنا نحنا الاباء ماوريناهم انو البلد دي وحبها وعلمها ونشيدها الوطني شي مقدس ومحترم ومافيهو لعب وانو جد ماهزل..(ماشفتو رئىس الدوله الوقف ورفع علم البلد من الارض وقبلو) .. لازم اولادنا اعرفو انو اذا مريت من تحت علم بلدك, لازم تقيف لحظات احتراما لي رمز البلد , لازم نعلم اولادنا كيف يحبو وطنهم ,وانو مايسمحو العلم ده اقع في الارض او نمسح بيهو حاجه اونرميهو في اي مكان,وانو احترامو واجب الوطن هو البلمنا وببقي لينا وخالد ..ممنوع يااخوانا اكون مرفوع علم ممزق او بي لون باهت وقبيح في واجهة مؤسساتنا سواء كانت حكوميه او اهلية اوسياديه ,(دي جريمة يعاقب عليها ) لازم نتعلم ونعلم اولادنا كيف نتعامل مع شعار الوطن ونقدسو ..لازم قانون العلم ينزل للاطفال في المنهج الدراسي ومن الروضه.. لازم نعلم اولادنا كيف يحبو ويقدسو ويحترمو بلدهم وعلم بلدهم ونشيدو الوطني ..لازم نتعلم ونعرف نفرز بين ( الحاجات) البلد دي من الازل قاعدة وحتقعد ونحنا كلنا ماشيين.وحنخليها للبعدنا لي (اولادنا) عشان كده علمو اولادكم حب بلدهم واحترامو ,وتقديس علم بلدهم والوانو وحفظوهم النشيد الوطني ومعانيهو صاح من صغرهم وفي كل مراحل عمره

صحيفة الوان