تقول التقارير إن مليار دولار سنوياً هي دخل الهند من تجارة إيجار الأرحام “جمع رحم”… والرحم هو بيت الولد “بكسر الواو”….يعني بيت ..وممكن إيجارو…نحن أول أمة تصف الرحم ببيت الولد… نحن دائماً سباقون ومبدعون….إلا بلدنا تب غلبنا نجيِّهها ونمشي بيها لقدام…من سنة أربعة وخمسين ونحن نصوط فيها لي حسي…..اجتماع حوار اتفاقية لولوة…تاني اجتماع حوار اتفاقية لولوة… تاني اجتماع حوار اتفاقية لولوة… عدد الاتفاقيات الاتعملت لو جمعناها نلقاها أكتر من الاتفاقيات العالمية الاتعملت بعد الحرب العالمية التانية…برضو إبداع!!!!….المهم ارجع لي بيت الولد..أو الرحم…راجت تجارة إيجار الأرحام في الهند في السنوات الأخيرة.. وايجار الرحم يعني ..واحدة تأجر رحمها لي واحدة لمدة تسعة شهور وعشرة أيام….”والموية والكهرباء على المستأجرة “…ببساطة بويضة ملقحة من المستأجرة “ما ست الرحم” من حيوان منوي من زوج المستأجرة…ويزرعوها في رحم المؤجرة…وتبتق وتقوم بنية واللا وليد..قصاد مبلغ يتفق عليهو الطرفين…مع كل تكاليف الحمل من اول يوم رعاية ومتابعة طبية..أكل وشراب وراحة تامة….لعند حاجات الوحم دي يجبوها ليها الزوجين المؤجرين الرحم….مش دا جناهم القال داير طين البحر؟ واللا الدراب ؟ واللا أم فتفت؟….قيمة الإيجار صافية البتمسكها المؤجرة من غير تكاليف التشغيل من ستة الف دولار إلى تمانية ألف دولار…..الهند تعتبر أرخص دولة في إيجار بيوت الولد….عشان كدا الإقبال عليها كتير من الخارج…بيجو أزواج من أمريكا ومن اليابان ومن بريطانيا ومن المانيا…كايسين لي رحم فاضي يأجروهو…!!!…تلجأ بعض النساء لاستجار الرحم لأسباب صحية..يعني عقم لسبب ممكن إيجار الرحم يعتبر علاج ليهو….بعد تحديد الأطباء…. وفي نسوان بيستأجرن رحم فلهمة ساكت..وعشان ما يخربن أجسامن…وعندهن قروش محرقاتنهن ودايرات الجنا…تقول مالي ومال وحم وبصيق وقبيل على الحيطة والنهار كلو مقفلة نخريني بالتوب…..وبعدين لما الجنا يكبر شكلي ح يكون ما حلو..مادا كرشي قدامي… وكرعي وارمات..ووشي وارم والعوينات يغطسن….وكلو ولا دفير الجنا ..أكون راقدة في أمان الله يقوم يدافر بلا سبب… يطير النوم من عيوني. ووجع الولادة من يبدأ تغلبني القعدة حايمة كل مرة اقعد لي في ضل حيطة زي الغنماية لمن امشي على الاستبالية.وفي الاستبالية اصبع واصبعين وتلاتة اصابع.. وبعد الولادة … الكرش تابا تروح اها كيف الشورة؟….اخير اشوف لي هندية تتحمل دا كلو ..وبعد داك اشيل وليدي والا بنيتي وارجع اهلي….عليكم الله القروش هي دايرنها لشنو؟….اما المؤجرة صاحبة الرحم الجبرها ..الفقر..ثم الفقر ..ثم الفقر… تمانية ألف دولار تحل ليها مشاكل لوقعدو يشتغلو هي وراجلها بأيديهم وكرعيهم عمرهم كلو ما ح يحلوها…قالت واحدة ست رحم.. إنها اشترت بيت ودخلت وليداتها مدارس سمحة..وضاقت ليها يومين سمحات في الدنيا دي..عليكم الله رحم فاضي وقاعد ساكت يطيروهو وين؟…الله ينعل ابو الفقر البي يخلي مرا تأجر “بيت ولدها” لي جوكي جايي من أمريكا!!!!.
جنا حشاي
