شكوى بالبروبوزيشن

> الاهله مقتنعين بانو للهلال قضيه
> هي شنو
> كردنه زاتو ما عارفها
> المهم عندهم قضيه
> ووصل الحال الي ان البعض يطلق الكذبه
> وبعد شويه يصدقها
> اولاد جحا
> زمان قالوا جحا كان خاتي ليهو كرسي في خشم الباب
> الناس ماشه وجايه في الشارع
> عمك جحا قال امقلب ليك الناس ديل
> بقي اي زول يجي ماشي
> جحا يقول ليهو في حفله في الشارع التاني داااك
> الاشاعه انتشرت
> وكبرت كذبة جحا
> والناس بقت تتدافع نحو الشارع دااااك
> جحا لما شاف الناس كلها ماشه الشارع داك
> دخل الكرسي وقال
> يمكن صحي في حفله في الشارع داك
> صلح طرطورو ولحقهم
> طلع الكذبه وصدقها
> وده حال اخوتنا الاهله
> ياخد مجراهو يا ناس
> ومجراهو خور ابو عنجه البودي دار الرياضه ام درمان
> يا اما تقولوا الروووووووب
> حل تالت مافي
> ايها الناس
> عجبتني قصة الشكوى ام بروبوزيشن دي
> قال ايه
> الحكم قال اللاعب بصق على وجهه
> ما قال بصق في وجهه
> والفرق بين في وعلى كبير
> شكوى بالبروبوزيشن يا عمك
> دي جديده
> لكن بيني وبينكم
> «اوفر» over بتختلف عن «أون» on
> زي ما «ان» in بتختلف عن «بوتوم» bottom
> in الشيء بتختلف عن in the bottom of الشيء
> بالطريقه دي ما نستبعد يوم يجونا يقولوا لينا
> القانون قال ان يوجه اللاعب الاساءة الى الحكم
> ما قال ان يوجه الاساءة للحكم
> والي بتختلف عن «ل» في المعنى
> «الى» بتشترط ان يوجه اللاعب اثناء الاساءه قدومو لي اضان الحكم مباشرة لما يصلو رايش
> ويستندوا في ذلك الى الآتي
> لا ليا ولا عليا
> عند استخراج الطباق كمحسن بديعي من السطر اعلاه
> نجد ان معظم الطلاب يقولون ان الطباق بين ليا وعليا
> ولكن الصحيح يكون الطباق في اللام من «ليا» وعلي من عليا
> وهذا في حد ذاته يظهر الفرق بين في «وجه الحكم» وعلى «وجه الحكم»
> بقيتوا اساتذة عربي يا روشا
> والله تباروا المريخ ده تبقوا فقهاء عديل كده
> الزول يا روشا بشلخوهو علي وشو ولا في وشو؟
> أنا بعرف ناس مشلخين في وشوشهم وناس مشلخين على وشوشهم.
> أسي يا روشا
> يجيك زول يقول ليك قلت لي أسعد «توف» على وشك
> لما يجيك اسعد بقول ليك الزول ده «تفه» لي على وشي ولا «تفه» لي في وشي؟؟
> ولا الفرق ده نسأل منو في القضارف؟
> والله تتابعوا على وفي ديل يجرنكم يودنكم الأولى
> ديل حروف جر بجرن من زمن الجاهليه ما يجرنكم انتو؟
> ياخد مجراهو بس
> ايها الناس
> ابو القنفت اليومين دي طالع في الكفر
> طلعوا الكسكته وجيبوا ليكم تلاته مليون ابو قنفت ضكر شوكو يقول يا غربتي لو دايرين أمير
> لكن ابو القنفت لو دخل جوه الكسكته بعمل عمايل
> واتقنفتي
> ايها الناس
> اليس من السهل جداً ان تلتزم روابطنا بالخارج بـ «شير» دولاري شهري لمرتب المدرب؟؟؟
> القصه ساهله جدا
> وناس الروابط عملوا اكتر من كده
> فقط اتصال وتنسيق وتنظيم
> والخيال يبقي واقع
> فروابطنا بالرياض وجده ومكه والمدينه والمنطقه الشرقيه ودبي والشارقه وابو ظبي والدوحه وامريكا وغيرها
> تستطيع ان تساهم في نهضة السودان خليك من مرتب مدرب
> سامعني يا ونسي !!!!
> ايها الناس
> غرزه مدرب شاطر
> وان كان البعض يرى انه يتمدد في مساحات لا تخصه
> العقد بحدد ليهو مناطق وحدود تمددو
> حقو نفكر قبل نقرر
> وفي المريخ توجد بعض الفوضى
> وهي التي تسمح لغرزه بالتمدد
> على الأقل ليضمن توفر المعينات التي يطلبها
> الجيش الجرار في القطاع الرياضي ودائرة الكرة مافي ليهو داعي
> موظف واحد يستطيع ان يقوم بكل الالتزامات بصورة ممتازه
> ويتبع ذلك الجيش الجرار بالمكتب التنفيذي
> المكتب التنفيذي يحتاج لعدد بسيط جداً من الموظفين المتخصصين
> لا علاقه لهم بالمجلس سوى وصفهم بانهم موظفين
> وبكونوا ثابتين في كل المجالس
> الناس ديل لا مع ولا ضد
> موظفين يقوموا بواجبهم الوظيفي تجاه مؤسسه يعملون لديها
> لا مع ولا ضد
> ولا في ولا على يا روشا
> ايها الناس
> ضربة بكري المدينه هي التي قادت الجماعه لهذه البطبطه
> ولكن القانون ياخد مجراهو
> خور ابو عنجه يا عمك
> والعزاء اننا حانشوف ابداعات ولدنا ميسي في دار الرياضه عصرا
> في دار الرياضه الصحيح ولا على دار الرياضه يا روشا ؟؟؟؟
> ولا في حفلة في الشارع التاني يا فطومه؟؟؟
> ايها الناس
> محاباة الاتحاد يمكن لاي انسان ان يتحدث عنها
> الا الاهله
> هل نسوا لجان يخطئ ولا يظلم ؟؟؟
> هل نسوا الصلوي وغابيتو وعدم معرفة اللغه البرتغاليه ؟؟؟
> هل نسوا آفة التجنيس ومن ادخلها لنا ؟؟؟؟
> ام تناسوا ؟؟؟؟
> ابو عنجه يا عمك هو مجراهو
> المهم
> كاسين في دنقلا
> مبسوطين شديد
> ايها الناس
> لو دايرين امير كمال جيبوا ابو قنفتكم
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> قررتو توقفوا الركشات عن العمل بعد اطناشر قالوا لينا
> ان صح الكلام ده يا والينا
> يبقي ما فكرتوا فينا
> منو البقدر يركب تاكسي ولا امجاد بالنهار خلي بالليل يا والينا؟
> ولما يحوم بالليل الواحد فينا
> موش بكون مغرووووض ولي ضروره يا والينا ؟؟؟
> لو الساعه واحده صباحا زول عيان لدينا
> وكل العندنا خمسطاشر جنيه يا والينا
> كان ممكن نركب ركشه بي عشره للمستشفى تودينا
> والخمسه جنيه تقعد رواب في الجيب من الفقر تحمينا
> لكن في الحاله دي يا والينا
> نضرب تلاته تسعات تجينا
> ولا نحتسب الزول العيان لدينا ؟؟؟؟
> ممكن بعض الركشات تكون شغاله في الفارغه يا والينا
> توزع الممنوع وترجع اللافي فينا
> لكن عشان شوية اجرام تعمم القرار علينا
> الغلطان يقتل وتصادر ركشتو يا والينا
> لكن الشر ما يعم لينا
سلك كهربا
ننساك كيف والكلب كان ماشي البطري داير ليهو ركشه … تاني امجاد يا بوبي
والى لقاء.
سلك