مجراهو وين؟!!!

> للعلم فقط
> حقو الاذاعة الرياضية تعرف إنو اتحاد القضارف عندو رئيس
> ورئيس اتحاد القضارف عندو تلفون
> ومفتوح لأي زول يتصل بيهو
> هذا للتذكير
> عساها، بل لعلها تفتكر للقصة دي
> ويا حبذا لو الاذاعة الرياضية (المحايدة) تتصل برئيس اتحاد القضارف
> اهو برضو ينوبكم ثواب
> وممكن المتصل يقود الحوار للاتجاه الهو دايرو
> مافي خوف
> أيها الناس
> في كل القضايا تظهر أهمية اذاعة المريخ
> وقناة المريخ
> فالاعتماد على قنوات واذاعات تدعي المهنية والحيادية
> وتعمل لصالح اتجاه محدد مللنا منه كثيراً
> واثر الاذاعات والقنوات على (تهويد وتنصير) النشئ واضح جداً وباين
> حقو نلحق الحتة دي
> هي الاذاعة كلها بتكلف كم؟؟
> تلاتة مننا لو باعو عرباتهم
> بنسمع من ام درمان اذاعة جمهورية المريخ
> ناسنا يدعموها بالاعلان فيها
> ودخل اتصالات شعبنا اولى بيهو اذاعتنا
> ومبارياتنا تنقلها اذاعتنا
> الاذاعة الاف ام الزمن ده ما صعبة
> ساااااهلة
> زي تلفون الدلاقين الكانوا بعملوهوا الشفع زمان داك
> منتهى السهولة مع التكنولوجيا
> واولادنا وكوادرنا هم المشغلين للناس اذاعاتهم
> نستقطبهم ونريحهم على الآخر
> وزيتنا في بيتنا
> غرفتين واستقبال بتعمل اذاعة
> يعني تأجر شقة صغيرة
> غرفة استدوديو تقسمها على اتنين
> مترين ونص ومتر ونص
> وغرفة مكتب فنيين
> والهول استقبال
> مكتب مدير ما محتاجة
> هو الاف ام دايرة ليها ادارة ومجلس ادارة ورئيس مجلس ادارة كمان؟؟؟
> أيها الناس
> الايام ورتنا ناسنا من الناس الما ناسنا
> وورتنا منو المحايد ومنو البحفر لينا تحت تحت وبعمل محايد
> حقو نكون واعين
> واذا دعينا للمقاطعة
> يكون الشفوت جاهزين
> وجربناها قبل كده مع جهات عديدة
> لي الليلة ما قامت ليها قايمة
> أيها الشفوت
> كلامي وااااضح
> المهم
> نغمة إعادة تراوري ظهرت
> وظهرت الى جانبها نغمة الاستغناء عن غارزيتو
> وهي نغمة جات لتتناغم مع عودة تراوري
> بالله عليكم
> أفيد تراوري ولا غرزة؟؟؟
> وهل يقارن تراوري بغرزة؟؟؟
> وهل قدم تراوري قبل كده لي الفريق عشان يقدم لينا نحنا؟؟؟
> مش ياهو تراوري المتسيب
> الاناني
> الناعم في اللعب
> بتاع حركة ملكة جانسي ولا تراوري تاني؟؟
> نسيتوا؟؟
> النسيان وعفا الله عما سلف ده الجهجه الناس طول عمرهم
> برا تراوري برا فلقة راس وبرا تقاعس
> وصلنا مرحلة اللعب الجماعي
> واللعب بغيره
> واللعب الضاغط
> واللعب لأجل الشعار
> دايرين ترجعونا مرحلة تراوري تاني ليييييييييييييييه؟؟؟؟
> أيها الناس
> فنيلة تراوري تتغسل بالجاز اول حتي يلبسها غيرو
> الله فكانا منو فكونا منو يا ونسي
> المهم
> التسجيلات ليست تكويش وتكويم ساكت
> التسجيلات فن وحاجة وحسن اختيار
> ويجب علينا ممارستها بهذه الكيفية
> والستة بتاعين ابو كسكتة ان شاء الله يكونوا قبضوا
> مايكون كلام ساكت
> وتبقى القصة الباقي ليك والباقي مرتبات
> ودخل دار الرياضة ام درمان بسيط
> واصبروا لينا
> المهم
> مستوى اللياقة الذي ظهر به المريخ في مباراة دنقلا
> بطال شديد
> وعله آخر الموسم الطويل الممل
> ولكن علينا أن نشكر اولادنا على المستوى المميز القدموهوا طوال الموسم إلا من هنات بسيطة
> نشكرهم على تميزهم في اي شيء
> اما افريقيا
> فكفانا ترشيح الاتحاد الافريقي لنا للفوز بالكأس
> المهم
> وليد البشرى الهلالابي قال لي
> انت شابكنا القانون ياخد مجراهو القانون ياخد مجراهو
> مجراهو ده وين؟؟؟
> قلت ليهو مجراهو خور ابو عنجة ولي دار الرياضة طوالي
> لكن الاهلة لو حريفين
> يمشوا الفاشر
> ويزوغوا من كورتنا الهنا
> يبقوا زاغو من كورتين
> وزوغان كورتين ما بنزل لي دار الرياضة
> كده يضمنو ما قابلونا وما نزلوا وما جابوا القسيمة للاتحاد
> فكرة يا كردنة
> طلع الكسكتة وفكر فيها
> لكن استعجل
> الزمن ما من صالحك
> وسفرة مكسيم ما مشكلة
> احتمال ما يجي
> الراجل قال ما ممكن العب سنة كاملة براي
> ومن حقو يا كردنة
> زول زي مكسيم ده ما بختوهوا خفير للمواسير يا اخوي
> أيها الناس
> هل من قناة شجاعة تعرض لنا الاخطاء التحكيمية في الدوري؟؟؟
> هل من رجل شجاع في اية قناة
> يجيب لينا بلنت النسور في الدورة الاولى الماعدوهوا؟؟
> ويجيب لينا بلنت كوفي الما اتحسب في الدورة الاولى؟؟؟
> ويجيب لينا بلنت الجماعة ضد اهلي مدني؟؟؟
> وضد مريخ الفاشر؟؟؟
> لو ما يخطئ ولا يظلم يا كردنة
> كان أسى نزلتو بدون انسحاب
> كان مع أمل عطبرة مفكرين في الصاعدين منو
> أيها الناس
> مجراهو خور أبو عنجة وبس
> أيها الناس
> «إن تنصروا الله ينصركم»
> آها
> نجي لي شمارات والي الخرتوم
> كان شفت يا والينا
> قالوا ابو القنفت بي مليون بقا يتباع لينا
> حاجات غريبة بقت تحصل فينا وتحصل لينا يا والينا
> ابو القنفت بي شناتو دي مليون شنو البجيبو يا والينا؟؟؟
> زمان بجيب البخت والحظ هكذا أهالينا قالوا لينا
> يكونش ده قصدهم يا والينا؟؟؟؟
سلك كهربا
ننساك كيف والكلب لما سمع ابو القنفت بجيب مليون حك اضانو بي رجلو الورا وقال..ابو القنفت العفن ده! والانسان لسه مجان؟؟؟؟
والي لقاء
سلك